ޗައިނާގައި އުފަންވާ ކުދިންގެ އަދަދު މަދުކަމާއި ގުޅިގެން އެގައުމުގައި ކޮންމެ ދެމަފިރިއަކަށް ތިން ދަރިން ހޯދުމުގެ ހުއްދަ ދޭން ނިންމައިފިއެވެ.
ގިނަ އަހަރުތަކެއް ވަންދެން ދެމެހެއްޓި ކޮންމެ ދެމަފިރިއަކަށް އެންމެ ދަރިއަކަށް ވުރެ އިތުރަށް ކުދިން ހޯދުން މަނާކުރާ ގާނޫނަށް 2016 ވަނަ އަހަރު ވަނީ ބަދަލު ގެނެވިފައެވެ. އެގައުމުގައި ކުދިން އުފަންވާ ވަރު މަދުވެ، ދުވަސްވީ މީހުން ގިނަވުމުން ގާނޫނަށް ގެނައި މި އިސްލާހުގައި ބުނެފައިވަނީ ކޮންމެ ދެމަފިރިއަކަށް ދެ ކުދިން ހޯދުމުގެ ހުއްދަ އޮންނާނޭ ކަމަށެވެ. އެ ބަދަލުން ވެސް އެދެވޭ ނަތީޖާއެއް ނުނެރެވުނެވެ.
ދުނިޔޭގެ އެންމެ އާބާދީ ބޮޑު ޗައިނާގައި ދަރިން ހޯދުމުގެ މިންވަރު ކޮންޓްރޯލް ކޮށްފައިވަނީ އެގައުމުގެ އާބާދީ އިންތިހާއަށް އިތުރުވަމުން އަންނާތީއެވެ.
ނަމަވެސް، އާބާދީ ކޮންޓްރޯލް ކުރުމުން ވަކި ހިސާބަކުން އެގައުމުގައި ޒުވާނުން މަދުވެ، އުމުރުން ދުވަސްވީ މީހުން ގިނަވާން ފެށިއެވެ. އެހެން ކަމުން، އެގައުމުގެ ސަރުކާރުން ނިންމާފައި މިވަނީ ކޮންމެ ދެމަފިރިއަކަށް ތިން ދަރިން ހޯދުމުގެ ހުއްދަ ދިނުމަށެވެ.
މިދިޔަ އަހަރު އެގައުމުގައި އުފަންވެފައިވަނީ 12 މިލިއަން ކުދިންނެވެ. އެއީ 1961 ވަނަ އަހަރުން ފެށިގެން އެންމެ މަދުން ކުދިން އުފަންވި އަހަރެެވެ. ޗައިނާގެ މިހާރުގެ އާބާދީ އަކީ 1.4 ބިލިއަން މީހުންނެވެ.