ފަހުމީ މިފަދައިން ވިދާޅުވީ މާދާމާ ހެނދުުނު 06:00 އިން 10:00 ދޭތެރޭގައި މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓް ކެނޑުމާއި ގުޅޭގޮތުން ދައުލަތުގެ މީޑިއާއަށް ދެއްވި ހާއްސަ އިންޓަވިއުއެއްގައެވެ.
މި އިންޓަވިއުގައި ވާހަކަދައްކަވަމުން ފަހުމީ ވިދާޅުވީ ސްޓެލްކޯއަށް މިވަގުތު ލޯޑް ޝެޑަކަށް ދާން ޖެހުނީ ހުޅުމާލޭ 50 މެގަވޮޓް ޕްލާންޓުން މިވަގުތު މާލެއާއި ހުޅުމާލޭގެ ބައެއް ސަރަހައްދުތަކަށް ކަރަންޓް ފޯރުވާތީ ކަމަށެވެ. ފަހުމީ މައުލޫމާތު ދެއްވިގޮތުގައި މި ޕަވަރ ޕްލާންޓްގެ ބިންގާ އެޅުނީ 2016 ގައި ކަމަށާއި އެތަން ކަމިޝަން ކޮށްފައިވަނީ 2019 ގައި ކަމަށެވެ. ވީމާ، މާލޭގައި ޑިމާންޑް އޮތް ގޮތުން ކޮންމެ 5 އަހަރަކަށް ގާތްގަނޑަކަށް 50 މެގަވޮޓްގެ ކަރަންޓް ބޭނުންވާ ކަމަށެވެ. މި ޕަވަރޕްލާންޓް ކަމިޝަން ކުރެވުނު ފަހަކުން އަދިއެއް އައު ޕަވަރ ޕްލާންޓެއް އެޅިފައި ނެތްކަމަށް ފަހުމީ މައުލޫމާތު ދެއްވިއެވެ.
މި މޭރުމުން ވާހަކަދައްކަވަމުން ފަހުމީ ވިދާޅުވީ އައު ޕަވަރ ޕްލާންޓެއް އެޅުނު ނަމަ މި ޕަވަރ ޕްލާންޓްތަކުގެ ޓެކްނިކަލް މަސައްކަތްތަކަށް ޝަޓްޑައުން ކުރަން ޖެހުނަސް މިގޮތަށް ލޯޑް ޝެޑްކުރަން ނުޖެހޭނެ ކަމަށެވެ. މާޒީގައި ޕަވަރ ޕްލާންޓް އެޅިފައި ނެތުމުގެ ސަބަބުން މިއަދު މި ހާލަތަށް އަންނަން ޖެހުނު ކަން ފަހުމީ ފާހަގަކުރެއްވިއެވެ.
ސްޓެލްކޯ އިން މިއަދު ނެރުނު ބަޔާނެއްގައި ވަނީ އެކުންފުނިން މާލެ ސަރަޙައްދުގެ ރައްޔިތުންނަށް ދެމުންދާ ކަރަންޓުގެ ޚިދުމަތް އިތުރަށް ހަރުދަނާކޮށް، މެދުކެނޑުމެއްނެތި އެ ޚިދުމަތް ފޯރުކޮށްދިނުމަށްޓަކައި މާދަމާ މުހިންމު މަސައްކަތެއް ކުރުމަށް ހަމަޖެހިފައިވާ ކަމަށެވެ. ހުޅުމާލޭގައި ގާއިމުކޮށްފައިވާ 50 މެގަވޮޓްގެ އިންޖީނުގޭގައި ކޮންމެހެން ކުރަންޖެހޭ މުހިންމު މޭޖަރ މަސައްކަތެއް ކުރުމަށް، މާދަމާ ހެނދުނު 06:00 ން 10:00 ށް ހުޅުމާލޭގެ 50 މެގަވޮޓް އިންޖީނުގެ ނިއްވާލުމަށް ސްޓެލްކޯއިން ވަނީ ނިންމާފައެވެ. މި މަސައްކަތް ކުރިއަށްދާ ވަގުތު، މާލެއާއި ހުޅުމާލޭގެ ބައެއް ސަރަޙައްދުތަކުން، ކޮންމެ ސަރަޙައްދަކުން ގާތްގަނޑަކަށް އެއްގަޑިއިރަށް ކަރަންޓުގެ ޚިދުމަތް މެދުކެނޑޭނެއެވެ.
އެހެންނަމަވެސް، ޚިދުމަތް މެދުކެނޑޭ ސަރަޙައްދުތަކުގައި ހިމެނޭ ހޮސްޕިޓަލްތަކާއި، އަދި އެހެނިހެން މުހިންމު ޚިދުމަތްތައްދޭ މުއައްސަސާތައް (ކްރިޓިކަލް އިންފްރާސްޓްރަކްޗަރ) އަށް ކަރަންޓުގެ މެދުކެނޑުމެއް ނާންނާނެއެވެ. މިކުންފުނީގެ އަމާޒަކީ މި މަސައްކަތް ތާވަލުކުރެވިފައިވާ ގަޑިގެ ކުރިން ނިންމައި، ވީއެންމެ އަވަހަކަށް އާންމު ހާލަތަކަށް ކަރަންޓުގެ ޚިދުމަތް ގެނައުމެވެ. މިއީ ކުރިއަށް އޮތްތަނުގައި ކަރަންޓުގެ ޚިދުމަތް ދިނުމުގައި ދިމާވެދާނެ މައްސަލަތަކަށް ދުރާލާ ތައްޔާރުވެ، މައްސަލަތައް ހުއްޓުވުމުގެ ގޮތުން ނުވަތަ ޕްރިވެންޓިވް މެޝަރއެއްގެ ގޮތުގައި ކުރަންޖެހޭ މުހިންމު މަސައްކަތެކެވެ.