މި ނިމިދިޔަ މަހު، މިސްރުގައި މަރުވި، އުމުރުން 13 އަހަރުގެ ފިރިހެން ކުއްޖެއްގެ މަރަށް ދުނިޔޭގެ މީޑިއާތަކުގެ ސަމާލުކަން ހުއްޓިއްޖެއެވެ. އަދި ދުނިޔޭގެ ސިއްހަތާ ބެހޭ އެކި އެކި ލިޔުންތައް ޝާއިއުކުރާ އޮންލައިން މަޖައްލާތައްވެސް މި މަރަށް ހާއްސަ ސަމާލުކަމެއް ވަނީ ދީފައެވެ.
މިސްރުގެ މީޑިއާ ރިޕޯޓުތައް ބުނާ ގޮތުން އެކުއްޖާ މަރުވެފައި ވަނީ ބަނޑުގައި އުފެދުނު ޖަރާސީމުތަކެއްގެ ސަބަބުން ހަޖަމުގެ ނިޒާމު ހުއްޓި، މުޅި ކުއްޖާގެ ހަށިގަނޑު އިންފެކްޓް ވެގެންނެވެ. އަދި މިކަމުގެ ސަބަބެއްގެ ގޮތުގައި ފާހަގަކޮށްފައިވަނީ އެ ކުއްޖާ ކޭ 3 އުރަ ނޫޑުލީހެވެ. އެ ކުއްޖާ އެއްމެ ފަހުން ކައިފައި ވަނީ ރޯ ނޫޑުލީހުގެ 3 އުރަ ނޫޑުލީހެވެ. ޕަކެޓުން ކެނޑިގޮތަށް، ނުކައްކާ، އޭގެ ތެރެއަށް އެ އުރައިގާ އިންނަ ލޮނުޕެކެޓުކޮޅު އަޅާ އެއްކޮށްގެން އެ ތިން އުރަ ނޫޑުލިސް ކޭ ފަހުން އެ ކުއްޖާގެ ބަނޑުގައި ކުޑަ ރިހުމެއް ހުރިކަމަށް މީޑިއާ ރިޕޯޓުތައް ބުނެއެވެ.
އަދި އޭގެ ގާތްގަނޑަކަށް ހަގަޑިއިރެއްހާއިރު ފަހުން މާ ގަދައަށް ބަނޑުގައި ރިއްސާތީ ޑަކްޓަރަށް ދައްކަން ދިޔައެވެ. އެ ވޭނާއި ރިހުމުގައި އެކުއްޖާ އެއްދުވަސް ހޭދަކުރިކަމަށްވެސް ވެއެވެ. އެއަށްފަހު ހޮސްޕިޓަލުގައި ފަރުވާދެމުން ދަނިކޮށް އެކުއްޖާ ނިޔާވެފައިވާކަމަށް ރިޕޯޓުތަކުގައި ބުނެއެވެ. އަދި އެ މަރުގެ ހަގީގަތް ހޯދުމަށް ޑަކްޓަރުންގެ ޓީމަކުން ކުރި މަސައްކަތުން ހާމަވެގެން ދިޔައީ ހަޖަމުގެ ނިޒާމުގައި ގިނަ އަދަދެއްގެ ޖަރާސީމު އަށަގަނެފައިވާކަމެވެ.
އެކުއްޖާ އަށް ފަރުވާ ދެއްވުމުގައި އުޅުއްވި ޑަކްޓަރުންގެ ޓީމާއި ހަވާލާދީ މިސްރުގެ ބައެއް މީޑިއާތަކުގައި ރިޕޯޓުކޮށްފައިވަނީ އެ ކުއްޖާގެ ބަނޑުގައި ކުއްލިގޮތަކަށް އުފެދިފައިވާ ޖަރާސީމުތަކުގެ ސިއްރަކީ އެ ކުއްޖާ، ނުކައްކާ ކޭ ތިން އުރަ ނޫޑުލިސް ކަމަށެވެ.
މިސްރުގެ އެއްވެސް މީޑިއާއަކުން އެއީ ކޮން ބާވަތެއްގެ ނޫޑުލީހެއްކަން ހާމަކޮށްފައި ނުވިނަމަވެސް، ގިނަ ބާވަތްތަކުގެ އިންސްޓެންޓު ނޫޑްލްސްގައި، ރޯކޮށް ހުންނައިރު ޖަރާސީމާއި ކުދި ދިރޭ ތަކެތި އުޅޭކަމަށް ސިއްހަތާ ބެހޭ މަޖައްލާތަކުގައި ޝާއިއުކޮށްފައި އެބަ ހުއްޓެވެ. އަދި އެއްފަހަރާ ގިނަ އަދަދަކަށް ރޯ ނޫޑުލިސް ކެއުމުން، އެ ޖަރާސީމުތައް ހަޖަމުގެ ނިޒާމުގެ މައްޗަށް ގަދަވެގަތުމަކީ އެކަށީގެންވާ ކަމެއް ކަމަށާއި އެ ކުއްޖާއަށް އެ ދިމައިވީ އެފަދަ ކަމެއް ކަމަށްވެސް ލިޔެފައި ވެއެވެ.
ދިވެހިންގެ ތެރޭގައިވެސް ރޯ ނޫޑުލިސް ކެއުމަކީ އާދައެކެވެ. އާއްމު ކަމެކެވެ. ނަމަވެސް މިފަދަ ހާދިސާތައް މިގޮތަށް ހިނގާކަމުން، މިފަދަ ކަންކަމަށް ސަމާލުކަން ދިނުމަކީ މުހިއްމު ކަމެކެވެ. އަދި ރޯފިލުވައިގެން ކާން ތައްޔާރުކޮށްފައި ހުންނަ ތަކެތި، ރަނގަޅަށް ރޯފިލުވައިގެން ކެއުމަށް ސަމާލުކަން ދޭންވާނެއެވެ. މީގެ އިތުރުން ކެއުމަށް ބޭނުންކުރެވޭ ތައްޔާރީ ކާނާތަކަކީ ރަނގަޅު ކޮލިޓީގެ ކާނާއެއްތޯ ކަށަވަރު ކުރުމަކީވެސް މުހިއްމު ކަމެވެ. މިފަދަ ކަންކަމުގައި ކަމާބެހޭ އިދާރާތަކުގެ ޒިންމާވެސް ވަކި ކުޑައެއް ނުވާނެވެ.
މިސްރުގައި ހިނގާދިޔަ މި ހިތާމެވެރި ހާދިސާއަށްފަހު، ގިނަ އަދަދެއްގެ ޑަކްޓަރުން ދަނީ އިންސްޓެންޓު ނޫޑްލްސް، ރޯފިލުވައިގެން ނޫންގޮތަކަށް ބޭނުން ނުކުރުމަށް ނަސޭހަތްތެރިވަމުންނެވެ. ހާއްސަކޮށް ކުޑަކުދިންނަށް މިގޮތަށް ނޫޑުލިސް ނުދިނުމަށްވެސް އިރުޝާދު ވެއެވެ.