މަދިރި އާލާކުރުން މަދުކުރުމަށް އަމާޒުކޮށްގެން ހިންގާ "މަދިރީން ރައްކާ" ކެމްޕެއިންގެ ދަށުން ހުޅުމާލޭގެ އެކި ސަރަހައްދުތަކުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފޮގް ކުރުމުގެ މަސައްކަތް ފަށައިފި އެވެ.
އެޗްޑީސީން ބުނި ގޮތުގައި މި ކެމްޕޭނަކީ މަދިރިން ޖެހޭ ބަލިތަކުން ރައްކާތެރިވުމަށް ހުޅުމާލޭގައި މަދިރި އާލާވާ ތަންތަން ދެނެގަނެ މަދުކުރުމަށް އެޗްޑީސީން އިސްކަންދޭ އަހަރީ ޕްރޮގްރާމެކެވެ.
މި ކެމްޕެއިންގެ ތެރެއިން އެޗްޑީސީން ހުޅުމާލޭގެ އެކި ސަރަހައްދުތަކަށް ފޮގް ކުރަން ފަށާފައި ވަނީ ބުދަ ދުވަހު އެވެ. މިމަހުގެ 17 ވަނަ ދުވަހުގެ ނިޔަލަށް ފޮގިންގ ކުރިއަށްދާއިރު، ކޮންމެ ދުވަހަކު ދެ ފަހަރު ހެނދުނު 5:00 އަދި ހަވީރު 5:30 ގައި ފޮގް ކުރުމުގެ މަސައްކަތް ކުރިއަށްދާނެއެވެ.
ފަހަކަށް އައިސް މަދިރިން ޖެހޭ ބަލިތައް އިތުރުވަމުންދާއިރު، ހުޅުމާލޭގައި މަދިރި އާލާވާ ތަންތަން ދެނެގަނެ، މިއިން ބައެއް ތަންތަން ސާފުކޮށް ނައްތާލުމުގެ އިތުރުން ވަކި ސަރަހައްދުތައް ފޮގްކުރުމުގެ މަސައްކަތް ކުރިއަށްދާ ކަމަށް އެޗްޑީސީން ބުނެ އެވެ.
މީގެ ކުރިން އަހަރުތަކުގައި އެޗްޑީސީން ވަނީ ހުޅުމާލޭގައި މަދިރި އާލާވުން ކޮންޓްރޯލްކޮށް މަދުކުރުމަށް ހެލްތު މިނިސްޓްރީ އާއި އެޗްޕީއޭ ފަދަ ކަމާބެހޭ އިދާރާތަކާ ގުޅިގެން "މަދިރިން ރައްކާތެރި" ކެމްޕޭންގެ ދަށުން ސާފުކުރުމުގެ ގިނަ ހަރަކާތްތަކެއް ހިންގާފައެވެ. އަދި މަދިރި އާލާވުން މަދުކުރުމަށް ފަރުދީ މަސައްކަތްތަކަށް ވެސް އެޗްޑީސީން ހިތްވަރު ދެއެވެ.