މިއަހަރަކީ އޮލިމްޕަސް ސިނަމާ އަށާއި ދިވެހި ފިލްމް އިންޑަސްޓްރީއަށް ކާމިޔާބު އަހަރެކެވެ. އެކި ޕްރޮޑަކްޝަން ހައުސްތަކުން ގިނަ ފިލްމްތަކެއް ބެލުންތެރިންނާއި ހަމަޔަށް ދޫކޮށްލި އަހަރެއްގެ ގޮތުގައި މި އަހަރު ވެފައިވާއިރު، މި ފެށޭ ނޮވެމްބަރ 5 ވަނަ ދުވަސް ވެގެން ދާނީ އޮލިމްޕަސް ސިނަމާގެ ރަހަތަފާތު ކޮށްލާ ދުވަހަކަށެވެ. އަދި މިއަހަރު އެޅުވޭ އެންމެ ބޮޑު ރޮމޮކޮމް ފިލްމް "ކޮސް ގިނަ މިސްޓޭކް" ބެލުންތެރިންނާއި ހަމަޔަށް ދޫކޮށްލާނެ ދުވަހަށެވެ.
މި ފިލްމަކީ ގިނަ ބައެއް އިންތިޒާރު ކުރަމުން އަންނަ ބޮޑު ފިލްމެއްކަން މީސްމީޑިއާގެ އެކި މަންސަތަކުން ބެލުންތެރިން ފާޅުކޮށްފައިވާ ޝުއޫރު ތަކުން ފެނިގެން ދެއެވެ.
ސެޓާން ސްޓޫޑިއޯ އާއި ޝައި ޕްރޮޑަކަޝަން ގުޅިގެން އުފައްދާފައިވާ ކޮމެޑީ ފިލްމް "ކޮސް ގިނަ މިސްޓޭކް" (ކޭޖީއެމް) ގެ ޓިކެޓް މިހާރު ވަރަށް ބާރަށް ވިކެމުންދާއިރު، މި ފިލްމް ވެގެންދާނީ މިއަހަރު އޮލިމްޕަސް ސިނެމާގައި އަލަށް އެޅުވިގެންދާނެ ރޮމްކޮމް ހަމައެކަނި ފިލްމަށެވެ. އަދި މި ފަހުގެ ތާރީޚެއްގައި އެންމެ ގިނަ އަދި އެންމެ މަޝްހޫރު ތަރިން ފެނިގެންދާނެ ފިލްމަށް ވެސް މިފިލްމް ވެގެންދާނެއެވެ.
ދިވެހި ފިލްމީ ދުނިޔޭގައި ކޮމެޑީ ޖޯންރާގެ ފިލްމްތައް އުފެއްދުމުގެ އެންމެ ކާމިޔާބު ޕްރޮޑަކްޝަން ހައުސްގެ ގޮތުގައި ފާހަގަ ކޮށްލެވޭ ޝައި ޕްރޮޑަކްޝަންގެ ފިލްމްތަކުގެ ތެރޭގައި ހިމެނޭ ނޯޓީފޯޓީ އާއި ފޯޓީ ޕްލަސް ފަދަ ހިޓް ފިލްމްތަކަށް ފަހު މިފިލްމްވެސް ވެގެންދާނީ ބެލުންތެރިން ކޮސްކޮށްލާ ހެއްވާލާނެ ވަރުގެ ފިލްމަކަށް ކަމަށް ޝައި ޕްރޮޑަކްޝަންގެ ވެރިޔާ އަދި މި ފިލްމްގެ ޕޮރޮޑިއުސަރ އިސްމާއިލް ޝަފީޤުވަނީ ބުނެފައެވެ.
މީގެ އިތުރުން މިފިލްމް އުފައްދާ ސެޓާން ސްޓޫޑިއޯ އަކީ މިހާރު ރާއްޖޭގައި އެންމެ މަގުބޫލު ޕްރޮޑަކްޝަން ހައުސްގެ އިތުރުން، މިދިޔަ އަހަރުގެ އެންމެ ކާމިޔާބު ފިލްމް "ކަމަނާ" އާއި، މި އަހަރުގެ މިހާތަނަށް އެޅުވުނު އެންމެ ކާމިޔާބު ފިލްމް "ކަނބުލޮ" ފަދަ ފިލްމް އުފައްދާ، ބެލުންތެރިންގެ އިތުބާރު ހޯދާފައިވާ ޕްރޮޑަކްޝަން ހައުސްއެކެވެ. މި ދެ ސްޓޫޑިއޯ ގުޅިގެން މީގެ ކުރިންވެސް ފިލްމްތަކެއް ވަނީ ބެލުންތެރިންނާއި ހަމަޔަށް ގެނެސްދީފައެވެ.
