ބައެއް ކާނާއަކީ ހޫނުކުރުމުން ނުވަތަ ނުބައިކޮށް ރައްކާކުރުމުން އޭގެ ކެމިކަލް ކޮމްޕޮޒިޝަން ބަދަލުވެ، ގެއްލުންހުރި މާއްދާތައް އުފައްދާ ބާވަތުގެ ކާނާތަކެވެެ. ބޭރުފުށުން ތާޒާކަމަށް ދެއްކި ނަމަވެސް މިބާވަތުގެ ކާނާތައް ގިނަދުވަހު ގެންގުޅުމުގައި ވަރަށް ބޮޑަށް ސަމާލުވާންވާނެއެވެ. މިފަދަ ކާނާ ބޭނުންކުރުމުން ސިއްހަތަށް ނޭދެވޭ އަސަރުތަކެއް ކުރުމަކީ އެކަށީގެންވާ ކަމެކެވެ. ތިރީގައި މި ބަލާލަނީ ގިނައިރުވަންދެން ބަހައްޓާފައި ހޫނުކުރުމުން ވިހަވުން އެކަށީގެންވާ ބައެއް ކާނާތަކެކެވެ. މީގެއިން އެއްބައި އެއްޗެހީގެ ނުބައި އަސަރު ވަގުތުން ނުކުރި ނަމަވެސް ފަހުން ސިއްހަތަށް ގެއްލުންވުން އެކަށީގެންވާ ކަމަށް ބައެއް ސިއްހީ މާހިރުން ގަބޫލުކުރެއެވެ.
1. ކިރު އަޅައިގެން ތައްޔާރުކުރާ ކާނާ
ކިރު އަޅައިގެން ތައްޔާރުކުރާ ސޫޕް ފަދަ ދިޔާ ތަކެތި ހޫނުކުރުމުން އޭގެ ކިރު މާއްދާތައް ދެފެން ދެފެނަށް ބަދަލުވެ، ރަހަ ނުބައިކޮށްދެއެވެ. މިގޮތަށް ވެފައި ހުންނަ ކާއެއްޗެހި ކެއުމުން ހަޖަމްކުރާ ނިޒާމަށް ދަތިތަކެއް ކުރިމަތިވެ އެވެ.
2. ބައެއް ބާވަތުގެ ތަރުކާރީ
ކެރެޓާއި ސްޕިނެޗް ކަހަލަ ބައެއް ބާވަތުގެ ތަރުކާރީ ނުބައިކޮށް ރައްކާކުރުމުން ނުވަތަ ގިނަ ދުވަހު ބެހެއްޓުމުން އޭގެ ބޭރުފުށް ކޮންމެވެސް ވަރަކަށް ފީވެފައި ހުއްޓަސް އެތެރެފުށް ރީތިކޮށް ހުރެދާނެއެވެ. އެކަމަކު މިހެން ހުންނަ ތަރުކާރީތައް ބޭނުންކުރުން އެހާ ރަނގަޅެއް ނޫނެވެ. ވަކިން ހާއްސަކޮށް ލޭގެ މައްސަލަ ހުންނަ މީހުން މިކަމަށް ވަރަށް ބޮޑަށް ސަމާލުވާން ވާނެއެވެ. އެހެން ނޫނީ، މެތެމޮގްލޮބިނީމިއާ (ލޭގެ އޮކްސިޖަން ފޯރުކޮށްދިނުމުގެ ޤާބިލުކަން ދަށްވުން) އަދި ލޭގެ ޕްރެޝަރަށް އަސަރުކުރާނެއެވެ. ތާޒާ ނޫން ތަރުކާރީ ބޭނުންކުރާނަމަ އޭގެއިން އުފެދޭ ނައިޓްރޭޓް ކެމިކަލްގެ ޒަރީޔާއިން ހަށިގަނޑުގެ ސެލްތައް ކެންސަރަށް މަގުފަހިކުރުވައެވެ.
3. ސައި/ކޮފީ
ސަައި އަލުން ހޫނުކުރުމުން އޭގައި ހިމެނޭ އެންޓިއޮކްސިޑެންޓްސް ނައްތާލާ، ޓެނިން ނަމަކަށް ކިޔާ މާއްދާއެއް އުފެދޭނެއެވެ. މީގެއިން ސައި އިތުރަށް ހިތިވެ، ބަނޑުހަރުވާން މެދުވެރިވާނެއެވެ. ކޮފީ އަލުން ހޫނުކުރުމުން އޭގެ އެސިޑިޓީ އިތުރުވެ، ބަނޑު ސަކަރާތްވުމުގެ ފުރުސަތު ބޮޑުކޮށްދެއެވެ.
