މިއީ ރާއްޖޭގެ ދެކުނުގެ ރަށެއްގައި ހިނގާދިޔަ ހަގީގީ ހާދިސާއެކެވެ. މި ވާހަކަ ގެނެސްދެވިފައިވަނީ މި ހާދިސާ ދިމާވި މީހުންގެ ނަންތައް ބަދަލު ކުރެވިގެންނެވެ.
މޫސަ (އަސްލު ނަމެއް ނޫން) އަކީ އެ ރަށު ސިއްހީ މަރުކަޒުގައި މަސައްކަތް ކުރަމުން އަންނަ ޒުވާނެކެވެ. އޭނާ އިންނަނީ އެ މަރުކަޒުގެ ރިސިޕްޝަނުގައެވެ. ޑަކްޓަރަށް ދައްކަން އަންނަ ބަލިމީހުންގެ މެމޯ ހެއްދުމާއި ޑަކްޓަރަށް ދައްކާއިރު، ތަރުޖަމާ ކުރުމާއި، ރިސެޕްޝަނަށް އަންނަ ފޯނުތައް ނެގުމަކީވެސް މޫސަގެ މަގާމުގެ މަސްއޫލިއްޔަތުތަކެވެ.
އާދައިގެ މަތިން މޫސަ ޑިއުޓީ ކުރަމުން ދިޔަ ރެއެކެވެ. އެ ރޭގެ ގާތްގަނޑަކަށް 11:30 ހާއިރު، މަރުކަޒުގެ ފޯނަށް ފޯނެއް އައެވެ. މޫސަ ފޯނު ނަގާ ޖަވާބުދިނެވެ. އަތްގަނޑުލީ ފޯނެއްކަމުން އަދި ސްކްރީނެއް ނެތުމުން އެކޮޅުން ގުޅީ ކޮން ނަންބަރަކުންކަމެއް ފެންނާކަށް ނުހުރެއެވެ. ކޮންމެއަކަސް އެކޮޅުން ވާހަކަ ދެއްކީ ބަލި، މުސްކުޅި އަންހެނެކެވެ. އަދި އެވެނި ގެއަކަށް އެންބިއުލަންސު ފޮނުވަ ދިނުމަށް އެދުނެވެ. އެ ގޭގެ ކުއްޖަކު ބަލިވެގެން މަރުކަޒަށް ގެނައުމަށް ކަމަށް ބުންޏެވެ.
އެހިސާބުން ފޯނު ބޭއްވުމަށްފަހު މޫސަ މިވާހަކަ ކަމާބެހޭ ފަރާތްތަކަށް ހިއްސާކޮށްފިއެވެ. ނަމަވެސް އެންމެންގެ މޫނުމަތިން ފެނިގެން ދިޔައީ ކުއްލި ހައިރާން ކަމަކާއި ކުއްލި ސިހުމެކެވެ. އެބުނާ ގެއަކީ 2004ވަނަ އަހަރުގެ ސުނާމީ ކާރިސާގައި މުޅިންހެން ހަލާކުވެ، އެ ރަށުން ފަޅުވި ހިސާބުގަނޑުގައި ހުންނަ ގެއެކެވެ. މިހާރު އެ ގެއަކީ ފަޅަށް ދޫކޮށްލާފައި އޮތް ސަރަހައްދުގައި ގަސްފަޅާ ބޯވެފައިވާ ގެއެކެވެ. ސުނާމީ އެރި އިރު، އެގޭގައި އުޅެމުން އައި ދެމަފިރިން ވަނީ ސުނާމީ ކާރިސާގައި ނިޔާވެފައެވެ. ނަމަވެސް އެތަނުން އަންހެން މީހާގެ ހަށިގަނޑެއް އެއިރަކު އެއްވެސް މީހަކަށް ނުފެނުނެވެ. ބުނެވޭގޮތުގައި އެޔާ ދިޔައީއެވެ.
ކޮންމެއަކަސް މި ފޯނުކޯލު ވެގެން މި ދިޔައީ ވަރަށް ހައިރާން ކުރަނިވި ފޯނުކޯލަކަށެވެ. ވުޖޫދުގައި މިއަދު ނެތް ގެއަކަށް އެމްބިއުލަންސު ފޮނުވަން އެދި ގުޅި، ބަލި މުސްކުޅި މުޅި މީހެއްގެ ފޯނުކޯލެވެ. އެކަން އެހެން ވުމާއި އެކު، ދެންތިބި މީހުންގެ ލަފާގެ މަތިން، އެ ދަތުރު ނުކުރުމަށް ނިންމިއެވެ. އެއީ މީހަކު ކޮށްލި ސަމާސާއެއްކަމަށް އެންމެން ވެސް ދެކުނެވެ.
ދުވަސްތައް ފާއިތުވަމުންގޮސް، ޖެހިގެން އައި ހަފްތާގެ ވެސް ހަމަ އެދުވަހުގެ، އެރޭގެ އެވަގުތު އެބުނާ މީހަކު ފޯނުކޮށް، އެބުނާ ގެއަކަށް އެމްބިއުލަންސު ފޮނުވަން އެދުނެވެ. އެރޭވެސް ފޯނު ނެގީ މޫސައެވެ. އެއާއި އެކު ބިރުވެރިކަން އިންތިހާއަށް ބޮޑުވެގެން ދިޔައެވެ. މިއީ މީހަކު ކުރާ ސަމާސާއަކަށްވުރެ ބޮޑަށް މިއީ ރޫހާނީ ކަމެއް ކަމުގެ ބިރު، އެންމެނަށްމެ ހީވާން ފަށައިފިއެވެ. ކުރީ ރެއެކޭ އެއްފަދައިން މިރޭވެސް އެ ފޯނުކޯލަށް އަޅައެއް ނުލައެވެ. ނަމަވެސް މޫސަގެ ހިތުގައި އޮތް ބިރުވެރިކަން އިތުރުވެ، ރަށުގެ މުދިންމީހާ ކުރެން މިވާހަކަ ދައްކައިފިއެވެ. މުދިންބެގެ ނަސޭހަތަކަށްވީ އަޅާ ނުލުމަށެވެ. އަދި މުދިންބެ ކޮންމެވެސް ކަމެއް ކޮށްދޭނެ ކަމަށް ބުންޏެވެ.
މުދިންބެ ކުރިކަމެއް މޫސަ އަކަށް ނޭނގެއެވެ. އެކަމަކު ކަމެއް ކުރިކަމަށް އެބަ ބުނެއެވެ. ވެދާނެއެވެ! އެބުނާ ކަމެއް ކުރިކަމަށް ބުނި ފަހަކުން އެފަދަ ފޯނުކޯލެއް ނާދެއެވެ. އަނެއްކާ އެއީ މުދިންބެގެ ރޭވުމެއްބާއެވެ!
ކޮންމެއަކަސް އެކަންވެ ނިމިއްޖެއެވެ. ތަކުރާރެއް ނުވެއެވެ. އެހެންކަމުން ދެން ތިބި އެއްމެން އެއީ ބަޔަކު ކުރި ސަމާސާއެއްކަމަށް ގަބޫލުކުރިއެވެ. ނަމަވެސް މޫސަ ގަބޫލު ކުރާ ގޮތުގައި އެއީ މީހަކު ކުރި ސަމާސާއެއް ނޫނެވެ. ކޮންމެވެސް ގޮތްނޭނގޭ ރޫހާނީ ކަމެއް އެކަމުގައި ނުވެ ނުދާނެެއެވެ.