ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ފުރަތަމަ ފަހަރަށް އިންޖިނޭރުންގެ ދުވަސް ފާހަގަކޮށްފިއެވެ.
އެކުންފުނިން މި ދުވަސް އިއްޔެ ފާހަގަކުރީ ކޮންމެ އަހަރެއްގެ އޮގަސްޓް މަހުގެ 31 ވަނަ ދުވަހަކީ ގައުމީ އިންޖިނޭރުންގެ ދުވަހުގެ ގޮތުގައި ފާހަގަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވުމާއި ގުޅިގެންނެވެ. މިއީ ރާއްޖޭގެ ތާރީހުގައި މިފަދަ ދުވަހެއް ފާހަގަކުރަން ފެށި ފުރަތަމަ ފަހަރެވެ.
އެއާއެކު، އިއްޔެ ސްޓެލްކޯ އިން ވަނީ ކުންފުނީގެ ފެންވަރުގައި އެ ދުވަސް ފާހަގަކޮށްފައެވެ. ސްޓެލްކޯއިން އެކުންފުނީގެ ސޯޝަލް މީޑިއާގައި އިއްޔެ ކުރި ޕޯސްޓެއްގައި ވަނީ އެކުންފުނީގައި ހިދުމަތްކުރަމުންދާ އިންޖިނޭރުންގެ އަގުވަޒަން ކުރުމަށް ސްޓެލްކޯގެ އިންޖިނޭރުންނަށް ރަތް ދޫލައިގެ މަރުހަބާއެއް ކިޔާފައިވާކަން ހާމަކޮށްފައެވެ. މި ހަފްލާގައި ކޭކު ފެޅުމުގެ ރަސްމިއްޔާތެއް ވެސް ބާއްވާފައިވެ އެވެ. މި ދުވަސް ފާހަގަކުރުމުގައި އެކުންފުނީގެ އެމްޑީ ޙުސައިން ފަހުމީވެސް ބައިވެރިވެވަޑައިގެންނެވިއެވެ. މީގެ އިތުރުންވެސް ސްޓެލްކޯއިން ވަނީ އެކުންފުނީގެ ސޯޝަލް މީޑިއާގައި ކުންފުނީގެ އެތައް އިންޖިނޭރުންގެ މަސައްކަތުގެ ވާހަކަ ދައްކާ ޕޯސްޓުތަކެއް ޝާއިއުކޮށްފައެވެ. ސްޓެލްކޯއަކީ އަބަދުވެސް ކުންފުނީގެ މުވައްޒަފުންގެ އަގުވަޒަންކުރާ ކުންފުންޏެއްކަން ފާހަގަކޮށްލަންޖެހެއެވެ. މިހާރުވެސް އެކުންފުނިން ދަނީ އެކުންފުނީގެ ރިކްރިއޭޝަން ކްލަބެއް ހިންގަމުންނެވެ. އިންޖިނޭރުންގެ ދުވަސް ފާހަގަކުރުމަށް ސްޓެލްކޯއިން ތަފާތު އެކި ހަރަަކާތްތައް ރާވާފައިވާ ކަމަށް އެކުންފުނިން ބުނެފައިވެ އެވެ.
މި އަހަރުން ފެށިގެން، ކޮންމެ އަހަރެއްގެ އޮގަސްޓު މަހުގެ 30ވަނަ ދުވަހަކީ، ޤައުމީ ފެންވަރުގައި ފާހަގަކުރާ، "ދިވެހިރާއްޖޭގެ އިންޖިނޭރުންގެ ދުވަސް" ކަމުގައި ރައީސުލްޖުމްހޫރިއްޔާ ހަމަޖެއްސެވީ، މި ޤައުމުގެ ތާރީޚުގައި މިހާތަނަށް ހިންގުނު އެންމެ ބިޔަ އުމްރާނީ ތަރައްޤީގެ މަޝްރޫޢު ކަމުގައިވާ، ސިނަމާލެ ބުރިޖު އިފުތިތާހުކުރެވުނު ދުވަހަކީ، އޮގަސްޓު މަހެއްގެ 30ވަނަ ދުވަސް ކަމަށްވާތީ، އިންޖިނޭރުންގެ ދުވަހުގެ ގޮތުގައި ފާހަގަކުރުމަށް އެންމެ އެކަށީގެންވާ ދުވަހަކީ، އެ ދުވަސް ކަމަށްވާތީއެވެ.
ސިނަމާލެ ބުރިޖު ހުޅުވިތާ މިއަދަށް 7 އަހަރު ފުރޭއިރު، މި ބުރިޖުގެ ސަބަބުން ދިވެހީންގެ ދިރިއުޅުމަށާއި، އިޤްތިޞާދަށް، އަދި އިޖްތިމާޢީ ހުރިހާ ޚިދުމަތަކަށްވެސް ހެޔޮ ބަދަލުތަކެއް އައިސްފައިވާކަން ރައީސުލްޖުމްހޫރިއްޔާގެ ޚިޠާބުގައި ވަނީ ފާހަގަކުރައްވާފައެވެ.
މީގެ އިތުރުންވެސް ސްޓެލްކޯއާއި ދައުލަތުގެ އެހެން ކުންފުނިތަކުން ވަނީ މިދުވަސް ފާހަގަކުރުމުގެ ގޮތުން ރާއްޖޭގެ ސްކޫލުތަކަށް ޒިޔާރަތްކުރުމަށް ހަމަޖައްސާފައެވެ. މިއީ ކޮންސްޓްރަކްޝަން މިނިސްޓްރީގެ އިސްނެގުމެކެވެ. ގައުމެއް ބިނާކުރުމުގައި އިންޖިނިއަރުންގެ އޮންނަ ހިއްސާގެ ފުޅާކަން، އިލްމީ ނަޒަރަކުން ދަރިވަރުންނަށް ކިޔާދިނުމަކީ މި ޒިޔާރަތުގެ މަގްސަދެވެ.