5. ހަނޑޫ
ހަނޑޫ ނުބައިކޮށް ރައްކާކުރުމުން ނުވަތަ މާ ގިނަ ދުވަހު ބެހެއްޓުމުން އެފްލަޓޮކްސިން ކިޔާ ވިހަ މާއްދާ އުފެދެއެވެ. މިއީ ކެންސަރު ފަދަ ބަލިތަކަށް މަގުފަހިކުރުވާ ވިހަ މާއްދާއެކެވެ.
6. ބިހާއި ސީފުޑް
ބިސް ހޫނުކޮށްފައި ގިނަ އިރު ބެހެއްޓުމުން ބިހުގައި ހުންނަ ޕްރޮޓީން ބަދަލުވެ، ވިހަ މާއްދާގެ ހާލިއަކަށްވެ އެވެ. ޕްރޮޓީންގެ ބާވަތްތަކަކީ ގިނަދުވަސް ވެއްޖެއްޔާ، އޭގެ ސައިޑް އިފެކްޓްސް ބޮޑު އެއްޗެއްސެވެ. މިއީ މި ތަކެތި ރައްކާކުރުމުގައި ފަރުވާކުޑަކޮށްފިނަމަ އެލާޖީގެ މައްސަލަ ހުންނަ މީހުންނަށް ވަކިން ބޮޑަށް އުނދަގޫ ކުރުވާނެ ކާނާތަކެކެވެ.
7- މަޝްރޫމް
ކުރިންވެސް ބުނެވުނު ފަދައިން ޕްރޮޓީން ހިމެނޭ ކާނާތައް ހޫނުކުރުމުގެ ސިއްހީ ނަތީޖާ ރަނގަޅެއް ނުވާނެއެވެ. މަޝްރޫމަކީވެސް ޕްރޮޓީން އިން މުއްސަނދި ބާވަތެކެވެ. މަޝްރޫމަކީ އެ ތައްޔާރުކުރާ ދުވަހެއްގައި ވަގުތުން ކާން ޖެހޭ އެއްޗެކެވެ. މަޝްރޫމް އަޅާފައިވާ ކާނާ ގިނައިރުވުމަށްފަހު ހޫނުކޮށްގެން ކެއުމުން ހަޖަމްކުރުމުގެ ނިޒާމަށް އުނދަގޫތައް ކުރިމަތިވެ އެވެ. އެއްބައި މީހުންނަށް ސީރިއަސް ހިތުގެ މައްސަލަތައް ވެސް ކުރިމަތިވެ އެވެ.
މިފަދަ ކަންކަމުން ރައްކާތެރިވުމުގެ ގޮތުން ކޮންމެ ކާނާއެއްވެސް ރައްކާ ކުރަންވީ ރަނގަޅު ގޮތް ހޯދުން މުހިންމެވެ. ކާނާ ރައްކާކުރުމުގައި ފިނިހޫނުމިނަށް ފަރުވާތެރިވާށެވެ. ކާނާގެ ކުލައާއި ވަސް ބަދަލުވެފައި ހުރިތޯ ބެލުމުގެ އިތުރުން ކާނާ ރައްކާކުރާ ތަނުގެ ސާފުތާހިރުކަން ބެލެހެއްޓުންވެސް އެހާމެ މުހިންމެވެ.
ނިންމާލުމުގެ ގޮތުން ދަންނަވާނީ، ކާނާ ރައްކާކުރުމުގައި އަދި ބޭނުންކުރުމުގައި ސަމާލުވުމަކީ ވަރަށް މުހިންމު ކަމެކެވެ. ކާނާ ނުބައިކޮށް ރައްކާކުރުމުން ނުވަތަ ހޫނުކުރުމުން އުފެދޭ ވިހަ މާއްދާތަކުގެ ސަބަބުން ސިއްހަތަށް ލިބިދާނެ ގެއްލުންތަކުން ރައްކާތެރިވުމަށްޓަކައި، ކާނާ ރައްކާކުރުމުގައި އަދި ބޭނުންކުރުމުގައި ރަނގަޅު އާދަތައް އަށަގެންނެވުން މުހިންމެވެ.
ހަވާލާ: ޓައިމްސް އޮފް އިންޑިއާ - ފުޑްސް ދެޓް ޓާން ޓޮކްސިކް ވެން ރީހީޓެޑް (2021).