ކޮންމެ އަހަރެއްގެ ސެޕްޓެމްބަރު މަހުގެ 15 ވަނަ ދުވަހަކީ ބައިނަލްއަޤްވާމީ ޑިމޮކްރަސީ ދުވަހެވެ. މި ދުވަހަކީ މިނިވަންކަމާއި، ހަމަހަމަކަމާއި، ބައިވެރިވުމުގެ ރޫހު އާލާކުރުމަށް ފާހަގަކުރެވޭ ދުވަހެކެވެ. އަދި މިއީ ޑިމޮކްރަސީއަކީ އަބަދުމެ ކަށަވަރުކުރެވިފައިވާ އެއްޗެއް ނޫންކަމާއި، އެއަށް ދުވަހުން ދުވަހަށް ރައްކާތެރިވެ، ބާރުވެރިކުރަންޖެހޭކަން ހަނދާންކޮށްދޭ މުހިންމު ދުވަހެކެވެ.
ދިވެހިރާއްޖެއަށް ޑިމޮކްރަސީއަކީ އަލަށް ތަޢާރަފުވި ނަމަވެސް، އެއީ ވަރަށް މުހިންމު އަދި ފާހަގަކޮށްލެވޭ ކާމިޔާބީއެކެވެ. އެތައް ދިގު އަހަރުތަކެއް ވަންދެން އެއް ޕާޓީގެ ވެރިކަމެއް ދެމިގެންދިޔުމަށްފަހު، 2008 ވަނަ އަހަރުގެ ޤާނޫނުއަސާސީން ވަނީ ގިނަ ޕާޓީގެ ސިޔާސީ ނިޒާމާއި، އިތުރު ޙައްޤުތަކާއި، މިނިވަން މުއައްސަސާތައް ތަޢާރަފުކޮށްފައެވެ. މިއީ ރައްޔިތުންނަށް އިތުރު ބާރުވެރިކަމެއް ލިބި، ރަށްރަށުގައި ވާދަވެރި އިންތިޚާބުތައް ބޭއްވުމުގެ މަގު ފަހިވެގެން ދިޔަ މުހިންމު އަދި އެދެވޭ ބަދަލެކެވެ.
ނަމަވެސް، މި ދަތުރުގައި ގޮންޖެހުންތައް ނެތް ކަމަކަށް ނުބުނެވޭނެއެވެ. ބައެއް ފަރާތްތަކުން ފާހަގަކުރާ ގޮތުގައި މުއައްސަސާތަކުގެ މިނިވަންކަމާއި، ނޫސްވެރިކަމުގެ މިނިވަންކަމާއި، ބާރުތައް އެއް ފަރާތަކަށް އެއްވެ ޖަމާވުމާ ގުޅޭގޮތުން ކަންބޮޑުވުންތައް އެބަހުއްޓެވެ. ރައްޔިތުންގެ މިނިވަންކަމާއި، ޝަރުޢީ ދާއިރާގެ ހަމަހަމަކަން ޤާއިމުކުރުމުގައި އިތުރު ކުރިއެރުންތައް ހޯދުމަށް މަސައްކަތްކުރަން ޖެހެއެވެ. އެހެންނަމަވެސް، ދިވެހި ޒުވާނުންނާއި، މަދަނީ ޖަމްޢިއްޔާތަކާއި، ކައުންސިލްތަކުގެ ހީވާގި ބައިވެރިވުމަކީ، އިތުރަށް ހުރިހާ އެންމެންނަށް ހަމަހަމަ ފުރުސަތުތައް ލިބިގެންދާނެ ފަދަ މުސްތަޤުބަލެއްގެ އުންމީދެކެވެ.
މިކަން މުހިންމުވަނީ ކީއްވެގެންތޯއެވެ؟ ކުޑަ ޖަޒީރާ ޤައުމެއްގެ ހައިސިއްޔަތުން މޫސުމަށް އަންނަ ބަދަލުތަކާއި ދުނިޔޭގެ ސަމާލުކަން ލިބިފައިވާ މި ދަނޑިވަޅުގައި، ހަރުދަނާ ޑިމޮކްރަސީއަކުން ހުރިހާ މުޖުތަމަޢުތަކަށް އަޑުއިއްވުމުގެ ފުރުސަތު ލިބި، އެކަން ތަމްސީލުކުރުމުގެ ޤާބިލުކަން އިތުރުވެގެންދެއެވެ. އަދި އޭގެ ސަބަބުން ޤައުމުގެ އެތެރެއާއި ބޭރުގައިވެސް އިތުބާރު ބިނާވެ، ކާރިސާގެ ވަގުތުތަކުގައި ސަރުކާރުގެ ހިންގުންތެރިކަން އިތުރަށް ހަރުދަނާވެގެންދެއެވެ.
