އޮސްޓްރިއާގައި ވަނީ އާޓް، އިންޖިނިއަރިން، އަދި ގުދުރަތީ މާހައުލާ ގުޅުވައިލާފަދަ އާދަޔާޚިލާފު މަޝްރޫޢެއް ފަށާފައެވެ. "ދި އޮސްޓްރިއަން ޕަވަރ ޖަޔަންޓްސް" ގެ ނަމުގައި ކުރިއަށްގެންދާ މި މަޝްރޫޢުގެ ދަށުން، ކަރަންޓު ފޯރުކޮށްދޭ ބޮޑެތި ކޮޅުތައް މިހާރު ހަދަމުންދަނީ ބޮޑެތި ޖަނަވާރުތަކާއި ދޫނިތަކުގެ ބައްޓަމަށެވެ. މީގެ މަޤްސަދަކީ ކަރަންޓު ފޯރުކޮށްދިނުމުގެ އުމްރާނީ ތަރައްޤީ ގުދުރަތީ ރީތިކަމާ ގުޅުވައި، ދިރާސާތަކަށް ފަސޭހަކޮށްދިނުމެވެ.
މި މަޝްރޫޢުގެ ދަށުން ފުރަތަމަ ފަހަރަށް ތައްޔާރުކުރެވުނު ތަކެތީގެ ތެރޭގައި ބޮޑު "ސްޓޯކް" ދޫންޏެއްގެ ބައްޓަމާއި "ސްޓޭގް" ފުއްލާއެއް ހިމެނެއެވެ. "ސްޓޯކް" ދޫނީގެ ބައްޓަން ރަމްޒުކޮށްދެނީ ބާޖަންލޭންޑް ސަރަހައްދަށް ކޮންމެ އަހަރަކު ހިޖުރަކުރާ ދޫނިތަކަށެވެ. "ސްޓޭގް" ފުއްލާގެ ބައްޓަން ރަމްޒުކޮށްދެނީ ލޯވަރ އޮސްޓްރިއާގެ ގަސްގަހާގެހި ގިނަ ރީތިފެހި ޖަންގަލިތަކެވެ. މި މަޝްރޫޢު ކުރިއަށްގެންދަނީ އޮސްޓްރިއާގެ ކަރަންޓު ވިއުގަ އޮޕަރޭޓަރު (އޭޕީޖީ) އާއި ޑިޒައިން ފަރމް މޭސަލް އާކިޓެކްޓްސް ގުޅިގެންނެވެ.
މިހާރު މި ކަރަންޓު ނަރުގެ ކޮޅުތައް ވަނީ ޓެސްޓު ކުރުމުގެ މަރުހަލާގައެވެ. ކޮޅުތަކުގެ ރައްކާތެރިކަން ކަށަވަރުކުރުމަށް ޓެސްޓުތައް ދަނީހަދަމުންނެވެ. މި މަޝްރޫޢުގެ ބޭނުމަކީ ހަމައެކަނި ކަރަންޓު ފޯރުކޮށްދިނުން ނޫންކަން، އޭޕީޖީން ވަނީ ހާމަކޮށްފައެވެ. އެކުންފުނިން ބުނީ، މީގެ މަޤްސަދަކީ ކޮންމެ ދުވަހެއްގެ އުމްރާނީ ތަރައްޤީއަށް އާޓާއި ރީތިކަން ގެނެސްދިނުން ކަމަށެވެ. މި އާދަޔާޚިލާފު ކަރަންޓު ކޮޅުތަކަށް ޑިޒައިން ދުނިޔޭގެ ސަމާލުކަން ވަނީ ލިބިފައެވެ. މި ކޮޅުތަކުގެ މޮޑެލްތައް 2026 ވަނަ އަހަރުގެ އޮކްޓޯބަރު މަހާ ހަމައަށް ސިންގަޕޫރުގެ މަޝްހޫރު ރެޑް ޑޮޓް މިއުޒިއަމްގައި ދައްކާލެވޭނެއެވެ. މީގެ އިތުރުން މި މަޝްރޫޢަށް ވަނީ 2025 ވަނަ އަހަރުގެ ރެޑް ޑޮޓް ޑިޒައިން އެވޯޑު، ކަރަންޓު ފޯރުކޮށްދިނުމާއި ކާބަން ބޭރުކުރުން ހުއްޓުވުމުގެ ކެޓަގަރީން ލިބިފައެވެ.
މި މަޝްރޫޢުގެ މައިގަނޑު މަޤްސަދަކީ ކަރަންޓު ފޯރުކޮށްދޭ ލައިންތައް ގުދުރަތީ މާހައުލާ ފަސޭހަކަމާއެކު ގުޅުވައިލައި، ފަތުރުވެރިކަން އިތުރުކޮށް، އާ ހަކަތައިގެ މަޝްރޫޢުތަކަށް އާންމުންގެ ތާއީދު އިތުރުކުރުމެވެ. އޮސްޓްރިއާ ޕަވަރ ގްރިޑުން ބުނީ، މި ގުދުރަތީ ޑިޒައިންގެ ސަބަބުން ތިމާވެއްޓާ ރަހުމަތްތެރި އުމްރާނީ ތަރައްޤީއެއް ރަމްޒުކޮށްދިނުމުގެ އިތުރުން، ސަރަހައްދީ އިގްތިސާދު ވަރުގަދަވެ، ފަތުރުވެރިކަން އިތުރުވާނެ ކަމަށެވެ.
މި މަޝްރޫޢުގެ ދެވަނަ މަރުހަލާގައި، އޮސްޓްރިއާގެ ނުވަ ސްޓޭޓުގެ (ބާޖަންލޭންޑް، ކެރިންތިއާ، ލޯވަރ އަދި އަޕަރ އޮސްޓްރިއާ، ސާލްޒްބާގް، ސްޓައިރިއާ، ޓައިރޯލް، ވޯރާލްބާގް، އަދި ވިއެނާ) ސަގާފަތާއި ގުދުރަތީ ވަންތަކަން ރަމްޒުކޮށްދޭ ތަފާތު ޖަނަވާރުތަކުގެ ޑިޒައިންތައް ތައްޔާރުކުރުމަށް ވަނީ ރާވާފައެވެ. އުއްމީދަކީ މި "ޖަނަވާރު ބައްޓަމުގެ ކޮޅުތައް" ހަމައެކަނި ކަރަންޓު ފޯރުކޮށްދޭ ބިނާތަކަށް ވުމުގެ ބަދަލުގައި، އޮސްޓްރިއާގެ ފާހަގަކުރެވޭ ބިނާތަކަކަށް ވެ، ފަތުރުވެރިންގެ މެދުގައި މަގްބޫލު ތަނަކަށް ވުމެވެ.