ކާމަރަނގައަކީ ހުތްފޮނި މީރު މޭވާއެކެވެ. ބިލިމަގާއި އެއް އާއިލާއަކަށް ނިސްބަތްވާ ކާމަރަނގައިގެ ދެ ވައްތަރެއް ހުރެއެވެ. ފޮނި ވައްތަރަކާއި ހުތް ވައްތަރެއް ހުންނަ މި މޭވާގައި ތަފާތު ވިޓަމިންތަކާއި މައުދަންތަކުގެ އިތުރުން ހަށިގަނޑަށް ފައިދާ ހުރި އެތައް މާއްދާއެއް އެކުލެވިގެންވެއެވެ. އަނގައަށް މީރު މި މޭވާއަކީ ކާތަކެތީގައި ހިމަނައިގެންނާއި ޖޫސް ގިރައިގެން ނުވަތަ ހުހަށްވެސް ކާލެވިދާނެ މޭވާއެކެވެ.

މި ލިޔުމުގައި ބަލައިލާނީ ޞިއްޙީ އެތައް ފައިދާއަކުން މުއްސަނދިވެފައިވާ ކާމަރަނގައިން ލިބޭ ފައިދާތަކަށެވެ.

* ލޮލުގައި އުފެދޭ ފާރަށް ކާމަރަނގައިން ފަރުވާ ކުރެވެއެވެ.

* ހޫނުވެގެން ޖެހޭ ސްޓްރޯކަށް ފަރުވާގެ ގޮތުގައި ފޮނި ކާމަރަނގަ ބޭނުންކުރެއެވެ.

* ހެނދުނު ހޭލާގޮތަށް ފޮނި ކާމަރަނގައެއް ކާލުމުން ހައިކަން ފިލާނެއެވެ.

* ހަޖަމު ނުވުމާއި، މޭނުބައިކޮށް ހޮނޑުލުން ރަގަޅު ކުރުމަށްވެސް ކާމަރަނގައަކީ ފަރުވާއެކެވެ.

* ވިހެއުމަށްފަހު ގާތުންދޭ ވަރަށް ކިރު ނާރާނަމަ ކާމަރަނގަ ބޭނުންކުރުމުން ކިރު އުފެދޭގޮތްވެއެވެ.

* ހަށިގަނޑުގައި އުފެދޭ ހޫނުގެ މިންވަރު ދަށްކޮށް ހަށިގަނޑު ފިނިކޮށްދެއެވެ.

* ތައިރޮއިޑް ހޯރމޯންގެ މަަސައްކަތް ތަންޒީމުކުރުން، އެގޮތުން ނިދުމާއި ކެއުމުގެ ކަންތައް ތަންޒީމުކުރުމަށް ކާމަރަނގަ ކެއުމަކީ ބޭނުންތެރި ކަމެކެވެ.

* ގުރުދާ އަދި މަސާނާގެ މައްސަލަތަކަށް ފަރުވާކުރުމަށް ބްރެޒިލްގައި ކާމަރަނގަ ބޭނުންކުރެއެވެ.

* ކަރުހިއްކުން ފިލުވުމާއި، ކުޅު ބޭރުވާނެ ގޮތް ހެދުމަށް ޗައިނާގައި ކާމަރަނގަ ބޭނުންކުރެއެވެ.

* ކާމަރަނގައިގެ ތޮށީގައި ހުންނަ "ޓެނިން" ކިޔާ މާއްދާގެ ސަބަބުން ގޮހޮރުގެ މަސައްކަތް ކޮންޓްރޯލްކޮށް، ބޭރަށް ހިންގުމަށް ފަރުވާކުރުމުގައި ބޭނުންކުރެއެވެ.