އަންޒަމާނުކަރައިގެ ވާހަކަ އަކީ ޒަމާނުއްސުރެ ދިވެހިން ދައްކާ ވާހަކައެކެވެ. ނަމަވެސް މިއީ ކޮން އަންޒަމާނެއް ހެއްޔެވެ؟ އަންޒަމާނަކީ ޒަމާނެއް ހެއްޔެވެ؟ ނަމަވެސް ޒަމާނެއްގެ ފަހަތަށް "ކަރަ" ކިޔެންވީ ކީއްވެ ހެއްޔެވެ؟ މި ލިޔުމުގައި އަންޒަމާނުކަރަ އަކީ ކޮބައިކަން ބަލައިލާނަމެވެ. އަދި އަންޒަމާނުކަރައަށް ވައި އެރުމޭ މިކިޔަނީ ކޮންކަމާއި މެދުތޯވެސް ބަހުސެއް ކޮށްލާނަމެވެ.

އަންޒަމާނުކަރަ (އަންޑަމަންސް) އަކީ އިންޑިޔާކަނޑުގައި، އިންޑިޔާގެ އިރުމަތިން އޮންނަ ބޭއޮފް ބެންގޯލްއާއި އަންޒަމާނު ކަނޑާއި ބައްދަލުވާ ހިސާބުގައި އޮންނަ ޖަޒީރާ ރަށްތަކެކެވެ. އަންޒަމާނުކަރައިގައި އަންޒަމާނުގެ ރަށްތަކާއި ނައްކަވާރުގެ (ނިކޮބާރު) ރަށްތައް ހިނެއެވެ. ޖުމުލަ 572 ރަށުގެ މައްޗަށް އެކުލެވޭ މި ޖަޒީރާ ރަށްތަކަކީ "އިންޑިއަން ޔޫނިޔަން ޓެރިޓޮރީގެ" ރަށްތަކެކެވެ. ނަމަވެސް މި ރަށްތައް ގާތްވާނީ އިންޑޮނޭޝިއާ އާއި މިޔަންމާއާއިއެވެ. ދިވެހިންނާއި ގާތްގުޅުމެއް އޮންނަ މަލިކު ފަދައިން އަންޒަމާނުކަރަ އަކީވެސް އިންޑިޔާގެ ބާރު ހިނގާ ސަރަހައްދެކެވެ. މި ސަރަހައްދުގެ 572 ރަށުގެ ތެރެއިން 116 ރަށަކީ ފަށުރަށްރަށެވެ. މީހުން އާބާދުވެ އުޅެމުން އަންނަނީ 36 ރަށެއްގައެވެ.

އަންޒަމާނު އަދި ނައްކަވާރުގެ ނަންތައް އުފެދިގެން އައި ގޮތަށް ބަލައިލާނަމެވެ. އަންޒަމާނު ނުވަތަ އަންޑަމަން އަކީ ސާންސްކުރިތު ބަހުން އިންޑިޔާގެ ކަލާނގެއަކަށް ކިޔާ ނަމެކެވެ. ބުނެވޭ ގޮތުގައި 1440.މ ގައި އެސަރަހައްދަށް ދަތުރުކުރި އިޓަލީގެ ދަތުރުވެރިއަކު އެރަށްތަކަށް އެނަމުން ކިޔާ ހެދިކަމަށް ވެއެވެ. ނައްކަވާރުގެ ނަން އުފެދުނީ އަދި މާ އާދަޔާހިލާފު ގޮތަކަށެވެ. މީލާދުން 10 ވަނަ ގަރުނުގެ ކުރީކޮޅު އުޅުނު ޗޯލާ ނަމަކަށް ކިޔާ އެމްޕެއަރަކު އެ ރަށްތަކުގައި ކަނޑުގެ ސިފައިންގެ ލަޝްކަރެއް ބިނާ ކުރެއްވިއެވެ. އަދި އެ ރަށްތަކަކީ "މަ-ނައްކަވަރަމް" ކަމަށް ކަނޑައެޅިއެވެ. މާނައަކީ ހާމަ ނުވަތަ އޮރިޔާމެވެ. މީގެ ފަހުން އައި ޒަމާންތަކުގައި މި ނަން "ނައްކަވާރަށް" ވަނީ ބަދަލުވެފައެވެ. އެއަށްފަހު އިނގިރޭސީން ގެ އިސްތިއުމާރު ދުނިޔޭގައި ގަދަވަމުން ދިޔަ ދުވަސްވަރު އެމީހުންގެ ބާރު މިރަށްތަކުގައިވެސް ވަނީ ހިނގާފައެވެ. އެކޮތުން ނިކޮބާރަކީ އެމީހުން ދިން ނަމެކެވެ.

