މާލެއާއި ހުޅުމާލެއިން މިއަދު ކަރަންޓް ކެނޑުނު ސަރަހައްދުތަކަށް ކަރަންޓް ކެނޑުމުގެ ގާތްގަނޑަކަށް ގަޑިއެއްހާއިރު ތެރޭގައި އަލުން ކަރަންޓް ދޫކުރެވޭނެ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފިއެވެ.
ސްޓެލްކޯއިން އެކުންފުނީގެ ސޯޝަލް މީޑިއާ ޕޭޖްގައި މިފަދައިން ބުނެފައިވަނީ މިއަދު ފަތިހު 06:00 އިން ފެށިގެން މާލެއާއި ހުޅުމާލޭގެ ބައެއް ސަރަހައްދުތަކުން ކަރަންޓް ކަނޑާލުމާއި ގުޅިގެންނެވެ.
އެކުންފުނިން ބުނީ ހުޅުމާލޭ އިންޖީނުގޭގައި މިވަގުތު ކުރެވެމުންދާ މޭޖަރ މަސައްކަތާއި ގުޅިގެން ލޯޑް ޝެޑިންގ ކުރިއަށްދާއިރު، މާލެއާއި ހުޅުމާލޭގެ ލޯޑް ޑިމާންޑަށް ބަލައި ޖުމްލަ 17 ސަބްސްޓޭޝަނެއް މިވަގުތު ވަނީ ނިއްވާލެވިފައި ކަމަށެވެ. މިއީ މާލޭގެ %14.7 އަދި ހުޅުމާލޭގެ %5.8 ކަސްޓަމަރުން ކަން ސްޓެލްކޯއިން ފާހަގަކުރިއެވެ. ހިދުމަތް މެދުކެނޑިފައިވާ ކަސްޓަމަރުންނަށް ހިދުމަތް މެދު ކެނޑޭތާ ގަޑިއެއްހާއިރު ތެރޭ އަލުން ހިދުމަތް ދެވިގެންދާނެ ކަމަށް ވެސް އެކުންފުނިން ބުނެފައިވެ އެވެ.
މިވަގުތު ހިނގަމުންދާ ހުޅުމާލޭ އިންޖީނުގޭގެ މޭޖަރ މަސައްކަތައް ހުޅުމާލެ 50 މެގަވޮޓް އިންޖީނުގެ ވަނީ މިއަދު ފަތިހު 06:00 އެހާކަށްހާއިރު ނިއްވާލާފައެވެ. މިއަދުގެ ވަގުތެއްގައި މާލެއާއި ހުޅުމާލެއިން ކަރަންޓް ކެނޑިގެންދާނެ ވާހަކަ ސްޓެލްކޯއިން ވަނީ އިއްޔެ ނެރުނު ނޫސް ބަޔާނެއްގެ ޒަރީޔާއިން އިއުލާންކޮށްފައެވެ.
އެބަޔާނުގައި ވަނީ އެކުންފުނިން މާލެ ސަރަޙައްދުގެ ރައްޔިތުންނަށް ދެމުންދާ ކަރަންޓުގެ ޚިދުމަތް އިތުރަށް ހަރުދަނާކޮށް، މެދުކެނޑުމެއްނެތި އެ ޚިދުމަތް ފޯރުކޮށްދިނުމަށްޓަކައި މާދަމާ މުހިންމު މަސައްކަތެއް ކުރުމަށް ހަމަޖެހިފައިވާ ކަމަށް ބުނެފައެވެ. ހުޅުމާލޭގައި ގާއިމުކޮށްފައިވާ 50 މެގަވޮޓްގެ އިންޖީނުގޭގައި ކޮންމެހެން ކުރަންޖެހޭ މުހިންމު މޭޖަރ މަސައްކަތެއް ކުރުމަށް، މިއަދު ހެނދުނު 06:00 ން 10:00 ށް ހުޅުމާލޭގެ 50 މެގަވޮޓް އިންޖީނުގެ ނިއްވާލުމަށް ސްޓެލްކޯއިން ވަނީ ނިންމާފައެވެ.
އެހެންނަމަވެސް، ޚިދުމަތް މެދުކެނޑޭ ސަރަޙައްދުތަކުގައި ހިމެނޭ ހޮސްޕިޓަލްތަކާއި، އަދި އެހެނިހެން މުހިންމު ޚިދުމަތްތައްދޭ މުއައްސަސާތައް (ކްރިޓިކަލް އިންފްރާސްޓްރަކްޗަރ) އަށް ކަރަންޓުގެ މެދުކެނޑުމެއް ނާންނާނެއެވެ. މިކުންފުނީގެ އަމާޒަކީ މި މަސައްކަތް ތާވަލުކުރެވިފައިވާ ގަޑިގެ ކުރިން ނިންމައި، ވީއެންމެ އަވަހަކަށް އާންމު ހާލަތަކަށް ކަރަންޓުގެ ޚިދުމަތް ގެނައުމެވެ. މިއީ ކުރިއަށް އޮތްތަނުގައި ކަރަންޓުގެ ޚިދުމަތް ދިނުމުގައި ދިމާވެދާނެ މައްސަލަތަކަށް ދުރާލާ ތައްޔާރުވެ، މައްސަލަތައް ހުއްޓުވުމުގެ ގޮތުން ނުވަތަ ޕްރިވެންޓިވް މެޝަރއެއްގެ ގޮތުގައި ކުރަންޖެހޭ މުހިންމު މަސައްކަތެއް އެ ކުންފުނިން މައުލޫމާތުދީފައިވެ އެވެ.