ރާއްޖޭގެ ހާއްސަ އިގުތިސާދީ ސަރަހައްދުގައި ގާނޫނާ ހިލާފަށް ހަރަކާތްތެރިވަމުންދިޔަ ސްރީ ލަންކާގެ ދެ މަސްބޯޓެއް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެސްފިއެވެ.
އެމްއެންޑީއެފުން ބުނީ މި ބޯޓުތައް ހިފަހައްޓާފައި ވަނީ، ސަރަހައްދީ ގައުމުތަކުން ހިއްސާކުރި މައުލޫމާތުގެ ޒަރިއްޔާއިން، އެއްކުރި މައުލޫމާތުގެ އަލީގައި އެމްއެންޑީއެފް ކޯސްޓްގާޑާއި، އެމްއެންޑީއެފް އެއާ ކޯއިން ހިންގި ސަވެއިލަންސް އޮޕަރޭޝަނެއްގެ ތެރެއިން ކަމަށެވެ.
ސްރީލަންކާއަށް ނިސްބަތްވާ މި ބޯޓުތައް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެނެސްފައި ވަނީ މިދިޔަ އަންގާރަ ދުވަހުގެ ހެނދުނު 08:30 ހާއިރު، ހއ. ކެލާގެ އިރުން 51 ނޯޓިކަލް މޭލު ބޭރުގައި ހަރަކާތްތެރިވަނިކޮށެވެ.
އެމްއެންޑީއެފުން ބުނި ގޮތުގައި އެ ދެ ބޯޓު މިހާރު ވަނީ ކުޅުދުއްފުށީ ސިޓީ ބަނދަރަށް ވައްދައި ފުލުހުންނާ ހަވާލުކޮށްފައެވެ. އަދި އެކަމުގެ ތަހުގީގު ފުލުހުންނާ ހަވާލުކޮށްފައިވާ ކަމަށްވެސް ބުންޏެެވެ.
އާންމުކޮށް ރާއްޖެ ސަރަހައްދުން އެ ގޮތަށް ފެންނަ މަސް ބޯޓުތަކުން ގިނަ އަދަދެއްގެ ޑްރަގު ފެނެއެވެ. ކަނޑުމަގުން ރާއްޖެއަށް ޑްރަގު ސްމަގުލް ކުރަން ބޭނުންކުރާ އެއް ގޮތަކީ މަސް ބޯޓުތަކުގައި އެ ތަކެތި ރާއްޖެ އެތެރެކުރުން ކަމަށް ތަފާސްހިސާބުތަކުން ދައްކައެވެ.