ހަމުގެ މައްސަލަތަކަކީ ވަރަށް ގިނަ ބައެއްގެ ޝަކުވާ އަކަށް އޮންނަނީ ވެފައެވެ. ފިރިހެނުންނަށްވުރެ އަންހެނުންނަށް މި މައްސަލަ ކުރިމަތިވާލެއް ގިނައެވެ. މޫނަކީ ކޮންމެ މީހަކު އެންމެ ބޮޑު އިސްކަމެއްދީގެން ބަލަހައްޓާ އެއް ގުނަވަނެވެ. އެހެންކަމުން މޫނުގެ ހަންގަނޑު ސާފުކޮށް އޮމާންކޮށް ބެހެއްޓުމަށް ގިނަ ބަޔަކު ފަރުވާތެރިވެއެވެ.

 އެހެންނަމަވެސް މި ފަހަކުން ވަރަށް ގިނަ ބައެއްގެ ޝަކުވާއަކަށް ވެފައި އޮންނަނީ މޫނުގައި ބިހިނެގުން އިތުރުވެއްޖެ ކަމުގެ ޝަކުވާއެވެ. މިއީ ކޮވިޑް-19ގެ ހާލަތާއި ގުޅިގެން މާސްކް އަޅައިގެން ގިނަ ވަގުތު އުޅެން ޖެހިފައިވާ ދަނޑިވަޅެއްގައި ގަދަ ވެގެން އުޅޭ އަޑެކެވެ. ހަމުގެ ޑޮކްޓަރެއް ކަމަށްވާ ހެރީ ޑާއޮ ހާމަކުރި ގޮތުގައި މިއީ ސިއްޙީ އެހީތެރިންގެ މެދުގައި އާންމު ކަމެއް ނަމަވެސް އާންމުންގެ މެދުގައި މިކަން ގިނަވެގެން އުޅޭ ސަބަބަކީ ކޮވިޑް-19 އިން ރައްކާތެރިވުމަށް އަޅަން ޖެހޭ ރައްކާތެރިކަމުގެ ފިޔަވަޅު ތަކެވެ. އެހެންކަމުން މޫނުގައި އަޅާ މާސްކްގެ ސަބަބުން ބިހިނެގުމަށް މަގުފަހިވަނީ ކިހިނެތް ވެގެން ކަމާ އެކަމުގެ ހައްލު ހޯދާނެ ގޮތްތަކަށް ބަލާލާނަމެވެ.

މާސްކްގެ ސަބަބުން ހޫނުވެ، ދާހިތްލުމުގެ ސަބަބުން އަންނަ ތެތްކަން އެކުވެގެން ބިހިނެގުމަށް މަގުފަހިވެއެވެ. ހަމުގައިވާ ކުދި ލޯވަޅުތައް ބެދި އެތަނުގައި ހަޑިތައް އެކުވެގެން ބިހި ނަގަން ފަށައެވެ. އަދި ހަންގަނޑު ހިކި، ކަހާ އަދި ހަންފޮޅޭގޮތްވެއެވެ. ބިހިނެގުމުގެ އިތުރުން ވެސް ހަމުގެ އެއްވެސް މައްސަލައެއް ހުންނަ ނަމަ މާސްކް އެޅުމުގެ ސަބަބުން އެ މައްސަލަ އިތުރަށް ގޯސްވޭތޯ ބަލަން ވާނެއެވެ.

މިގޮތަށް ބިހިނެގުން މަދުކުރުމަށް ހަމުގެ ޑޮކްޓަރުން ލަފާދެއްވާ ބައެއް ކަންކަމަކީ:

  1. ފުރަތަމަ މޫނު ރީތިކޮށް ދޮވުން

މޫނު ދޮވުމަށް، ވަހެއް ނުހުންނަ، ތެޔޮ މަދު އަދި މާ ބާރުގަދަ ނޫން ކްލެންސަރ އެއް އިޚްތިޔާރު ކުރާށެވެ. ތާފަނާ ފެނުން މޫނު ދޮންނާށެވެ. މިހެން ހެދުމުން ހަމުގެ މަތީ ފަށަލާގައި ހަޑިއާއި ތެޔޮ ހަރުލާފައި ހުރުމުން ދުރުކޮށްދޭނެއެވެ. މާސްކް އެޅުމުގެ ކުރިން މޫނު ރީތިކޮށް ސާފު ކުރުމަކީ އާދައަކަށް ހަދާށެވެ.

