ނޭފަތަށް ސުޕްރޭ ކޮށްލައިގެން ކޮވިޑް19 އިން ސަލާމަތްކޮށްދޭނެ ވެކްސިނެއް ޗައިނާއިން އުފައްދައިފިއެވެ. މިވެކްސިން އެމަޖެންސީ ހާލަތުގައި ބޭނުން ކުރުމުގެ ހުއްދަ ވެސް އެގައުމުގެ ސަރުކާރުން ވަނީ ދީފައެވެ.
ޗައިނާގެ ނޭޝަނަލް މެޑިކަލް ޕްރޮޑަކްޓްސް އެޑްމިނިސްޓްރޭޝަނުން ހުއްދަ ދިން ވެކްސިނަކީ ޗެން ވެއީ ނަމަކަށް ކިޔާ ކުންފުންޏަކުން އުފެއްދި ވެކްސިނެކެވެ. ޗެން ވެއި އިން މިވެކްސިން އުފެއްދީ ޗައިނާގެ ބައޮލޮޖިކަލް ކުންފުންޏެއް ކަމަށްވާ ކެންސިނޯއާއި ގުޅިގެންނެވެ.
ވެކްސިން އުފެއްދި ކުންފުނިން ބުނާ ގޮތުގައި ނޭފަތަށް ސުޕްރޭ ކޮށްލައިގެން ކޮވިޑް19 އިން ސަލާމަތްކޮށްދޭ ވެކްސިނެއް އުފައްދާ ބޭނުން ކުރެވޭ ހިސާބަށް ދިއުމަކީ ވަރަށް ބޮޑު ކާމިޔާބެކެވެ. މި ވެކްސިން މަސްގަނޑަށް ޖަހާ ވެކްސިނަށްވުރެ %20 އަގުހެޔޮ ވާނެއެވެ. އަދި ރައްކާކޮށް ބެހެއްޓުމަށްވެސް ފަސޭހަ ވާނެއެވެ.
އެހެންކަމުން މިއީ އެންމެ ފަގީރު ގައުމުތަކާއި އަދި މެދުފަންތީގެ ގައުމުތަކަށް ވެސް ވެކްސިން ދިނުމުގެ ހަރަދު ވަރަށް ބޮޑަށް ކުޑަވެގެން ދާނެ ވެކްސިނެކެވެ. އަދި މިވެކްސިން ޖެހެނީ ނޭފަތައް ސްޕްރޭ ކޮށްލަން ކަމަށް ވާތީ އެއީ ވެސް ވެކްސިން ޖެހުމުގައި ލިބިގެން ދާނެ ވަރަށް ބޮޑު ލުއިކަމެކެވެ.
ބިރުގަތުމާއި ލޭމަނާ ނުވުންފަދަ ކަންކަމުގެ ބިރެއް މި ވެކްސިން އަކުން ނުހުންނާނެއެވެ. އަދި މަސްގަނޑަށް ޖަހާ ވެކްސިނަށްވުރެ މި ވެކްސިންގެ އަސަރު ކުރާލެއް އަވަސް ވާނޭ ކަމަށް ޗައިނާގެ ބައެއް ދިރާސާވެރިން އަންނަނީ ބުނަމުންނެވެ.