މިޒަމާނަކީ ވަރުގަދަ ކަސްރަތުތަކާއި ފިޓްނަސް ހަރަކާތްތަކަށް އިސްކަންދެވޭ ޒަމާނެކެވެ. ޖިމްތަކާއި ޒުންބާކުލާސްތަކާއި އެފަދަ އެތައް ކަމެކެވެ. އެހެންކަމުން، ހެލިފެލިވެ އުޅުމާއި ހިނގުމަކީ ހަގީގީ ކަސްރަތެއް ކަމަށް ގަބޫލުކުރަން އުނދަގޫ ވެދާނެއެވެ. ނަމަވެސް، މި އާދައިގެ ކުޑަ އަމަލުތަކީ އިންސާނާގެ ސިއްހަތަށް ގިނަގުނަ ފައިދާތަކެއް ކުރުވާ ކަންކަމެވެ. ހިނގުމަށް ނުވަތަ ހެލިފެލިވެ އުޅުމަށް އެއްވެސް ހާއްސަ ސާމާނެއް، ޖިމެއް، އަދި ޖިމެއްގެ މެންބަރޝިޕެއް، ޓްރެއިނަރެއް ނުވަތަ އެތުލެޓިކް ހުނަރެއް ބޭނުމެއް ނުވެއެވެ. ބޭނުންވަނީ ވަގުތާއި ހިތްވަރެވެ. ބަދަލުކޮށްލަން ޖެހޭނީ ދިރިއުޅުމުގެ އާއްމު އާދައެވެ. ނަމަވެސް، އޭގެ ފައިދާތައް ހިތާއި ފުއްޕާމޭއިން ފެށިގެން ސިކުނޑިއާއި ކަށިތަކާ ހަމައަށް ހަށިގަނޑުގެ ގާތްގަނޑަކަށް ކޮންމެ ނިޒާމަކަށް ފޯރުކޮށްދެއެވެ.
ހެލިފެލިވެ އުޅުމާއި ގަވާއިދުން ހިނގުމަކީ ހަށިގަނޑުގައި ލޭ ދައުރުވުން ރަނގަޅުކޮށް، ލޭގެ ޕްރެޝަރ ދަށްކޮށް، ހިތުގެ ބަލިތަކުގެ ނުރައްކާ ކުޑަކޮށްދޭ ކަމެކެވެ. މީގެ އިތުރުން، ލޭގައި ހުންނަ ހަކުރުގެ މިންވަރު ކޮންޓްރޯލްކޮށް، ބަރުދަން ކޮންޓްރޯލްކުރުމަށް އެހީތެރިވެދީގެން މެޓަބޮލިކް މަސައްކަތްތަކަށް އެހީތެރިވެދެއެވެ. ބުރަ ކަސްރަތުތަކާ ހިލާފަށް، ހެލިފެލިވެ އުޅުމާއި ހިނގުމަކީ ހަށިގަނޑަށް ބުރައެއް ނުލިބޭ އަދި ދެމެހެއްޓެނިވި ކަމެކެވެ. އެހެންކަމުން، ހުރިހާ އުމުރެއްގެ އަދި ހުރިހާ ފެންވަރެއްގެ މީހުންނަށް ވެސް މިއީ އެންމެ ރަނގަޅު ކަސްރަތެވެ.
ހެލިފެލިވެ އުޅުމާއި ހިނގުމަކީ ހަށިގަނޑަށް ލިބޭ ފައިދާތަކުގެ އިތުރުން ނަފްސާނީ ސިއްހަތަށް ވެސް ގިނަ ފައިދާތަކެއް ގެނެސްދޭ ކަމެކެވެ. ހަމަޖެހޭ މި ވަގުތުތަކާއި ތަކުރާރުކޮށް ކުރެވޭ ހަރަކާތްތަކުން ނާރުތަކުގެ ނިޒާމަށް ހަމަޖެހުން ލިބި، ސްޓްރެސް ހޯރމޯންތައް މަދުކޮށް، މޫޑު ރަނގަޅުކޮށްދެއެވެ. އަދި މިއީ ސިކުނޑި ސާފުކޮށް، އީޖާދީ ހިޔާލުތައް އުފައްދައި، ހަމަޖެހުމަށް ފަސޭހަކަމެއް ގެނެސްދޭ ކަމެއްވެސް މެއެވެ. ތަބީއަތާ ގުޅިލާމެހުމަކީ ކަންބޮޑުވުންތައް ކުޑަކޮށް، ސަމާލުކަން އިތުރުކުރާ ކަމެއްވެސް މެއެވެ.
ބުރަ އަދި ބާރުބޮޑުކަން އިހުސާސްވާ ދުނިޔެއެއްގައި، ހެލިފެލިވެ އުޅުމާއި ހިނގުމަކީ އަޅުގަނޑުމެންގެ ހަށިގަނޑާއި، ހިޔާލުތަކާއި، ވަށައިގެންވާ މާހައުލާ އަލުން ގުޅިލާމެހުމަށް ލިބޭ ދައުވަތެކެވެ. މިއީ އިންސާނާގެ ސިއްހަތަށް އެތައް ފައިފާއެއްކުރާ ކަމެކެވެ. އެތައް ބޭހަކުން ލިބޭ އެތައް ފައިދާއެއް މި އަމަލުތަކުގެ ސަބަބުން ލިބެއެވެ.