މާވެލް ސްޓޫޑިއޯސްގެ ކުރިއަށް އޮތް އެންމެ ބޮޑު ފިލްމު ކަމަށްވާ "އެވެންޖާސް: ޑޫމްސްޑޭ" ގެ ޕްރޮމޯޝަންތައް ކުރިއަށް ގެންދިއުމަށް ތަފާތު ގޮތަކަށް ރާވަމުން އަންނަ ކަމުގެ އަޑުތައް ސޯޝަލް މީޑިއާގައި ފެތުރިއްޖެއެވެ.
ހޮލީވުޑްގެ ޚަބަރުތައް ގެނެސްދޭ ބައެއް ފަރާތްތަކުން ބުނާ ގޮތުގައި، މި ފިލްމުގެ އެންމެ ޓްރެއިލާއެއް ނެރުމުގެ ބަދަލުގައި، މުޅިން ތަފާތު ހަތަރު ވައްތަރެއްގެ ޓްރެއިލާ ނެރުމަށް މާވެލް އިން ދަނީ ވިސްނަމުންނެވެ. މިއީ ފިލްމީ ދާއިރާގައި އާންމުކޮށް ކޮށްއުޅޭ ކަމަކަށް ނުވާތީ ގިނަ ބައެއްގެ ސަމާލުކަން މިކަމަށް ވަނީ ލިބިފައެވެ.
މި ރިޕޯޓުތައް ބުނާ ގޮތުން، "އެވެންޖާސް: ޑޫމްސްޑޭ" ގެ މި ހާއްސަ ޓްރެއިލާތައް ދައްކާނީ ޑިސެމްބަރު މަހު ރިލީޒްކުރާ ޖޭމްސް ކެމެރޮންގެ "އެވަޓާ: ފަޔާ އެންޑް އޭޝް" ފިލްމާ އެކުގައެވެ. މިގޮތުން އެވަޓާ ފިލްމު ބަލަން ސިނަމާތަކަށް ވަންނަ މީހުންނަށް، އެކި ފަހަރުމަތިން ފެންނާނީ އެވެންޖާސްގެ ތަފާތު ޓްރެއިލާތައް ކަމަށް ލަފާކުރެވެއެވެ. މި އުކުޅުގެ ބޭނުމަކީ ވީހާވެސް ގިނަ ބަޔަކު ސިނަމާތަކަށް ގެންދިއުމާއި، ފޭނުންގެ މެދުގައި ފިލްމާ މެދު އޮތް ޝައުގުވެރިކަން އެތައް ގުނައެއް އިތުރުކުރުމެވެ.
މި ފިލްމަކީ މަޝްހޫރު އެކްޓަރު ރޮބަޓް ޑައުނީ ޖޫނިއާ އެނބުރި މާވެލް ސިނަމެޓިކް ޔުނިވާސްއަށް އައިސް، "ޑޮކްޓަ ޑޫމް" ގެ ރޯލު ކުޅޭ ފުރަތަމަ ފިލްމަށް ވާތީ މިއީ މިހާރު ވެސް ވަރަށް ގިނަ ބަޔަކު އިންތިޒާރު ކުރަމުން އަންނަ ފިލްމެކެވެ. ހަތަރު ޓްރެއިލާ ނެރުމާ ގުޅޭ ގޮތުން މާވެލް އިން އަދި ރަސްމީކޮށް ވަކި އެއްޗެއް ބުނެފައި ނުވި ނަމަވެސް، މިކަން ހަގީގަތަކަށް ވެއްޖެ ނަމަ މިއީ ފިލްމު މާކެޓްކުރުމުގައި ފެންނާނެ ވަރަށް ތަފާތު ކަމެކެވެ. މިކަމުގެ ސަބަބުން ފިލްމުގެ ވާހަކަ ދެކެވޭ މިންވަރު ވަރަށް ބޮޑަށް އިތުރުވެގެންދާނެއެވެ.