ޒަމާނީ ދުނިޔޭގައި އާޓިފިޝަލް އިންޓެލިޖެންސް (އޭ.އައި) ގެ ދައުރު ދަނީ ބޮޑުވަމުންނެވެ. ޚާއްސަކޮށް ސިއްހީ ދާއިރާއަށް މި އަންނަނީ ބޮޑެތި ކުރިއެރުންތަކެއް ގެނުވަމުންނެވެ. އިންސާނުންގެ ވާރުތީ މައުލޫމާތު ނުވަތަ ޑީ.އެން.އޭގެ ތެރެއިން ބަލިތައް ދެނެގަތުމަށް އޭ.އައި ބޭނުންކުރުމަކީ މިހާރު ހޯދެމުންދާ އެންމެ އުއްމީދީ އަދި މުހިންމު އެއް ކުރިއެރުމެވެ. މި އާ ހުނަރުގެ ސަބަބުން ބަލިތައް ދެނެގަތުމާއި ފަރުވާ ދިނުމުގައި ބޮޑެތި އިންގިލާބެއް އަންނާނެ ކަމަށް ލަފާކުރެވެއެވެ.
މިދާއިރާއިން މިހާރު ހޯދިފައިވާ އެންމެ ފަހުގެ ކުރިއެރުމަކީ، އިންސާނުންގެ ޑީ.އެން.އޭގައި ހުންނަ ވަކިވަކި ޖެނެޓިކް މިއުޓޭޝަންސް (ވާރުތައިން ލިބޭ ބަދަލުތައް) އިން ކުރިމަތިވެދާނެ ވަކި ބަލިތައް ކުރިން ދެނެގަތުމުގެ ގާބިލުކަމެވެ. މީގެ ކުރިން އޭ.އައި އަށް ދެނެގަނެވޭނީ މި ބަދަލުތަކަކީ ގެއްލުންދެނިވި ބަދަލުތަކެއްތޯ ނުވަތަ ނޫންތޯ އެކަންޏެވެ. ނަމަވެސް މިހާރު އެއަށްވުރެ މާ ފުންކޮށް، އެ ބަދަލުތަކުގެ ސަބަބުން ޖެހިދާނެ ވަކި ބައްޔެއް ދެނެގަތުމުގެ ގާބިލުކަން އޭ.އައި އަށް ލިބިފައިވުމަކީ ސިއްހީ ދާއިރާއަށް ލިބުނު ބޮޑު ކުރިއެރުމެކެވެ. މިހާރު އޭ.އައި ސިސްޓަމްތަކަށް ވަނީ އެތައް ހާސް ޑީ.އެން.އޭ ސިކުއެންސްތަކެއް ދިރާސާކޮށް، ޖެނެޓިކް މިއުޓޭޝަންތަކާއި ވަކި ބަލިތަކާ ދެމެދުވާ ގުޅުންތައް ދެނެގަތުމުގެ ގާބިލުކަން ލިބިފައެވެ.
މިކަމުގެ ސަބަބުން ސިއްހީ ދާއިރާއަށް ބޮޑެތި ބަދަލުތަކެއް އަންނާނެ ކަމަށް ލަފާކުރެވެއެވެ. މިސާލަކަށް:
. ބަލިތައް ކުރިން ދެނެގަތުން: ބަލިތައް ޖެހުމުގެ ކުރިން ނުވަތަ ފެށިގަންނަ ދުވަސްވަރު ދެނެގަނެ، ވަގުތުން ފަރުވާ ދިނުމުގެ ފުރުސަތު ބޮޑުވާނެއެވެ. މީގެ ސަބަބުން ބަލީގެ ނުރައްކާތެރިކަން ކުޑަކޮށް، ބަލި ރަނގަޅުވުމުގެ ފުރުސަތު އިތުރުވާނެއެވެ. ޚާއްސަކޮށް ކެންސަރު އަދި ވާރުތައިން ޖެހޭ ބަލިތައް ކުރިން ދެނެގަތުމަށް މިއީ ފުރުސަތެކެވެ.
. ފަރުދީ ފަރުވާ: ކޮންމެ މީހެއްގެ ޖެނެޓިކް މައުލޫމާތާ އެއްގޮތަށް ޚާއްސަ ފަރުވާތައް ފަރުމާކޮށް ދިނުމުގެ ގާބިލުކަން ލިބޭނެއެވެ. މީގެ ސަބަބުން ފަރުވާއިން ލިބޭ ނަތީޖާ ރަނގަޅުވެ، އުފެދޭ ސައިޑް އިފެކްޓްސް ކުޑަވެގެންދާނެއެވެ. މިސާލަކަށް، ބޭހަކަށް މީހެއްގެ ހަށިގަނޑު ރިއެކްޓްކުރާނެ ގޮތް ކުރިއާލާ ދެނެގަނެވޭނެއެވެ.
. ބަލިތަކުން ރައްކާތެރިވުން: ކުރިމަތިވެދާނެ ބަލިތަކަށް ތައްޔާރުވެ، އެއިން ރައްކާތެރިވުމަށް ކުރިއާލާ ފިޔަވަޅު އެޅުމުގެ ފުރުސަތު ލިބޭނެއެވެ. މިސާލަކަށް، ވަކި ބައްޔެއް ޖެހުމުގެ މާއްދީ ރިސްކު ބޮޑުނަމަ، ދިރިއުޅުމުގެ ވައްޓަފާޅިއަށް ބަދަލުތައް ގެނެސް، ނުވަތަ ވަކި ވެކްސިންތަކެއް ޖަހައިގެން ބަލި ޖެހުމުން ސަލާމަތްވެވޭނެއެވެ.
ޑީ.އެން.އޭގެ ސިއްރުތައް ދެނެގަތުމަށް އޭ.އައި ބޭނުންކުރުމަކީ އިންސާނިއްޔަތަށް ވަރަށް ބޮޑު ފައިދާއެއް ލިބިގެންދާނެ ކަމެކެވެ. މިއީ ސިއްހީ ދާއިރާއަށް އާ އުންމީދެއް ގެނުވައިދޭނެ ކުރިއެރުމެކެވެ. ނަމަވެސް، މިފަދަ ޓެކްނޮލޮޖީ ބޭނުންކުރުމުގައި އިސްލާމީ ޝަރީޢަތާއި، އަދި އިންސާނީ އަޚްލާގީ އުސޫލުތަކަށް ސަމާލުކަން ދިނުން މުހިންމެވެ. ޚާއްސަކޮށް، މީހުންގެ މައުލޫމާތުގެ ސިއްރުކަން ރައްކާތެރިކުރުމާއި، އެއްވެސް އިރެއްގައި ނަސްލީ ތަފާތުކުރުމަށް ނުވަތަ ބޭއިންސާފު ކަންކަމަށް މިފަދަ ޓެކްނޮލޮޖީ ބޭނުންނުކުރުމަށް ސަމާލުވުން ލާޒިމުވެއެވެ.
ހަވާލާ: ސައިންސް ޑެއިލީ 2025