ކް ރެއިން އެންޓަޓެއިންމަންޓުން އުފައްދާ، ގިނަ ބަޔަކު އިންތިޒާރު ކުރަމުންދާ ލޯބީގެ ފިލްމު "އަލްވަދާޢު" މާދަމާ، ރިލީޒް ކުރުމަށް އެންމެ ފަހުގެ ތައްޔާރީތައް ވަމުން އަންނައިރު، މިހާރުވެސް ފިލްމުގެ ޓިކެޓްތައް ވަރަށް ބޮޑަށް ހުސްވަމުން އެބަދެއެވެ.
ފިލްމުގެ ޓްރެއިލަރާއި ތީމް ސޯންގަށް ބެލުންތެރިންގެ ފަރާތުން މިހާތަނަށް ވަރަށް ބޮޑު ތަރުހީބެއް ލިބިފައިވާއިރު، މާދަމާ ރިލީޒްވާ މި ރީތި ލޯބީގެ ފިލްމަކީ ބެލުންތެރިންނަށް ތަފާތު އަދި ފުން އިހުސާސެއް ގެނެސްދޭނެ ފިލްމަކަށް ވެގެންދާނެކަމަށް ގިނަ ބަޔަކު ދެކެއެވެ. މިއީ މިއަހަރު ރާއްޖޭގެ އުފެއްދުންތަކުގެ ތެރެއިން ފެނިގެންދާ އެންމެ ލޯބި ފިލްމަށް ވެގެންދާނެކަމަށް ގިނަ ބަޔަކު ގަބޫލުކުރާއިރު، ސޯޝަލް މީޑިއާގައި މި ފިލްމާ ބެހޭގޮތުން ހެދިފައިވާ ކޮމެންޓްތަކުން ވެސް މިކަން ހާމަވެއެވެ.
މި ފިލްމަކީ ގިނަ ބަޔެއްގެ ތައުރީފު ލިބިފައިވާ ޝަހުދާ މުޙައްމަދު (ޝާހޫ) ލިޔެފައިވާ ފިލްމެކެވެ. އަދި މި ފިލްމު ޑައިރެކްޓްކޮށްފައިވަނީ ދިވެހި ފިލްމީ ދާއިރާގެ މަޝްހޫރު ނަން، އަލީ ޝިފާޢު (ޗިއްޕޭ) އެވެ. ފިލްމުގެ ސިނަމެޓޯގްރާފަރަކީ ހުނަރުވެރި އެކްޓަރެއްގެ ގޮތުގައި ވެސް ފެނިފައިވާ މުޙައްމަދު ފައިސަލެވެ. އަދި މި ފިލްމުގެ ޓެކްނިކަލް މެނޭޖަރަކީ ޒިފާފެވެ. މި ފިލްމަކީ ދިވެހި ފިލްމީ ދާއިރާގެ މަޝްހޫރު ފަންނާނުންގެ ހުނަރުވެރި މަސައްކަތެއްގެ ނަތީޖާއެކެވެ.
"އަލްވަދާޢު" ފިލްމުގެ މައިގަނޑު ދެ ތަރިންނަކީ މަރިޔަމް މަޖުދާ އާއި ޝަރަފް ޢަބްދުﷲއެވެ. މި ދެ ތަރިންގެ އިތުރުން މުޙައްމަދު ރަޝީދު، ޝީލާ ނަޖީބް، އަރަމުން އަންނަ ތަރި އައިޝަތު ލައިޝާ ލަތީފް އަދި މަޒީން ހާޒިފް ފަދަ ގިނަ ތަރިން ސަޕޯޓިން ރޯލްތަކުން ފެނިގެންދާނެއެވެ. މި ފިލްމުގެ ކާސްޓުންގެ ތެރޭގައި ދިވެހި ފިލްމީ ދާއިރާގައި ނަން މަޝްހޫރު ފަންނާނުންގެ އިތުރުން، އުންމީދު ކުރެވޭ އައު މޫނުތަކެއްވެސް ހިމެނެއެވެ.
ލޯބީގެ މި ހިތްދަތި ފިލްމު ބަލާލުމަށް ޓިކެޓް މިހާރު ވިއްކަމުންދާއިރު، ޓިކެޓް ހުސްވަމުންދާތީ އަވަހަށް ޓިކެޓް ގަތުމަށް ފިލްމުގެ ޓީމުން ވަނީ އިލްތިމާސްކޮށްފައެވެ. ޓިކެޓް ގަތުމަށް 9911229 މި ނަންބަރަށް ގުޅުމުން ފަސޭހަކަމާއެކު ޓިކެޓް ގަނެވޭނެއެވެ.