ޓޫރިސްޓަކު ޓުއާ އޮޕަރޭޓަރެއް ބޭނުން ނުކޮށް، ފްރީ އިންޑިޕެންޑެންޓް ޓްރެވަލާ (އެފްއައިޓީ) އެއްގެ ގޮތުގައި ރާއްޖެއަށް ޒިޔާރަތްކުރަން މޯލްޑިވިއަން އިން ނަގާ ޓިކެޓަށް 15 ޕަސެންޓް ޑިސްކައުންޓެއް ލިބޭނެ ކަމަށް ގައުމީ އެއާލައިން، މޯލްޑިވިއަން އިން އިއުލާންކޮށްފިއެވެ.
މޯލްޑިވިއަން އިން ނެރުނު ބަޔާނެއްގައި ބުނެފައިވާ ގޮތުގައި އެފްއައިޓީސް އަށް ޑިސްކައުންޓެއް ދިނުމަށް އެ އެއާލައިނުން ނިންމީ ފަތުރުވެރިންނަށް ޑޮމެސްޓިކް ޓްރެވަލް އޮޕްޝަންސް ގަތުމަށް ފަސޭހަ ކޮށްދިނުމުގެ ގޮތުންނެވެ. އަދި މިކަމުގެ ސަބަބުން ފަތުރުވެރިކަން އިތުރުވެ، ދިވެހިންނަށް އިގްތިސާދީ ފައިދާތަކެއް ލިބިގެންދާނެ ކަމަށް ވެސް އެ އެއާލައިނުން ބުނެ އެވެ.
ފަތުރުވެރިން ދިވެހި މުޖުތަމައުއާއި ގުޅުވައިދިނުމަކީ މޯލްޑިވިއަނުން ފަޚުރުވެރިވާ ކަމެއް ކަމަށް އެކުންފުނިން ބުނެފައިވެ އެވެ.
މޯލްޑިވިއަން އިން ބުނާ ގޮތުގައި، ލޯކަލް ޓޫރިޒަމަށް އެހީތެރިވުމަށް ކުރާ މަސައްކަތާ އެއްގޮތަށް، ލޯކަލް ޓޫރިޒަމް ވިޔަފާރިތަކަށް ކޯޕަރޭޓް ރޭޓްތައް ހުށަހަޅަމުންދާނެ ކަމަށެވެ.
މޯލްޑިވިއަން އަކީ އެންމެ ފުޅާ ދާއިރާއެއްގައި ދަތުރުތައް ކުރާ ލޯކަލް އެއާލައިނެވެ. އެ އެއާލައިނުން 17 ތަނަކަށް ދަތުރުތައް ކުރެ އެވެ. މޯލްޑިވިއަން އިން ވަނީ އެފްއައިޓީގެ ފަތުރުވެރިންނަށް އެމީހުންގެ ވެބްސައިޓް މެދުވެރިކޮށް ހިދުމަތް ބުކް ކުރެވޭނެ ކަމަށް ބުނެފަ އެވެ.