ސްޕެއިންގެ ބެނިޑޯމްގައި، މާވެލްގެ ސުޕަރހީރޯ "އިންކްރެޑިބަލް ހަލްކް" ގެ ސިފައިގައި ހަރަކާތްތެރިވުމަށްޓަކައި، އިނގިރޭސި ފިރިހެނަކު އޭނާގެ މުޅި ހަށިގަނޑުގައި ފެހި ކުލަ ޖެއްސި ނަމަވެސް، އެއީ މޭކަޕްގެ ބަދަލުގައި ފެބްރިކް ޕެއިންޓް ކަމަށްވުމުން، ހަށިގަނޑުން އެ ކުލަ ނުފިލައި ދުވަސްތަކެއް ވެއްޖެ ކަމަށް މެޓްރޯ ޔޫކޭއިން ރިޕޯޓުކޮށްފައިވެއެވެ.
މައުލޫމާތު ލިބިފައިވާ ގޮތުގައި، ކޭންގެ ނަމުން މަޝްހޫރު މި ފިރިހެން މީހާ، ބެނިޑޯމްގައި ބޭއްވުނު ހަފްލާއަކަށް ތައްޔާރުވުމުގެ ތެރޭގައި ހަލްކްގެ ސިފައިގައި ފެނިގެން ދިޔުމަށްޓަކައި، ބްރަޝްއަކާއި އެކު ހިނިތުންވެ ހުރެ މުޅި ހަށިގަނޑުގައި ފެހި ކުލަ ޖެއްސިއެވެ. ނަމަވެސް، އޭނާ ހީކުރި ގޮތާ ހިލާފަށް، ހަފްލާ ނިމި ކުލަ ފިލުވަން އުޅުމުން އެކަން ވީ ބޮޑު ހާދިސާއަކަށެވެ. ފެބްރިކް ޕެއިންޓް ކަމަށްވުމުން، ހަށިގަނޑުން އެ ކުލަ ފިލުވުން ވަރަށް ދަތިވިއެވެ.
މި ހާދިސާ ވައިރަލްވެފައިވަނީ، އޭނާގެ ރަހްމަތްތެރިޔާ ގްރަހަމް ވައިޓް، އޭނާގެ ޓިކްޓޮކް ޗެނަލްގައި މި ކަމުގެ ވީޑިއޯއެއް ހިއްސާ ކުރުމުންނެވެ. ގްރަހަމް ވައިޓްއަކީ ބެނިޑޯމްގައި ދިރިއުޅޭ އެކި މީހުންގެ ދިރިއުޅުން ޓިކްޓޮކްގައި ދައްކަމުން އަންނަ މީހެކެވެ. ކޭންގެ މުޅި ހަށިގަނޑުގައި ކުލަ ޖައްސައިގެން، ދުވަސްތަކެއް ވަންދެން ކުލަ ނުފިލައި އުޅެންޖެހުމުގެ ސަބަބުން، ސޯޝަލް މީޑިއާގައި މީސް މީޑިއާ ބޭނުންކުރާ ފަރާތްތަކުން އަންނަނީ ތަފާތު ކޮމެންޓުތައް ކުރަމުންނެވެ. ބައެއް ފަރާތްތަކުން މިކަމަށް ހީނ ސަމާސާ ކުރަމުންދާއިރު، އަނެއް ބައި މީހުން އޭނާއަށް ކަންބޮޑުވުން ފާޅުކޮށްފައިވެއެވެ.
މި ހާދިސާގެ ސަބަބުން، ބޭނުންކުރާ ކުލަފަދަ ތަކެތީގައި ލިއެފައިން ހުންނަ މުހިއްމު މައުލޫމާތު ދެފަހަރަށް ޗެކް ކުރުމުގެ މުހިއްމުކަން ވަނީ ފާހަގަވެފައެވެ.
ގްރަހަމްގެ ވީޑިއޯއަށް ކޮމެންޓު ކުރަމުން ބައެއް މީސް މީޑިއާ ބޭނުންކުރާ ފަރާތްތަކުން ބުނެފައިވަނީ، "މިކަން ވީ ނަމަވެސް، މީނާއަކީ ހަމަ ވަރަށް މަޖާ މީހެއް" މިފަދައިންނެވެ. އަނެއް ބަޔަކު ބުނެފައިވަނީ "އޭނާގެ އައިކިއު އޭނާގެ ފައިވާނުގެ ސައިޒަށް ވުރެވެސް ދަށް" ކަމަށެވެ. މި ހާދިސާގެ ސަބަބުން، ކޮސްޓިއުމްއަށް ތައްޔާރުވާއިރު، ބޭނުންކުރާ ތަކެތި ރަނގަޅުތޯ ބެލުމުގެ މުހިއްމުކަން ވަނީ ހަނދާންކޮށްދީފައެވެ.