މޯލްޑިވްސް ޒަކާތް ހައުސް އިން އިންތިޒާމްކޮށްގެން އޮގަސްޓް 23 ގައި ބާއްވަން ހަމަޖެހިފައިވާ އިންޓަނޭޝަނަލް ޒަކާތު ކޮންފަރެންސްގެ ޕްލެޓިނަމް ޕާޓްނަރަކަށް ބީއެމްއެލް އިސްލާމިކް އިއުލާންކޮށްފި އެވެ.
"ޒަކާތު ފޯ ސޯޝަލް ޖަސްޓިސް އެންޑް ޑިޖިޓަލް އިންކްލޫޝަން: އެޑްވާންސިންގ ސޯޝަލް ވެލްފެއާ ތްރޫ އިނޮވޭޝަން" މި ޝިއާރުގެ ދަށުން ބާއްވާ މިއަހަރުގެ ކޮންފަރެންސްގެ މަގުސަދަކީ ރާއްޖޭގައި ދެމެހެއްޓެނިވި ޒަކާތުގެ ނިޒާމެއް ކުރިއެރުވުމެވެ.
ބީއެމްއެލް އިން ބުނާ ގޮތުގައި މި އިވެންޓުގައި އިލްމުވެރިންނާއި ޒަކާތް ދައްކާ ފަރާތްތަކާއި މުޖުތަމައުގެ އިސްވެރިން އެއްތަނަކަށް އެއްވެ އިޖުތިމާއީ ރައްކާތެރިކަމާއި އިގްތިސާދީ ގޮތުން މުހިންމު ވަސީލަތެއްގެ ގޮތުގައި ޒަކާތް ހިންގުން އިތުރުކުރުމާއި ގުޅޭގޮތުން މަޝްވަރާކުރުމަށް ހަމަޖެހިފައިވެ އެވެ. އަދި ޑިޖިޓަލް ޒަމާނާއި އެެއްގޮތަށް އެކަށޭނަ ގޮތްތައް ފަހިކުރުމުގެ މައްޗަށްވެސް އަލިއެޅުމަށް ހަމަޖެހިފައިވާ ކަމަށް ބީއެމްއެލް އިން މިކަން އިއުލާންކުރި ޓްވީޓްގައި ބުނެފައިވެ އެވެ.
ރާއްޖޭގެ އެންމެ ބޮޑު އިސްލާމިކް ބޭންކުގެ ގޮތުގައި ބީއެމްއެލް އިސްލާމިކް އިން ދަނީ އެކައުންޓާއި ކާޑާއި ފައިނޭންސިން ހައްލުތައް ހިމެނޭ ގޮތަށް ޝަރީޢާއަށް ތަބާވާ ބޭންކިން ހިދުމަތްތައް ތައާރަފްކުރުމަށް މަސައްކަތްކުރަމުންނެވެ.
މީގެ އިތުރުންވެސް، ބީއެމްއެލް އިސްލާމިކް އަށް 10 އަހަރު ފުރުން ފާހަގަ ކުރުމުގެ ގޮތުން ބޭންކުން އަންނަނީ 10 ކަސްޓަމަރަކަށް ހައްޖު ދަތުރުތައް ހުޅުވާލާ ހާއްސަ ޕްރޮމޯޝަނެއް ފަށާފައެވެ.
ފާއިތުވި ދިހަ އަހަރު ތެރޭގައި ބީއެމްއެލް އިސްލާމިކް އިން ވަނީ އިސްލާމިކް އޯވަޑްރާފްޓް ފައިނޭންސިން، ކޭޝް ފައިނޭންސިން، ހައިބްރިޑް ހޯމް ފައިނޭންސިން، އަދި އިސްލާމިކް ޑެބިޓް ކާޑު ފަދަ ކުރިއަރާފައިވާ ބައެއް ހިދުމަތްތައް ތައާރަފްކޮށްފަ އެވެ. އަހަރީ ދުވަސް ފާހަގަކުރުމުގެ ތެރެއިން ބީއެމްއެލް އިސްލާމިކްގެ މިހާރުގެ ކަސްޓަމަރުންނާއި އަލަށް ހައްޖު ޕްރޮމޯޝަން ލިބޭނީ ބޭންކުގެ ފައިނޭންސިން ފެސިލިޓީތަކާއި މުސާރަ ޓްރާންސްފާގެ ހިދުމަތްތަކާއި ޖެނެރަލް އިންވެސްޓްމަންޓް އެކައުންޓް ނުވަތަ އިސްލާމިކް ކްރެޑިޓް ކާޑު ބޭނުންކުރުމުންނެވެ.