އިނގިރޭސި ޕްރިމިއަރ ލީގުގެ ޗެމްޕިއަންކަން މި ސީޒަނުގައި މެންޗެސްޓަރ ޔުނައިޓެޑަށް ލިބެން ނެތްކަމުގައި އެ ޓީމުގެ ލެޖެންޑް ކްރިސްޓިއާނޯ ރޮނާލްޑޯ ބުނެފިއެވެ.
ރޮނާލްޑޯ މިމޭރުމުން ބުނެފައިވަނީ ޕިއަސް މޯރގަންގެ އިންޓަވިއުއެއްގައި ވާހަކަދައްކަމުންނެވެ. ރޮނާލްޑޯ އިތުރަށް ބުނި ގޮތުގައި މި ސީޒަނުގައި އާސެނަލްއަށް ތަށިލިބުން ކައިރިކަމަށާއި، އެހެންނަމަވެސް ޔަޤީންކަމާއެކު މެންޗެސްޓަރ ޔުނައިޓެޑަށް ތަށި ނުލިބޭނެކަމަށެވެ. އެއީ އެ ޓީމުގެ ހާލަތު ރަނގަޅުނޫންވީމައާއި އެ ޓީމުގެ ބައެއްކުޅުންތެރިންނަށް ޔުނައިޓެޑަކީ ކޮންކަހަލަ ކުލަބެއްކަންވެސް އަންދާޒާ ނުކުރެވޭތީކަމަށެވެ. އަދި އިނގިރޭސި ޕްރިމިއަރ ލީގަކީ ވާދަވެރި ލީގަކަށްވީނަމަވެސް، ޔުނައިޓެޑަށް ތަށި ލިބުންވާނީ "މިރެކަލް"އަކަށް ކަމަށްވެސް ބުނެފައިވެއެވެ.
އިއްޔެ ޔޫޓިއުބަށް ދޫކޮށްލި މި އިންޓަވިއުގައި ރޮނާލްޑޯގެ ވަރަށް ގިނަ އަމިއްލަ ޒާތީ ވާހަކަތައްވެސް ހިއްސާކޮށްފައިވެއެވެ. އެގޮތުން ގެންގުޅޭ އެކި ޒާތްޒާތުގެ ކާރުތަކުގެ ވާހަކައާއި، މުއްސަނދި ދިރިއުޅުމުގެ ވާހަކަ ކިޔައިދީފައިވެއެވެ. މީގެ ކުރިންވެސް، މޯރގަންގެ އިންޓަވިއުއެއްގައި ޔުނައިޓެޑާ ގުޅޭ ވާހަކަތަކެއް ދެއްކުމުން އާންމުން، ޚާއްސަކޮށް ޔުނައިޓެޑުގެ ސަޕޯޓަރުންވަނީ ރޮނާލްޑޯއަށް ފާޑުކިޔާފައެވެ. އެ އިންޓަވިއުގައި ޔުނައިޓެޑުގެ ހާލަތު ވަރަށް ތިލަކޮށް ކިޔައިދީ، ކުލަބުގެ ވެރިންނަށް ވަރަށްބޮޑަށް ފާޑުކިޔާފައިވެއެވެ.
ޕޯޗުގަލްގެ ތަރި ރޮނާލްޑޯ ފުޓްބޯޅަ ކެރިއަރ ފަށާފައިވަނީ އެ ގައުމުގެ ސްޕޯޓިން ކުލަބުންނެވެ. އަދި 2003 ވަނަ އަހަރު މެންޗެސްޓަރ ޔުނައިޓެޑަށް ބަދަލުވެ، ޔުނައިޓެޑާއެކު ގިނަ ކާމިޔާބީތަކެއް ހާސިލުކޮށް ރެއާލްއަށް 2009 ވަނަ އަހަރު ބަދަލުވިއެވެ. އޭގެ ފަހުން 2021 ވަނަ އަހަރު އަލުން ޔުނައިޓެޑާ ގުޅުނު ނަމަވެސް، އެ ސީޒަނުގައި ރަނގަޅު ކާމިޔާބެއް ޔުނައިޓެޑާއެކު ހޯދިފައެއްނުވެއެވެ.