އަދުގެ މި ބިޒީ ދުނިޔޭގައި ގިނަބަޔަކު ދުވަސް ފަށަނީ ކޮފީ އަކުންނެވެ. ގޭގެ ހަތަރުފާރުގެ ތެރޭގައި ބޮވޭ ކޮފީއަކުންނެވެ. އެވެސް ގިނަފަހަރަށް ތަންމަތިން ފެށޭ ކަމެކެވެ. ނަމަވެސް، ހެނދުނު ވަގުތު ހަށިގަނޑަށް ފައިދާހުރި އަދި ސިއްހަތަށް މޮޅު ފެށުމެއް ފެށޭނެ ގޮތެއް އެބައޮތެވެ. އެއީ އިރުގެ އަލިކަން ހޯދުމެވެ. ތަބީއަތުން ހިލޭ ލިބޭ މި އަލިކަމަކީ، އަހަރުމެންގެ ހަށިގަނޑާއި ސިކުނޑިއަށް ވަރަށް ގިނަ ފައިދާތައް ކުރާ ކަމެކެވެ. އަވަހަށް ނިދާ، އަވަހަށް ހޭލާ ބަޔަކަށް އަހަރެމެން ވާން މި ޖެހެނީ ހެނދުނުގެ މު އަލިކަންވެސް ހޯދުމަށެވެ. މިއީ ދުނިޔޭގެ ބައެއް ހިސާބުތަކަށް ތަދު އެއްޗެއްކަމުގައިވިޔަސް، މިއީ ރާއްޖެއަށް އަބަދުމެ ލިބޭ އެއްޗެކެވެ.
ހެނދުނުގެ ވަގުތެއްގައި 10 މިނެޓާއި 15 މިނެޓުގެ ވަގުތުކޮޅެއް ވަންދެން ތަބީއީ އިރުގެ އަލިކަމަށް ހުށަހެޅުމަކީ ހަށިގަނޑުގެ ޖިސްމާނީ ސިއްހަތާއި ނަފްސާނީ ސިއްހަތަށް ބޮޑު އަސަރެއް ކުރާނެ ކަމެކެވެ. މިއީ ހަށިގަނޑުގެ އެތެރޭ ގަޑި، ނުވަތަ "ސާކޭޑިއަން ރިދަމް" ރަނގަޅުކޮށްދޭ ކަމެކެވެ. މި ރިދަމް ކޮންޓްރޯލް ކުރަނީ ނިދުމާއި، ހުޝިޔާރުވުމާއި، ހޯމޯންތަކުގެ މިންވަރެވެ. މި ރިދަމް ރަނގަޅުވެފައި ހުންނަ ކަމުގައިވާނަމަ، ރޭގަނޑުގެ ނިދި ރަނގަޅުވެ، ދުވާލުގެ ވަގުތު ސަމާލުކަން އިތުރުވެ ހުޝިޔާރުވެ ތިބެވޭނެއެވެ. މީގެ ސަބަބުން ދުވަހުގެ މަސައްކަތްތަކަށް އިތުރު ހަކަތައެއް ލިބި، ސިކުނޑި ތާޒާކަންމަތީ ބެހެއްޓުމަށް އެހީތެރިވެދެއެވެ.
ހެނދުނުގެ އިރުގެ އަލިކަމުން ސެރަޓޯނިން، ނުވަތަ "ފީލް-ގުޑް" ހޯމޯން އިތުރުކޮށްދެއެވެ. މިއީ ހިތްހަމަޖައްސައިދީ، ކަންބޮޑުވުން ކުޑަކޮށްދޭ ހޯމޯނެކެވެ. މީގެ އިތުރުން، އެއީ ކަށިގަނޑު ވަރުގަދަކޮށްދީ، ބަލިތަކުން ހިމާޔަތްކޮށްދޭ ދިފާއީ ނިޒާމަށްވެސް އެހީތެރިވެދޭ ވިޓަމިން ޑީ އުފެއްދުމަށްވެސް އެހީތެރިވެދޭނެ ކަމެކެވެ. ނަފްސާނީ އެކިއެކި އުނދަގޫތައް ނުވަތަ މައްސަލަތައް ހުންނަ މީހުންނަށް، ހެނދުނުގެ އަލިކަމަކީ ތަބީއީ ފަރުވާއަކަށް ވެދާނެއެވެ. ސެރަޓޯނިންގެ މިންވަރު މަތިވުމުން ނަފްސާނީ ގޮތުން ހަމަޖެހުމެއް ލިބި، ދުވަހުގެ ކަންކަމަށް ހިތްވަރާއެކު ކުރިމަތިލުމަށް އެހީތެރިވެދެއެވެ.
މިކަމަށް ވަކި ޚާއްސަ ތަނެއް ނުވަތަ އިންތިޒާމެއް ބޭނުމެއް ނުވާނެއެވެ. އިރުގެ އަވި ލިބޭ ހަމަ ކޮންމެ ތަނެއް މިކަމަށް ފުދޭނެއެވެ. ބަނދަރުމައްޗަށް ނުކުމެލައިގެންވިޔަސް، އަތިރިމައްޗަށް ނުކުމެލައިގެންވިޔަސް މިކަން ކުރެވިދާނެއެވެ. ވުމާއެކު، ދުވަހުގެ މަސައްކަތްތަކަށް ވަނުމުގެ ކުރިން، ކުޑަ ވަގުތުކޮޅަކަށް ބޭރަށް ނިކުމެލާށެވެ. އިރުގެ އަލިކަމަކީ ތިބާގެ ދުވަހުގެ ފުރަތަމަ ސިއްހީ ފަރުވާކަމުގައި ހަދާށެވެ. ހިލޭ ލިބޭ މި މޮޅު ފަރުވާގެ ސަބަބުން ތިބާގެ ދުވަސް މާބޮޑަށް ތާޒާވެ، އުފާވެރިކަން އިތުރުވެގެންދާނެއެވެ.