ކަނޑާއި ކަނޑު ނުވަތަ ކަނޑާއި ކޯރު އެއްވާ ހިސާބުތަކުގައި، ފެންގަނޑުތައް އެއްވެގެން ނުގޮސް ވަކިވެފައި ހުންނަ ކަމީ ދުނިޔޭގެ ސައިންސްވެރިންނަށް އެތައް ޒަމާނެއް ވަންދެން ހައިރާންކަން ގެނުވި އަދި އެބޭފުޅުންނަށް އޮޅުން ފިލުވަން އުނދަގޫވި ކަމެކެވެ. މި ސިއްރުގެ ހައްލު ޤުރުއާނުގައި ހިމެނިފައިވަނީ، ސައިންސުގެ އެއްވެސް ކުރިއެރުމެއް ނެތް ޒަމާނެއްގައިކަން ފާހަގަކޮށްލަން ޖެހެއެވެ.
ސޫރަތުއް ރަޙްމާން ގައި މާތް ﷲ ވަޙީކުރައްވާފައިވެއެވެ.
﴿19﴾ مَرَجَ الْبَحْرَيْنِ يَلْتَقِيَانِ. ﴿20﴾ بَيْنَهُمَا بَرْزَخٌ لَّا يَبْغِيَانِ.
މާނައީ: އެކަލާނގެ ދެކަނޑު (އެބަހީ: ކޯރާއި، ކަނޑު) ހައްދަވައި، ފޮނުއްވިއެވެ. އެ ދެކަނޑު ހިނގަމުންގޮސް ބައްދަލުވެތެވެ. އެ ދެކަނޑު ދެމެދުގައި، ހުރަހެއްވެއެވެ. އެ ދެކަނޑުވެސް އެއްކަނޑު އަނެއް ކަނޑެއްގެ މައްޗަކަށް އަރައެއް ނުގަނެތެވެ."
މި އާޔަތުގައި ބަޔާންކުރައްވާފައިވާ ކަމަކީ، އެޓްލާންޓިކް ކަނޑާއި މެޑިޓެރޭނިއަން ކަނޑު ފަދަ ދެ ފެންގަނޑު އެއްވާ ހިސާބުތަކުންވެސް، އެ ފެންގަނޑުތަކުގެ ތަފާތު ސިފަތައް ހިފެހެއްޓިފައި ހުންނަ ކަމެވެ. އެތައް ސަތޭކަ އަހަރުތަކެއް ވަންދެން މިއީ ސައިންސްވެރިންނަށް އޮޅުން ބޮޅުންވެފައިވާ ކަމެކެވެ.
ޒަމާނީ ކަނޑުގެ އިލްމުން މިކަން ވަރަށް ސާފުކޮށް ކަށަވަރުކޮށްދީފައިވެއެވެ. ތަފާތު ފިނިހޫނުމިނާއި، ލޮނުކަމާއި، ބަރުދަންގެ ސަބަބުން އުފެދޭ "ތަރމޯހަލައިން ބައުންޑަރީޒް" އަދި "ހަލޮކްލައިންސް" ފަދަ ލޮލަށް ނުފެންނަ ގުދުރަތީ ހުރަސްތައް ހުންނަކަން ހޯދިފައިވެއެވެ. ޖިބްރޯލްޓަރ ކަނޑުއޮޅި ފަދަ ތަންތަނުގައި ދެ ކަނޑު އެއްވާ ހިސާބުތަކުގައިވެސް، މި ހުރަސްތަކުގެ ސަބަބުން ފެންގަނޑުތައް އެއްކޮށް އެއްވެ ނުގޮސް ވަކިވެފައި ހުރެއެވެ.
ފަރަންސޭސި ވިލާތުގެ ކަނޑުގެ އިލްމުވެރިޔާ ޖެކް ކޫސްޓޯއަށް މިފަދަ ހާދިސާތައް އަމިއްލައަށް ވަނީ ތަޖުރިބާ ކުރެވިފައެވެ. އޭނާ ފާހަގަކުރެއްވި ގޮތުގައި، ދެ ކަނޑު އެއްވާ ހިސާބުގައި ވަކި ޒޯނެއް ނުވަތަ ސަރަޙައްދެއް ވެއެވެ. އެތަނުގައި ފެންގަނޑުތައް އެއްވެފައި ހުއްޓަސް، އެއީ މުޅިން ތަފާތު ދެ ފެނެކެވެ.
މީގެ 1400 އަހަރު ކުރިން ބާވައިލެއްވި ޤުރުއާނުގައި މިވާހަކަތައް އައިސްފައިވީނަމަވެސް، މިކަމުގެ ސައިންސީ ހަގީގަތް ދުނިޔެއަށް ހާމަވެފައިވަނީ 20 ވަނަ ގަރުނުގައެވެ. މިކަމުން ދޭހަވަނީ، ޤުރުއާނަކީ އިންސާނުންނަށް ވިސްނާ ފިކުރުކުރުމަށް ދައުވަތު ދޭ ފޮތެއްކަމާއި، ތިމާވެށީގެ ތެރެއިން މާތް ﷲ ގެ ކުޅަދުންވަންތަކަމުގެ ހެކިތައް ފެންނަން ހުންނަ ކަމެވެ. މިފަދަ ކަންކަމަކީ ހަމައެކަނި އިލްމު ލިބިގަތުމުގެ މަސްދަރެއް ނޫނެވެ. އަދި އެއީ އިލާހީ ޙިކްމަތުގެ އާޔަތްތަކެކެވެ.
މީގެ އިތުރުން، މިކަމުން ދޭހަވަނީ، އެވޭލާ ޒަމާނުގެ މުޖުތަމަޢުތަކަށް ދުނިޔޭގެ ތަބީއީ ކަންކަމާބެހޭގޮތުން އެއްވެސް މައުލޫމާތެއް ނެތްކަމަށް ބުނެވޭ ބުނުން ދޮގުކުރެއެވެ. މި އާޔަތުން ދުނިޔޭގެ ބޮޑުކަމާއި، އުފެއްދުންތެރިކަމުގެ ކުރިމަތީގައި އިންސާނުންގެ ކުޑަ ކަން ހާމަވެގެން ދެއެވެ. އަދި އައު ކަންކަން ދަސްކުރުމަށް ހިތްވަރު ލިބިދެއެވެ. އަދި މިކަމުގެ ސަބަބުން ތިމާގެ ނަފްސު ޢިލްމުގެ ކަނޑުގައި ފީނުމަށް ބާރުއަޅައެވެ.