އިސްތަށި ފޭބުމަކީ ހަމައެކަނި "ޖީންސް"ގެ ސަބަބުން ދިމާވާ ކަމެއް ނޫނެވެ. ބައެއް ފަހަރު އެއީ އަހަރެމެންގެ ދިރިއުޅުމުގެ އާދަތަކުގެ ނަތީޖާއެކެވެ. މޭޔޯ ކްލިނިކްގެ ދިރާސާތަކުން ދައްކާ ގޮތުގައި ދިގުދެމިގެންދާ ސްޓްރެސްގެ ސަބަބުން 'ޓެލޮގެން އެފްލޫވިއަމް' ކިޔާ ހާލަތެއް މެދުވެރިވެ، އިސްތަށިގަނޑުގެ ބުޑުތައް އުފެދުން ހުއްޓި، އިސްތަށި ފޭބުން އިތުރުވެއެވެ. މީގެ އިތުރުން ނިދި ނުލިބުން، ރަނގަޅަށް ނުކެއުން ، އަދި ގިނައިރު ކަންކަމާ ވިސްނުން ފަދަ ކަންކަމުގެ ސަބަބުން ހަށިގަނޑަށް ބާރުބޮޑުވެ، އެކަމުގެ އަސަރު އިސްތަށިގަނޑު ތުނިވުމުގެ ސިފައިގައި ފެންނަން ފަށައެވެ.
ސައިންސުން ދައްކާ ގޮތުގައި ސިއްޙަތަށް ފައިދާހުރި ކާނާއަކީ އިސްތަށިގަނޑު ހެދި ބޮޑުވުމަށް މުހިންމު ދައުރެއް އަދާކުރާ އެއްޗެކެވެ. ޕަބްމެޑް ސެންޓްރަލްގައި ޝާއިޢުކޮށްފައިވާ ދިރާސާތަކުން ފާހަގަކުރާ ގޮތުގައި ދަގަނޑު، ވިޓަމިން ޑީ، ޒިންކް، އަދި ޕްރޮޓީން ފަދަ މާއްދާތައް ހަށިގަނޑުގައި މަދުވުމަކީ އިސްތަށިގަނޑުގެ ބުޑުތައް ބަލިކޮށް، އަލުން އުފެދުން ލަސްކުރުވާ ކަމެކެވެ. މީގެ އިތުރުން ބަރުދަން ލުއިކުރުމަށް އެކުލަވާލެވޭ ހަރުކަށި ކާނާގެ ޕްލޭންތައް، ބަނގުރާ ބުއިން، އަދި ދުންފަތުގެ އިސްތިޢުމާލު ކުރުމަކީ ބޮލުގެ ނާށިގަނޑަށް ލޭދައުރުވުން ހަނިކޮށް، އިސްތަށިގަނޑަށް ބޭނުންވާ އޮކްސިޖަންއާއި ކާނާގެ މާއްދާތައް ނުލިބި، އިސްތަށިގަނޑު ބަލިކުރުވާ ކަމެކެވެ. ވަރަށް ކުދިކުދި އާދަތައް ކަމަށްވާ، އިސްތަށިގަނޑު ވަރަށް ބާރަށް އެއްސުން ، ބާރުގަދަ ކެމިކަލްތައް ބޭނުންކުރުން، ނުވަތަ އިސްތަށިގަނޑު ގިނައިން ދޮވުން ފަދަ ކަންކަމުގެ ސަބަބުން އިސްތަށިގަނޑަށް ބާރުބޮޑުވެ، އިސްތަށިގަނޑު ބުރިވެ، ފޭބުން މެދުވެރިވެއެވެ.
ނަމަވެސް އުފާވެރި ޚަބަރަކީ، މިފަދަ އާދަތަކަށް ބަދަލު ގެނެވޭނެ ކަމެވެ. މިންހެޔޮ ކާނާގެ އުސޫލުތައް ބޭނުންކުރުން، ގަވާއިދުން ނިދުން، އަދި ސްޓްރެސް ކޮންޓްރޯލް ކުރުމަކީ ބޮލުގެ ނާށިގަނޑުގެ ގުދުރަތީ ރިދަމް އަނބުރާ ލިއްބައިދޭ ކަމެއްކަން ވަނީ ސާބިތުވެފައެވެ. ކެފެއިންއާއި ބަނގުރާ ބޭނުންކުރުން ފަދަ ކަންކަމުން ދުރުވެ ، ދުންފަތުގެ އިސްތިޢުމާލު ކުރުން ހުއްޓާލުމަކީ މުހިންމު ކަމެކެވެ. އަދި އިސްތަށިގަނޑަށް "ނޭވާލާނެ" ޖާގަ ދިނުމަކީ ވެސް މުހިންމު ކަމެކެވެ. މާހިރުން ހަނދާންކޮށްދޭ ގޮތުގައި، ސިއްޙަތަށް ފައިދާހުރި އިސްތަށިގަނޑެއް ލިބުމަށްޓަކައި އެކަމަށް މަސައްކަތްކުރަން ފަށަނީ ޝެމްޕޫ ފުޅިއާ ހަމައަށް އައުމުގެ ކުރިންނެވެ؛ އެއީ ދިރިއުޅުމުގެ ހަމަހަމަ ގޮތްތައް ބޭނުންކޮށްގެންނެވެ.