  1. މޮއިސްޗަރައިޒަރ އެއް ބޭނުން ކުރުން

މޮއިސްޗަރައިޒަރގެ ސަބަބުން ހަންގަނޑު ތެތްކޮށް ބެހެއްޓުމާއި އެކު ހަންގަނޑާއި މާސްކާއި ދެމެދަށް ލެވޭ "ފާރެއް"ގެ ގޮތުގައި އެހީތެރިވާނެއެވެ. މާސްކް ނެގުމަށް ފަހުވެސް ރީތިކޮށް މޫނު ދޮވުމަށްފަހު މޮއިސްޗަރައިޒަރ އެއް ބޭނުން ކުރުން އާދައަކަށް ހަދާށެވެ.

  1. މޭކަޕް ދުރުކޮށްލުން

މާސްކް އަޅާ ހިސާބުގައި މޭކަޕްކޮށް ފައި ހުންނަނަމަ ހަމުގެ ލޯވަޅުތައް ބެދި ބިހި ނެގުމުގެ އިތުރުން މާސްކް ހަޑިވުމަށްވެސް ފުރުސަތު ލިބެއެވެ.

  1. ރީތިކޮށް މާސްކް ދޮވުން

އެއްފަހަރަށް ވުރެ ގިނަ ފަހަރު ބޭނުން ކުރެވޭ މާސްކް ނަމަ ކޮންމެ ފަހަރަކު ބޭނުން ކުރުމަށްފަހު ދޮންނަން އާދަކުރާށެވެ. މިކަމަށް ބޭނުން ކުރުން ރަގަޅީ އެއްވެސް ވަހެއް ނުހުންނަ ދޮންނަ ކުނޑި ނުވަތަ ދިޔާ ސައިބޯންޏެވެ. އެދެވިގެން ވަނީ މާސްކްގައި ފެބްރިކް ސޮފްޓްނަރ ވެސް ބޭނުން ނުކުރުމެވެ. މީރުވަސް ދުއްވަން ބޭނުންކުރާ ކޮންމެ އެއްޗަކުން ހަންގަނޑު ކަހާ ހިރުވާ ހެދުމުގެ ފުރުސަތު އޮވެއެވެ.

  1. ހަމުގެ މައްސަލަތައް ހުންނަ މީހުނަށް ދޭ ބާވަތްތަކަށް ފަރުވާތެރިވުން

ހަމުގެ އެކި މައްސަލަތަކަށް ޑޮކްޓަރުން ދީފައި ހުންނަ އެކި ބާވަތްތަކުގެ ކްރީމާއި ލޯޝަން ފަދަ ތަކެތީގައި، ބެންޒޮއިލް ޕެރޮކްސައިޑް، ރެޓިނޯލްސް، އަދި ސެލިސިކް އެސިޑް ހުންނަ ނަމަ މާސްކް ބޭނުން ކުރާ އިރު މިތަކެތި ބޭނުން ކުރުމުން އިތުރު މައްސަލަތައް ޖެހުމުގެ ފުރުސަތު އޮވެއެވެ. އެހެންކަމުން ޑޮކްޓަރުގެ ލަފާއާއި އެއްގޮތަށް މި ފަދަ ބާވަތްތައް ބަދަލު ކުރަން ވާނެއެވެ.

މިފަދައިން ކަންކުރުމަށްފަހުވެސް ބިހިނެގުމުގެ މައްސަލައަށް ހައްލެއް ނާންނަ ނަމަ ޑޮކްޓަރެއްގެ ލަފާ ހޯދަންވާނެއެވެ. ބިހިނަގަން ދިމާވަނީ އެހެން ކަމެއްގެ ސަބަބުން ކަމަށް ވުން އެކަށީގެންވެއެވެ.