ދެވަނަ ބޮޑުހަނގުރާމައިގެ ދުވަސްވަރަށްފަހު އަންޒަމާނުކަރަ އޮތީ ޖަޕާނުގެ އަތްދަށުގައެވެ. އޭގެ ފަހުން އިންޑިޔާ އަދި އިނގިރޭސިން ގުޅިގެން މި ރަށްތަކުގައި ހިންގި ޖަރީމާ ތަކަކަށްފަހު ޖަޕާނުގެ އަތްދަށުން މި ރަށްތައް އަތުލައި އިންޑިޔާގެ އަތްދަށަށް ގެންދިޔައެވެ. އަންޒަމާނު ކަރައަށް "ވައި" އެރުމަކީ މި ހާދިސާ ކަމަށް ވުމަކީވެސް ވަރަށް ގާތްކަމެކެވެ. އެހެނީ މި ވާހަކައަކީ މުޅި ދުނިޔޭގައިވެސް ވަރަށް ގަދައަށް އޭރު ދެކެވެމުން ދިޔަ މަގުބޫލު ވާހަކައެކެވެ. ހަމަ އެއާއިއެކު އެގައުމުގެ ތާރީހުގައި އެގައުމަށް "ވައިގެ" މާ ބާރުގަދަ ތޫފާނެއް އިހުގެ ދުވަސްތަކުގައި އައިސްފައެއް ނުވެއެވެ. ނަމަވެސް ބޮޑު ރާޅު އެރުން ނުވަތަ ސުނާމީ އަކީ އިހުއްސުރެ މި ރަށްރަކަށް އާންމު ކަމެކެވެ. ކަން މިހެން ހުރުމުން ދިވެހިން މިކިޔާ "ވައި" އެރުމާއި ސީދާ ގުޅޭ ވައިގެ ތޫފާނެއް ފަދަ ކަމެއް ފެންނާކަށް ނެތެވެ. އެހެންކަމުން "ވައި" އެރުމަކީ އިސްވެ މި ބަޔާންކުރި ހާދިސާކަމަށްވުން ވަރަށް ގާތެވެ.

ދިވެހި ފުލޯކު ވާހަކަތަކުން ދެ ވާހަކައެއްގައި އަނަޒަމާނުކަރައިގެ ވާހަކަ އައިސްފައި ވެއެވެ. އެއީ "ދޮންބެއްޔާ" ވާހަކަ އާއި މަޝްހޫރު "ކެޔޮޅާ ބޭބޭ ދޫންޏާ" ގެ ވާހަކައެވެ. މި ދެވާހަކައިގައިވެސް އަންޒަމާނު ކަރަ ސިފަ ކޮށްފައިވަނީ "މިނިކާ" ބަޔަކު އުޅޭ ރަށްތަކެއްގެ ގޮތުގައެވެ. އަދި އެއީ ދިވެހިން ހަމަ އެކަނި ކިޔައި އުޅޭ އުޅުމެއްގެ ގޮތުގައެވެ. މި ދެވާހަކައިގައިވެސް އަންޒަމާނުކަރައިގައި މިނިކާ ބަޔަކު އުޅޭތީ ހާމަ ވެފައެއް ނުވެއެވެ. ނަމަވެސް އުޅޭކަމަށް ބުނެފައިވެއެވެ. އެހެން ކަމުން އެވާހަކަ ފުލޯކުކޮށް ދައްކާތާ އެތަކެއް ޒަމާންތަކެއް ވީއިރުވެސް އެކަމުގެ ހަގީގަތެއް ނޭނގެއެވެ. އެހެންކަމުން އަންޒަމާނުކަރަ އަށް ވައި އެރުމަކީ މިވާހަކަ ތަކުގައި ހަގީގީ ކުލަ ނުޖެހި ދިއުން ކަމުގައިވެސް ވެދާނެއެވެ.

ކޮންމެ އަކަސް އަންޒަމާނު ކަރައަށް ވައި އެރިއޭ މިބުނާ ބަހުގެ ހަގީގީ ކުލައެއް ފެންނާކަށް ނެތެވެ. ނަމަވެސް އަޅުގަނޑުމެންނަށް އިނގޭހާވެސް ހަގީގަތަކީ އަންޒަމާނަކީ ޒަމާނެއް ނޫން ކަމެވެ. އެއީ ދިވެހި ރާއްޖެފަދަ ޖަޒީރާ ރަށްތަކެއް ކަމެވެ.