ފަލަސްތީން ރިލީފް ޗެރިޓީ ކަޕް އިން އެހީގެ ގޮތުގައި ލިބުނު ފައިސާގެ އަދަދު އެއްލައްކައަށް އަށްވުރެ މައްޗަށް އަރައިފިއެވެ. އެންމެ ދެ ދުވަހަށް ކުރިއަށް ގެންދިޔަ މި މުބާރާތުގައި ޖުމުލަ 120 ޓީމަކުން ވަނީ ބައިވެރިވެފައެވެ.
މި މުބާރާތަށް އުރީދޫއިން ވަނީ 30،000 ރުފިޔާގެ ފައިސާގެ އެހީ ދީފައެވެ. މިއާއި އެކު މި މުބާރާތުން ޖުމުލަ އެހީގެ ގޮތުގައި މިހާތަނަށް 112،600 ރުފިޔާ ވަނީ ލިބިފައެވެ. މިއީ މިހާ ކުރުމުއްދަތެއްގައި ލިބުނު ވަރަށްބޮޑު ތަރުހީބެއްކަމަށް މިކަން އިންތިޒާމު ކުރި ފަރާތުން ބުނެއެވެ. މިރޭ 12 ޖެހުމާއި ހަމައަށް އެހީ ފޮނުވުމުގެ އިންތިޒާމު ވަނީ އެފަރާތުން ހަމަޖައްސާފައެވެ. އެގޮތުން އެ ޖަމުއިއްޔާގެ އެކައުންޓުނަންބަރަށް މިހާރުވެސް އެހީ ފޮނުވޭނެއެވެ.
މި މުބާރާތުން ލިބުނު ފައިސާގެ އެހީ މާދަމާގެ ވަގުތެއްގައި އޮންނަ ހަފުލާއެއްގައި އައި.އޭ.ސީ އާއި ހަވާލު ކުރެވޭނެ ކަމަށް އިންތިޒާމުކުރާ ފަރާތުން ބުނެއެވެ.
މި މުބާރާތަށް ގިނަ ޒުވާނުންގެ ތަރުހީބު ވަނީ ލިބިފައެވެ. އަދި އެ ޒުވާނުން ފަލަސްތީނުގެ ރައްޔިތުންނާއި އެކީ ތިބިކަން ވަނީ ހާމަކޮށްދީފައެވެ.