އުރީދޫ މޯލްޑިވްސްގެ އެކްޓިން ޗީފް ކޮމާޝަލް އޮފިސަރު (ސީސީއޯ) ގެ މަގާމަށް ހުންނެވި ހުސެއިން ނިޔާޒު އެ ކުންފުނީގެ ސީސީއޯގެ މަގާމަށް ދާއިމީކޮށް ހަމަޖައްސައިފި އެވެ.
ހުސެން ނިޔާޒަކީ އެކުންފުނީގައި ވޭތުވެ ދިޔަ 16 އަހަރު މަސައްކަތް ކުރެއްވި މުވައްޒަފަކެވެ. އޭނާ އެންމެ ފުރަތަމަ އަދާކުރެއްވި ވަޒީފާއަކީ އާރްއެންއީ ޓެކްނީޝަނެއްގެ ވަޒީފާ އެވެ. އޭގެފަހުން އެކުންފުނީގެ މެނޭޖްމަންޓް ފެންވަރުގެ ގިނަ ވަޒީފާތަކެއް އޭނާ ވަނީ އަދާކުރައްވާފައެވެ. އޭގެ ތެރޭގައި އުރީދޫގެ ނެޓްވޯކް ޕްލޭނިން އެންޑް އޮޕްޓިމައިޒޭޝަން މެނޭޖަރުގެ މަގާމާއި ހެޑް އޮފް ނެޓްވޯކްސް އާއި ހެޑް އޮފް ސޭލްސް އެންޑް ޑިސްޓްރިބިއުޝަންގެ މަގާމުވެސް އޭނާ ވަނީ އަދާކޮށްފައެވެ.
އުރީދޫ މޯލްޑިވްސްއިން ބުނީ ދިވެހި މުވައްޒަފުން ބިނާކޮށް، ކުންފުނީގެ އިސްމަގާމުތަކުން ދިވެހިންނަށް ފުރުސަތުތައް ފަހިކޮށް ދިނުމަށް ހާއްސަ އަހައްމިއްޔަތުކަމެއް ދޭ ކަމަށެވެ. އަދި މި މަގާމަށް ނިޔާޒު ފަދަ ދިވެއްސަކު އައްޔަންކުރުމަކީ އުރީދޫއަށް މި ލިބުނު ވަރަށްބޮޑު ކުރިއެރުމެއްކަމަށްވެސް އެ ކުންފުނިން ބުނެފައިވެއެވެ.
މީޑިއާތަކާއި ހިއްސާކުރެއްވި މެސެޖެއްގައި އުރީދޫ މޯލްޑިވްސްގެ މެނޭޖިން ޑިރެކްޓަރު އަދި ޗީފް ފައިނޭންޝަލް އޮފިސަރު، ނަޖީބް ހާން ވަނީ ނިޔާޒަށް މަރުހަބާ ވިދާޅުވެފައެވެ. އަދި ކުންފުނީގެ ކުރިއެރުވުމަށް ނިޔާޒް ކޮށްދެއްވި ބުރަ މަސައްކަތްތަކަށް ޝުކުރުއަދާކުރެއްވި އެވެ.