އެމެރިކާގެ ރައީސް ބައިޑަން ފަލަސްތީންގެ ރައީސް މަހްމޫދު އައްބާސްއަށް ސިޓީފުޅެއް ފޮނުއްވައިފި އެވެ. ފަލަސްތީންގެ ނިއުސް އޭޖެންސީން ބުނީ އެ ސިޓީއަކީ ސަރަހައްދީ މަސްލަހަތާއި މެދު އިރުމަތީގެ އަދުގެ ހާލަތު އަދި އެމެރިކާއާ ފަލަސްތީންގެ ގުޅުމާ ބެހޭ ސިޓީއެއް ކަމަށެވެ.
މިދަނޑިވަޅުގައި ފަލަސްތީނުން އުޅުއްވަނީ އިޒްރޭލުގެ އަނިޔާވެރި ހަލަމާތަކުގެ ސަބަބުން އަމިއްލަ ގައުމުގައި ނޭވައި ނުލެވިގެންނެވެ. އިޒްރޭލުގެ ބޮން އަޅާ ބޯޓުތަކުން ޣައްޒާއަށް ދިން ހަމަލާތަކުގައި 68 މީހުން މަރުވެ 152 މީހުންނަށް އެކިވަރުގެ އަނިޔާލިބިފައި ވާއިރު މިއަދަދު އަދި އިތުރުވާނެ ކަމަށް ވަނީ ބެލެވިފަ އެވެ.
އައްބާސްއަށް ދިމާވެ ވަޑައިގެންފައިވާ ދަތިއުނދަގޫ ދަނޑިވަޅެއްގައި ސިޓީފުޅެއް ފޮނުއްވުމުގެ ބޭނުމަކީ ކޮބައިކަމާ މެދު ވަނީ ސުވާލުތައް އުފެދިފަ އެވެ. މިއީ ދެ ގައުމުގެ ދެމެދުގައި އިހުލާސްތެރި ގުޅުމެއްގެ ފެށުންތޯ ނުވަތަ ބޭކާރު ކަމެއްތޯ ގިނަބަޔަކު ސުވާލުކުރަމުން ދެއެވެ.
ބައިޑަން ސަރުކާރާ ހަވާލުވެ ވަޑައިގަތުމަށްފަހު ޓްރަމްޕް ސަރުކާރުން ހިފަހައްޓާފައި ހުރި ފައިސާގެ އެހީތައް ވަނީ ފަލަސްތީނަށް ދޫކޮށްލާފަ އެވެ.