ކެންސަރަކީ ދުނިޔޭގެ އެތައް މިލިއަން ބަޔަކަށް ދިރިއުޅުމުގެ ފުރިހަމަ އުފާވެރިކަން ގެއްލުވާލާފައިވާ ނުރައްކާތެރި ބައްޔެކެވެ. މި ބައްޔަށް ފަރުވާ ހޯދުމަށް ސައިންސްވެރިންނާއި ދިރާސާކުރާ ފަރާތްތަކުން ގެންދަވަނީ ގިނަގުނަ މަސައްކަތްތަކެއް ކުރަމުންނެވެ. މި މަސައްކަތްތަކުގެ ތެރެއިން، ދިފާޢީ ނިޒާމް ބަލިކަށިވެފައިވާ ފަރާތްތަކަށް ވެސް ފަރުވާ ދެވޭނެ އާދަޔާޚިލާފު ހައްލެއް މިވަނީ ފެނިފައެވެ.
ޖަޕާންގެ ދިރާސާކުރާ ޓީމަކުން ވަނީ "އޭ.ޔޫ.އެން" ގެ ނަމުން ނަންދީފައިވާ އިންގިލާބީ ކެންސަރު ފަރުވާއެއް ތަރައްޤީކޮށްފައެވެ. މި ފަރުވާގެ އެންމެ މުހިންމު ސިފައަކީ މިއީ ދިފާޢީ ނިޒާމަށް ބަރޯސާނުވާ ބެކްޓީރިއާގެ ފަރުވާއެއް ކަމެވެ. މިހާރުގެ ގިނަ ކެންސަރު ފަރުވާތައް ދިފާޢީ ނިޒާމަށް ބަރޯސާވެފައިވާ އިރު، އޭ.ޔޫ.އެން އަކީ މުޅިން ތަފާތު ގޮތަކަށް މަސައްކަތްކުރާ ފަރުވާއެކެވެ.
ާޫއޭ.ޔޫ.އެން ގެ މަސައްކަތް ކުރަނީ ދެ ބެކްޓީރިއާއެއް ގުޅިގެން މަސައްކަތްކުރުވައިގެންނެވެ. މި ދެ ބެކްޓީރިއާ ގުޅިގެން ކެންސަރުގެ ގޮށްތަކަށް ހަމަލާދީ، އެ ތަންތަން ނައްތާލައެވެ. މި ފަރުވާއިން ލިބޭ އެންމެ ބޮޑު އެއް ކުރިއެރުމަކީ، ބަލިމީހުންގެ ދިފާޢީ ނިޒާމް ބަލިކަށިވެފައިވީ ނަމަވެސް، ކެންސަރުގެ ގޮށްތައް ފަނާކުރުމުގެ ގާބިލިއްޔަތު މި ފަރުވާއަށް ލިބިފައިވުމެވެ. ކީމޯތެރަޕީ ފަދަ ފަރުވާތަކުން ދިފާޢީ ނިޒާމަށް ގެއްލުންވެފައިވާ މީހުންނަށް މި ފަރުވާ އަކީ އުއްމީދުގެ ދޮރެއް ހުޅުވައިދޭނެ ފަރުވާއެކެވެ.
އޭ.ޔޫ.އެން ފަދަ އާދަޔާޚިލާފު ފަރުވާތަކަކީ ކެންސަރާ ދެކޮޅަށް ކުރަމުންދާ މަސައްކަތުގައި ލިބުނު ވަރަށް ބޮޑު ކުރިއެރުމެކެވެ. މިފަދަ ހޯދުންތަކުގެ ސަބަބުން، ކެންސަރު ޖެހިފައިވާ އެތައް ބަޔަކަށް އުއްމީދާއި ބޭސްވެރިކަމުގެ އައު ދޮރުތައް ހުޅުވިގެންދާނެއެވެ. މިއީ އިންސާނިއްޔަތަށް ލިބުނު ބޮޑު ކުރިއެރުމެކެވެ.
ހަވާލާ: ސައިންސް ޑެއިލީ 2025