މި ޑިމޮކްރަސީ ދުވަހުގައި ދޭންޖެހޭ މެސެޖަކީ ސާފު އަދި ޞަރީޙަ އެއްޗެކެވެ. ޑިމޮކްރަސީއަކީ ހަމައެކަނި ބޭއްވޭ އިންތިޚާބެއް ނޫނެވެ. އެއީ ޚިޔާލު ފާޅުކުރުމުގެ މިނިވަންކަމާއި، ޖަވާބުދާރީވުމާއި، ހަމަހަމަ ޙައްޤުތަކާ ގުޅިލާމެހިފައިވާ ނިޒާމެކެވެ. ދިވެހިރާއްޖެއަށް މިހާރު ކުރިމަތިވެފައިވާ މައިގަނޑު ގޮންޖެހުމަކީ މުއައްސަސާތައް ހަރުދަނާކޮށް ރައްކާތެރިކުރުމާއި، އަސާސީ މިނިވަންކަން ހިމާޔަތްކުރުމާއި، ކޮންމެ ދިވެހި ރައްޔިތެއްގެ އަޑުވެސް އަޑުއިވި، އެ އަޑަށް އިޙްތިރާމްކުރެވޭނެކަން ކަށަވަރުކުރުމެވެ.
ޑިމޮކްރަސީއަކީ ޤައުމަށާއި ރައްޔިތުންނަށް ދެވިފައިވާ ވަޢުދެކެވެ. އެ ވަޢުދު ދިރުވައި، ދެމެހެއްޓުމަށް އެކަށީގެންވާ ވަރުގަދަ އަޒުމަކާއި ކޮމިޓްމަންޓެއް ބޭނުންވެއެވެ. މި ޒިންމާ އުފުލަންޖެހެނީ ހަމައެކަނި ވެރިންގެ ފަރާތުން އެކަންޏެއް ނޫނެވެ. ކޮންމެ ރައްޔިތެއްގެ ފަރާތުންވެސް މި ޒިންމާ އުފުލަންޖެހެއެވެ.
ޑިމޮކްރަސީގެ މަގުގައި ކުރިއަށް ދިއުމަށް، އަޅުގަނޑުމެން އެންމެން އެއްބައިވަންތަކަމާއެކު މަސައްކަތްކުރަންޖެހެއެވެ. މީޑިއާގެ މ މިނިވަންކަން ކަށަވަރުކުރުމާއި، ޝަރުޢީ ދާއިރާގެ މުސްތަޤިއްލުކަން ހިފެހެއްޓުމާއި، ސިޔާސީ ބަހުސްތަކުގައި އިޙްތިރާމާއެކު ބައިވެރިވުމަކީ މުހިންމު ކަންކަމެވެ. އަދި ހަމައެހެންމެ، ކޮރަޕްޝަނާ ދެކޮޅަށް ހިންގޭ މަސައްކަތްތަކާއި، ދައުލަތުގެ ވަސީލަތްތައް ހަމަހަމަކަމާއެކު ބޭނުންކުރުމަކީވެސް ޑިމޮކްރަސީ ހަރުދަނާކުރުމަށް ކޮންމެހެން ބޭނުންވާ ކަންކަމެވެ.
ބައިނަލްއަޤްވާމީ ޑިމޮކްރަސީ ދުވަހުގެ މެ މުނާސަބަތުގައި، އަޅުގަނޑުމެން އެންމެން ޑިމޮކްރަސީގެ އަގު ވަޒަންކޮށް، އޭގެ އަސާސްތައް ހިމާޔަތްކުރުމަށް އަލުން އަޒުމް ކަނޑައަޅަންވީއެވެ. ދިވެހިރާއްޖޭގެ މުސްތަޤުބަލު ބިނާވެގެންދާނީ މިނިވަން، ހަމަހަމަ އަދި ޢަދުލުވެރި މުޖުތަމަޢެއްގެ މައްޗަށެވެ. މިފަދަ މުޖުތަމަޢެއް ޤާއިމުކުރުމަށް މަސައްކަތްކުރުމަކީ އަޅުގަނޑުމެން ކޮންމެ މީހެއްގެވެސް ޒިންމާއެކެވެ.