މިއީ ވަރަށް ފުންކޮށް ވިސްނާލަންޖެހޭ ސުވާލެކެވެ. މިސުވާލުގެ ޖަވާބު ބިނާވެފައިވަނީ އެފިރިހެނެއްގެ ޒާތީ ސިފަތަކާއި، ކަންކަން ހިނގާގޮތުގެ މައްޗަށެވެ.
ގިނަ ފިރިހެނުންނަށް، ޚާއްސަކޮށް ބައްދަލުވުންތަކުގެ ކުރީކޮޅު، އެމީހުންގެ އުނިސިފަތައް ނުވަތަ ދެރަގޮތްތައް ހާމަކުރުމަކީ އުނދަގޫ ކަމެކެވެ. ސަބަބަކީ، މުޖުތަމަޢުގެ އާދަތަކާއި، އަމިއްލަ ނަފްސަށް އޮންނަ އިތުބާރާއި، ނަފްސުގެ ގާބިލުކަމާއި މިކަންކްމަކީ މުޖުތަމައު އެމީހަކު "ލޭބަލް" ކުރާ ކަންކަން ކަމުގައި ވުމެވެ. އެމީހުން ބިރުގަންނަނީ، އެމީހުންގެ ނާޒުކުކަން ނުވަތަ އުނިސިފަތައް ހާމަކުރުމުން، އެމީހުންގެ އަގު ނުވަތަ ބުރަދަން ވެއްޓިދާނެތީއެވެ. ނުވަތަ އިތުބާރު ނުކުރެވޭނެ ބަޔަކަށް ވެދާނެތީއެވެ. ކުޑައިރުއްސުރެ ފިރިހެނުންނަކީ، ހިތްވަރުގަދަ، ބަލިކަށިކަން ނުދައްކާނެ އަދި ކަންކަމާ ދެރަވެ ނުރޯނެ ބައެއްގެގޮތުގައި މުޖުތަމައު ސިފަކުރެއެވެ. މިފަދަ ނުސީދާ ބާރުތަކުގެ ސަބަބުން، އަމިއްލަ ނަފްސުގެ އުނިސިފަތައް ހާމަކުރުމަކީ ނުރައްކާތެރި ކަމެއް ކަމަށް ފިރިހެނުންނަށް ހީވެއެވެ. ޚާއްސަކޮށް އަލަށް ގުޅުމެއް ބިނާކުރަން މަސައްކަތް ކުރާއިރު، އެމީހުން ބޭނުންވަނީ އެންމެ ރަނގަޅު ގޮތުގައި ފެނި، އަނެކާގެ ޝައުގުވެރިކަން ހޯދާށެވެ.
ނަމަވެސް، ޖަޒުބާތީ ގޮތުން ފުރިހަމަވުމާއި، ދެމީހުންގެ މެދުގައި އިތުބާރު ބިނާވަމުން އަންނަ ވަރަކަށް، ބައެއް ފިރިހެނުން އެމީހުންގެ ހަގީގަތް ހާމަކުރަން ފަށައެވެ. ފިރިހެނަކަށް ރައްކާތެރިކަމާއި، އިހްތިރާމް ލިބޭ ކަމުގެ އިހުސާސް ކުރެވިއްޖެނަމަ، އޭނާގެ ނުކުޅެދުންތެރިކަން ނުވަތަ އަމިއްލަ ނަފްސަށް އޮންނަ ބިރުތަކާއި، ކުރެވިފައިވާ ގޯސްތަކާއި، ނުވަތަ އެހެނިހެން ކަންބޮޑުވުންތައް ހިއްސާކުރަން ފަސޭހަވާނެއެވެ. އަދި މިފަދަ ހާމަކުރުންތަކަކީ، ދެމީހުންގެ ގުޅުން އިތުރަށް ވަރުގަދަވެ، ލާމެހިގެންދާނެ ކަމެކެވެ. އިތުބާރު ބިނާކުރެވޭ މާހައުލެއްގައި، އަދި އެހެން ފަރާތުން ހަމްދަރުދީއާއި އެކު ކަންކަން އަޑުއަހާނެ ކަމުގެ ޔަގީންކަން ލިބުމުން، އަމިއްލަ ނަފްސުގެ ދެރަގޮތްތައް ހާމަކުރުމަކީ ބިރުގަންނަ ކަމަކަށް ނުވެ، ގުޅުން ވަރުގަދަކުރާ މުހިންމު ފިޔަވަޅަކަށް ވެދެއެވެ.
