ސްޓެލްކޯގެ ކުރީގެ މެނޭޖިންގ ޑިރެކްޓަރު ޙުސައިން ފަހުމީ، ރައީސުލްޖުމްހޫރިއްޔާގެ އޮފީހުގެ ވަޒީރު ފެންވަރުގެ އިސް މަޤާމަކަށް މިއަދު އައްޔަންކުރައްވައިފިއެވެ. ރައީސުލްޖުމްހޫރިއްޔާގެ އޮފީހުން މިއަދު ހާމަކުރެއްވި ގޮތުގައި، ފަހުމީ އައްޔަންކުރައްވާފައިވަނީ ރައީސުލްޖުމްހޫރިއްޔާގެ ސިޔާސަތާއި ވަޢުދުތަކާބެހޭ ޕްރިންސިޕަލް ސެކްރެޓަރީގެ މަޤާމަށެވެ.
މި މަޤާމަށް ފަހުމީ އައްޔަންކުރެއްވީ، 2023 ވަނަ އަހަރުގެ ނޮވެމްބަރުން ފެށިގެން އެމަނިކުފާނު އަދާކުރައްވަމުން ގެންދެވި ސްޓެލްކޯގެ މެނޭޖިންގ ޑިރެކްޓަރުގެ މަޤާމުން ވަކިކުރެއްވުމަށް ފަހުއެވެ. މި މަޤާމަކީ ރައީސުލްޖުމްހޫރިއްޔާގެ ސިޔާސަތުތައް ތަންފީޒުކުރުމަށްޓަކައި މުހިންމު ދައުރެއް އަދާކުރައްވާނެ މަޤާމެކެވެ.
ފަހުމީއަކީ ސްޓެލްކޯގައި 27 އަހަރުގެ ދިގު މުއްދަތަކަށް ޚިދުމަތްކުރައްވައިފައިވާ ތަޖުރިބާކާރު ބޭފުޅެކެވެ. އެމަނިކުފާނުގެ ޚިދުމަތް ފެށިފައިވަނީ އެކައުންޓް އެސިސްޓެންޓް ޓްރެއިނީއެއްގެ ގޮތުގައެވެ. އިނގިރޭސިވިލާތުގައި ކިޔެވުން ފުރިހަމަކުރެއްވުމަށްފަހު، ކުންފުނީގެ މާލީ އަދި ހިންގުމުގެ އެކި މަޤާމުތަކުގައި މަސައްކަތްކުރައްވާފައިވެއެވެ. މި މުއްދަތުގައި ކުންފުނީގެ މާލީ އަދި ހިންގުމުގެ ކުރިއެރުމަށް މުހިންމު ދައުރެއް އަދާކުރައްވާފައިވާކަން ފާހަގަކުރެވެއެވެ.
ސްޓެލްކޯގެ މެނޭޖިންގ ޑިރެކްޓަރުގެ މަޤާމަށް އައު ބޭފުޅަކު އައްޔަންކުރައްވާފައިވަނީ ފަހުމީ އެ މަޤާމުން ވަކިކުރެއްވުމާ ގުޅިގެންނެވެ. މިގޮތުން، މިފްކޯގެ ކުރީގެ ސީއީއޯ އަޙްމަދު ޝަމާޙް ރަޝީދު އިއްޔެ ވަނީ ސްޓެލްކޯގެ އައު މެނޭޖިންގ ޑިރެކްޓަރުގެ ގޮތުގައި އައްޔަންކުރައްވާފައެވެ.