ދުނިޔޭގެ ކެހިވެރިކަމަކީ އަބަދު އިންސާނާގެ ފަހަތުން މުގޯލި އަޅަމުން ދުވާ އެއްޗެއްނޫނެވެ. ކެއްސެއް ލިބިއްޖެ އިންސާނެއްގެ ކިބައިން އެހެން އިންސާނުނަށް ކެހި ދިނުމަކީވެސް މި ދުނިޔޭގައި ތަރުތީބުވެ ހިނގާ އުސޫލެކެވެ. އިންސާނާގެ މި ނުފުރޭ ހިތަށް ކުޑަނަމަވެސް އުނިކަމެއް އައުމަކަށް މި އިންސާނާ ނޭދޭނެއެވެ. އަބަދުވެސް އުފަލާ އަރާމުގައި ހުރުމަށް ހިތް އެދެއެވެ. 

އަދުގެ މި ދުނިޔޭގައި ހިނގާ ބައެއް ކަންކަމުން، ބައެއް އިންސާނުންގެ ކުށެއް ދުވަހަކުވެސް ނުފެނެއެވެ. އަޑުގަދަ މީހާ، އޭނާގެ ދުލުން ބުނެލާ ކޮންމެ ބަހެއް ބީރު މީހުންގެ ކަންފަތްތަކުގައިވެސް ގުގުމާލަނީ އެހާމެ ބާރަށެވެ. އަޑެއް ލައްވާލާނޭ ހިތްވަރެއް ނެތް ނިކަމެއްޗާގެ އަބުރު ވެއްޔާ މޮޑެލެވެނީ އަޑުގަދަ މީހާގެ ބާރުގަދަ އަޑުންނެވެ.

އިންސާނާ އޭނާގެ ހަޔާތުގައި ކަންކަން ވެގެން ދިއުމަށް އެދެނީ އެއިންސާނަކު ބޭނުން ވާ ގޮތަށެވެ. އެއީ ކޮންމެ ކަމެއް ކަމުގައި ވީނަމަވެސް މެއެވެ. އަދި ކޮންމެ ގޮތަކުން ނަމަވެސް އެ އިންސާނަކު އެދޭ ގޮތަކަން ކަންވަންޏާ ރުހިގެން ހުރެވެއެވެ. ނަމަވެސް ހިތާމައަކީ އެ އިންސާނާގެ އެދުމާ ހިލާފަށް ނުވަތަ އެ އިންސާނާގެ ހިތަށް ބުރަކަމެއް ދީފި ކަމެއް، ކިއެއްތަ ކިތަންމެ ކުޑަ ކަމެއް ކަމުގައި ވީނަމަވެސް އެ ކަމެއްވާން އެ އިންސާނާ ނޭދޭކަމެވެ. އަދި ހިނގި ކަމަކުން އަނެކާ ބަދުނާމުކޮށް ފަލީހަތް ކުރުމަކީ ބައެއްމީހުންގެ މިޒާޖުގައި ހުންނަކަމެކެވެ. މީސްމީޑިޔާގައި ބާރުގަދަ މީހާ މިފަދައިން ދޫކޮށްލައިފި ކޮންމެ ހަބަރަކީ އޭގައި ގިނަބަޔަކު ޖެހިގެންދާ ހަބަރުތަކެވެ. ނަމަވެސް ދިފާއުގައި ބަހެއް ބުނުމަށް ހުރި އިންސާނާގެ އަތުގައި މީސްމީޑިޔާގެ ބާރެއް ނެތުމުން މިއަދު މިޖެހެނީ ބަދުނާމާއި ފަލީހަތާއި ކުރިމަތިލާށެވެ. ނަފްސުގެ ދިފާއުގައި ބަހެއް ކިއުމުގެ ކުޅަދާނަކަމެއް އެފަކީރަށް ލިބިގެނެއް ނުވެއެވެ. މިއީ އަދުގެ ދުނިޔެ ދެކެމުން އަންނަ ވަރަށް ނާތަހުޒީބީ ހަރަކާތެކެވެ.

މިދުވަސްކޮޅަކީ މިފަދަ އެތައް ހަބަރެއް މީސްމީޑިޔާގައި ފެތުރެމުންދާ ދުވަސްވަރެކެވެ. ހާއްސަކޮށް ކޮވިޑުގެ ބަލިމީހުނަށް ފަރުވާދޭ ފެސިލިޓީތަކުގައްޔާއި އެޗްޕީއޭ ފަދަ އިދާރާތަކާއި ބެހޭ ޝަކުވާތަކުގެ ހަބަރުތަކެވެ. މިފަދަ ޝަކުވާތަކަކީ ޝަކުވާތަކެއްނަމަ އުފުލެންޖެހޭނޭ ޝަކުވާ ތަކެކެވެ. ނަވެސް ހަމައަކާއި ރިވެތި އުސޫލުތަކެއް ހުންނަން ޖެހޭނެއެވެ. ކަމާއި ކަމުގެ ހާލަތު ދަންނަން ޖެހޭނެއެވެ. އެކަމެއް އެހެން ހިނގަނީ ކީއްވެތޯ ވެސް ބަލަން ޖެހޭނެއެވެ. އެކަމުގައި ބަދުނާމުކުރެވޭ ފަރާތުގެ ހަރަކާތްތަކާއި ބަސްމަގަކީ ކޮބައިތޯ ބަލައިލުންވެސް އަމުދުން މުހިންމެވެ. ތިބާގެ ލޮލަށް ފެންނަން މަންޒަރާއި އަނެކާގެ ލޮލަށް ފެންނާނޭ މަންޒަރަށްވެސް ވިސްނަން ވާނެއެވެ. ހަމަ ގައިމުވެސް ތިބާގެ ލޮލަށް ނުފެންނަ އަދި ކިއެއްތަ ތިބާގެ ހަށިގަނޑަށް އިހުސާސް ނުކުރެވޭ ކިތަންމެ ކަމެއް އަނެކާ އަށް ފެނި އިހުސާސް ކުރެވޭނޭކަން ތިބާ ދަންނަން ވާނެއެވެ.

މިފަދަ ކަންކަމަށް ރިއާޔަތް ކުރުމެއް ނެތި މީސްމީޑިޔާގައި ދައުރުކުރުވާ ހަބަރުތަކުގެ ސަބަބުން، އެތައް ބައެއްގެ އަބުރާއި އިއްޒަތް ކަތިލެވެއެވެ. ތިބާގެ މާ ބާރުގަދަ މީސްމީޑިޔާގެ ވަސީލަތުން އަނެކާ ގުރުބާން ކުރަމުން ދަނީ ފަހުންވާނޭ ގޮތެއް ނުވިސްނައެވެ. މިއީ އަޅުގަނޑުމެން އެކަންކަމާއި މެދު އިންތިހާއަށް ދެރަވާނަ ޖެހޭ ކަންކަމެވެ. މުޖުތަމައު ފަސާދައިގެ މަގަށް އެނބުރުމުގައި މިފަދަ މީސްމީޑިޔާގެ ވަސީލަތްތަކުގެ ދައުރުވެސް އަމުދުން ކުޑައެއް ނޫނެވެ.