އެހެންކަމުން، ފުރަތަމަ ޑޭޓުގައި މިކަން އާންމު ކަމަކަށް ނުވިޔަސް، ތެދުވެރި އަދި އަމިއްލަ ނަފްސު ދަންނަ ފިރިހެނެއް ނަމަ، އެންމެ ފަހުން އޭނާގެ އުނިސިފަތައް ގަބޫލުކޮށް، ހާމަކުރާނެއެވެ. މިކަން އޭނާ ކުރަނީ އެހެން މީހުންގެ ރަޙުމެއް ހޯދުމަކަށް ނޫނެވެ. އެހެނެއްކަމަކު ހަގީގީ ގޮތެއްގައި އޭނާ ހުރި ހާލު ދެއްކުމަށްޓަކައެވެ. އަމިއްލަ ނަފްސު ދަންނަ ފިރިހެނަކީ އޭނާގެ ބާރުތަކާއި، އަދި ދެރަގޮތްތައްވެސް ދަންނަ މީހެކެވެ. އަދި އޭނާ ގަބޫލުކުރާނީ ގުޅުމެއްގައި ހަގީގަތް ހާމަކުރުމަކީ ވަރަށް މުހިންމު ކަމެއް ކަމަށެވެ. އޭނާ ދެކޭނީ އުނިސިފަތަކަކީ އިންސާނިއްޔަތުގެ ބައެއް ކަމުގައެވެ. އަދި އެކަންކަން ފޮރުވުމަކީ ހަގީގީ ގުޅުމަކަށް ހުރަސްއަޅާ ކަމެއް ކަމުގައިވެސް ހަގީގީ ފިރިހެނަކު ނަމަ ގަބޫލުކުރާނެއެވެ. މިފަދަކަންކަން ހާމަކުރުމަކީ އޭނާގެ ހިތްވަރުގަދަކަމާއި، އަމިއްލަ ނަފްސަށް އިތުބާރު ހުރި މިންވަރު ދައްކުވައިދޭ ކަމެކެވެ. އެހެނީ، އަމިއްލަ ނަފްސުގެ އުނިސިފަތަކަށް ކުރިމަތިލާން ދަސްވެފައިވާ މީހަކަށް އެހެން މީހުންގެ އުނިސިފަތައްވެސް ގަބޫލުކުރަން ފަސޭހަވާނެއެވެ.
ފުރަތަމަ ބައްދަލުވުމުގައި ނުވަތަ ޑޭޓުގައި ފިރިހެނުން އޭނާގެ އުނިސިފަތަކުގެ ވާހަކަ ނުދެއްކުމަކީ ގިނައިން ފެންނަ ކަމެކެވެ. އެކަމަކު، ގުޅުން ބިނާވެ، އިތުބާރު އުފެދި، އޭނާގެ އަމިއްލަ ނަފްސު ދަންނަ މިންވަރަކަށް، މިފަދަ ކަންކަން ހާމަކުރުމަކީ ގުޅުން އިތުރަށް ވަރުގަދަ ކޮށްދޭނެ ކަމެކެވެ. ހަގީގީ ގުޅުންތަކަކީ ހަމައެކަނި ރީތި ކަންކަން ހިއްސާކުރުމަށްވުރެ ބޮޑަށް، އުނިސިފަތަކާއި ނުކުޅެދުންތެރިކަންވެސް ގަބޫލުކޮށް، އެކަކު އަނެކަކަށް އެހީތެރިވެ، އަޅާލުމާ ހަމްދަރުދީގެ މައްޗަށް އުފައްދާ ގުޅުންތަކެވެ.