މި ފިލްމް އޮލިމްޕަސް ސިނަމާގައި ދެއްކުމަށް ހަމަޖެހިފައިވަނީ ނޮވެމްބަރ 19ގެ ނިޔަލަށެވެ. އެގޮތުން މިހާރު މި ފިލްމް ޓިކެޓް އޮލިމްޕަސް ޓިކެޓް ކައުންޓަރުން ވިކެމުން ދާއިރު، 7743399 އަށް ވައިބަރ މެދުވެރިކޮށްވެސް ޓިކެޓް ބައްލަވައިގަތުމަށް ފިލްމްގެ ޕްރޮޑަކްޝަން ހައުސްއިން ވަނީ ބުނެފައެވެ.
މީގެ އިތުރުން ރާއްޖޭގެ އެކި ރަށްރަށުގައި އާއި، ރިސޯޓް ތަކުގައި މިފިލްމް ސްކްރީން ކުރުމަށް ބޭނުންވާ ފަރާތްތަކުން 7779621 / 9111164 އަށް ވައިބަރ މެދުވެރިކޮށް މެސެޖް ކުރެއްވުމަށްވެސް ޕްރޮޑަކްޝަން ހައުސްއިން ވަނީ ބުނެފައެވެ.
ޔޫސުފް ޝަފީޢު (ޔޫއްޕެ)ގެ ވާހަކައަކަށް އުފައްދާ މި ފިލްމްގެ ޑައިރެކްޓަރަކީ މަޝްހޫރު އެކްޓަރ އަދި ޑައިރެކްޓަރ ޢަލީ ސީޒަންއެވެ. މިފިލްމް ޝޫޓް ކޮށްފައިވަނީ މިއަހަރު ކުރީކޮޅު މ.މުލަކުގައެވެ.
މި ފިލްމަކީ ރާއްޖޭގެ މަޝްހޫރު ގިނަ ތަރިން އެއް ފިލްމަކުން ފެނިގެންދާނެ ފިލްމެކެވެ. އެގޮތުން ފިލްމުގެ ހުރިހާ ތަރިންގެ ރޯލުވެސް އެއްވަރަކަށް ފެނިގެންދާއިރު ތަރިންގެ ތެރޭގައި ޔޫސުފް ޝަފީޢު (ޔޫއްޕެ)، ޢަލީ ސީޒަން، އާމިނަތު ރިޝްފާ، މަރިޔަމް ޢައްޒަ، އަހްމަދު ނިމާލް، ޢަލީ ޢާޒިމް (ދޮން އައްޔަ)، ޖުމައްޔިލް ނިމާލް، ފުބޫ، ޝިފާ، ޑޯރާ، އަމަން ގެ އިތުރުން ޝާއްކޮ އަންމަޑޭ އާއި ގުލިސްތާނު އަދި ހާމިދު ފަދަ ކުޅަދާނަ ފަންނާނުން ހިމެނެއެވެ. މި ފިލްމްގެ ކެމެރާމަނަކީ ތަޖުރިބާކާރު އަދި ރާއްޖޭގައި އެފަދަ ދެވަނައެއް ނުވާ ކެމެރާމަން، އިބްރާހިމް ވިސާން (ކަނޑި) އެވެ. އަދި ފިލްމްގެ ޕޯސްޓް ޕްރޮޑަކްޝަން މަސައްކަތް ކޮށްފައިވަނީ އަބްދުﷲ މުއާޒް ޕްރޮޑަކްޝަން އާއި، ބްލެކް މީޑިއާގެ އިތުރުން ޔޫއްޕެ ޕްރޮޑަކްޝަން އިންނެވެ.
މުހައްމަދު އަބްދު ޣަނީ (ތޭރަ) ހަދާފައިވާ ޅެންތަކަށް މި ފިލްމްގެ ލަވަތައް ކިޔާފައިވަނީ މުހައްމަދު އަބްދު ޣަނީ (ތޭރަ)، މަރިޔަމް އަޝްފާ، އާއި ޖަލާލްގެ އިތުރުން ފުބޫއެވެ.
އިސްމާއިލް ޝަފީގް ޕްރޮޑިއުސް ކުރާ މި ފިލްމުގެ އެގްޒެކެޓިވް ޕްރޮޑިއުސަރަކީ އަލީ ޝާނިޒް މުހައްމަދުއެވެ.