ދުނިޔޭގެ މަޝްހޫރު ރިއަލިޓީ ޓީވީ ސްޓާރު އަދި ވިޔަފާރިވެރިޔާ ކިމް ކާޑޭޝިއަން، އޭނާގެ ސިކުނޑީގައި "އެނޫރިޒަމެއް" ހުރިކަން ހާމަކޮށްފިއެވެ. މިކަން ހާމަކޮށްފައިވަނީ "ދި ކާޑޭޝިއަންސް" ސީޒަން 7 ގެ ފުރަތަމަ އެޕިސޯޑު "ފީލްސް ލައިކް ދި އޯލްޑް ޑޭސް" ގެ ޕްރިމިއަރގައެވެ.
މި އެޕިސޯޑުގެ ކްލިޕަކުން ފެނިގެންދަނީ ކިމް ކާޑޭޝިއަން ސިކުނޑީގެ ސްކޭން ހަދަމުންދާ މަންޒަރެވެ. ސްކޭންގެ ތެރެއިން ސިކުނޑީގައި ފުއްޕާފައިވާ ތަންކޮޅެއް ފެނުމުން، އޭނާ ބުނެފައިވަނީ "އެތަނުގައި ކުޑަ އެނޫރިޒަމެއް އެބަހުރި" މިހެންނެވެ. މި މަންޒަރުގައި ކިމްގެ ސިކުނޑީގެ ސްކޭންތައް މޮނިޓަރެއްގައި ގާތުން ދައްކާފައިވެއެވެ.
ބްރެއިން އެނޫރިޒަމަކީ ސިކުނޑީގައިވާ ލޭ ހޮޅިއެއް ބަލިކަށިވެ ފުއްޕުމެވެ. ގިނަ އެނޫރިޒަމްތައް ކުޑަކޮށް ހުންނައިރު، ވަގުތުން ސިއްހީ މައްސަލަތަކެއް ދިމައެއް ނުވެއެވެ. ނަމަވެސް، އެނޫރިޒަމެއް ފަޅައިގެންގޮއްދިނަމަ ސިކުނޑިއަށް ލޭއެޅި ނުވަތަ ހެމޮރެޖިކް ސްޓްރޯކެއް ޖެހިދާނެއެވެ. މިއީ ސިއްހީ ގޮތުން ނުރައްކާތެރި ހާލަތެކެވެ.
ކިމްގެ ކޮއްކޮ ކޯޓްނީ ކާޑޭޝިއަން ބާކަރ މިކަން އެނގުމުން ހައިރާންކަން ފާޅުކޮށްފައިވަނީ "ވޯހ!" މިހެން ބުނެއެވެ. މިކަމާ ގުޅޭގޮތުން ކިމް ބުނެފައިވަނީ، ޑޮކްޓަރުން އޭނާގެ މި ހާލަތުގެ ސަބަބު ކަމަށް ބުނެފައިވަނީ ސްޓްރެސް ކަމަށެވެ. އަދި ފާއިތުވި ހަފްތާ އޭނާގެ ހަޔާތަށް ޖިސްމާނީ ގޮތުންނާއި ނަފްސާނީގޮތުން ދަތި ހަފްތާއެއް ކަމަށްވެސް އޭނާ ފާހަގަކޮށްފައިވެއެވެ.
މިހާތަނަށް ކިމް ކާޑޭޝިއަންއަށް މިބަލީގެ އެއްވެސް އަލާމާތެއް ފެނިފައިވޭތޯ ނުވަތަ ފަރުވާ ދެވޭނެ ގޮތަކާ ބެހޭގޮތުން އެއްވެސް މައުލޫމާތެއް ހާމައެއްނުވެއެވެ. އޭނާގެ އޭޖެންޓުންނާއި، ޕަބްލިކް ރިލޭޝަންސް ޓީމުންނާއި، ގާނޫނީ ވަކީލުންގެ ފަރާތުން ރަސްމީ ބަޔާނެއް ނެރެފައެއް ނުވެއެވެ. ކިމް ކާޑޭޝިއަންއަކީ ޓީވީ ކެރިއަރާއި، ސޯޝަލް މީޑިއާގެ ނުފޫޒާއި، ކޮސްމެޓިކްސް ލައިންތަކާއި ޝޭޕްވެއަރ ބްރޭންޑްތައް ފަދަ ކާމިޔާބު ވިޔަފާރިތަކުން ބޮޑު މުއްސަނދިކަމެއް ހޯދާފައިވާ މީހެކެވެ.