އއ. މަތިވެރީގައި އެއާޕޯޓެއް ތަރައްގީކޮށް ހިންގަން މިނިސްޓްރީ އޮފް ފިނޭންސް އެންޑް ޕްލޭނިން އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ދެމެދު އެއްބަސްވުމެއްގައި ސޮއިކޮށްފިއެވެ.
މި މަޝްރޫއުގެ އެއްބަސްވުމުގައި ސޮއިކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އއ. މަތިވެރިއަށް ވަޑައިގެން, ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގެ ތެރެއިންނެވެ.
އެ މަޝްރޫއުގެ އެއްބަސްވުމުގައި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުޙައްމަދުއެވެ. މިނިސްޓްރީ އޮފް ފިނޭންސް އެންޑް ޕްލޭނިންގެ ފަރާތުން ސޮއިކުރެއްވީ ސްޓޭޓް މިނިސްޓަރު ހުސެއިން އިމްރާން އަބްދުލް މުހައިމިންއެވެ.
މި މަޝްރޫއުގެ ދަށުން މަތިވެރީގައި ހަދާ އެއާޕޯޓަށް އިންވެސްޓްކޮށް, ޑިޒައިންކޮށް, ތަރައްގީކޮށް އޮޕަރޭޓް ކުރާނީ އެމްއޭސީއެލް އިންނެވެ. އަދި އެއާޕޯޓަށް ބޭނުންވާ ބިން ހިއްކާއިރު މަތިވެރި ރައްޔިތުންނަށް ބޭނުންވާ 26.5 ހެކްޓަރުގެ ބިން ހިއްކުމަށްވެސް ހަމަޖެހިފައިވެ އެވެ.
ރަސްމިއްޔާތުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ, މަތިވެރީގައި އެއާޕޯޓެއް ހެދުމަކީ އެމަނިކުފާނު ވެވަޑައިގެންނެވި އެންމެ މުހިންމު އެއް ވައުދުފުޅު ކަމަށެވެ. މި އެއާޕޯޓަކީ 100 އިންސައްތަ ފުރިހަމައަށް ދެކޮޅު ޖެހޭނެ އެއާޕޯޓެއް ކަމަށާއި އެއާޕޯޓުގެ ސަބަބުން މަތިވެރިއަށާއި މުޅި އަތޮޅަށާއި އަދި ޖުމުލަކޮށް ފަތުރުވެރިކަމުގެ ދާއިރާއަށްވެސް ފައިދާ ކުރާނެ ކަމަށްވެސް ވިދާޅުވިއެވެ.
ރައީސް ވަނީ މަތިވެރި އެއާޕޯޓް މަޝްރޫއު ދެ އަހަރާއި ބައިގެ ތެރޭގައި ނިންމައި ހުޅުވާނެކަމުގެ ޔަގީންކަންވެސް މަތިވެރީގެ ރައްޔިތުންނަށް ދެއްވާފައެވެ.
މި މަޝްރޫއުގެ އެއްބަސްވުމުގައި ސޮއިކުރިއިރު, މަޝްރޫއުގެ ސާވޭގެ މަސައްކަތް އެމްއޭސީއެލް އިން މިހާރު ވަނީ ފަށައިފައެވެ.