ބޮލީވުޑްގެ އެންމެ މަޝްހޫރު އެއް ތަރި ސަލްމާން ހާން އަށް މިއަދު 60 އަހަރު ފުރިއްޖެއެވެ. 1965 ވަނަ އަހަރުގެ ޑިސެމްބަރު މަހުގެ 27 ވަނަ ދުވަހު އުފަންވި ސަލްމާން ހާން އަކީ އިންޑިއާގެ ފިލްމީ ދާއިރާގައި އެންމެ ނުފޫޒުގަދަ އެއް ފަންނާނެވެ. އުމުރުން 60 އަހަރު ވީނަމަވެސް، އޭނާ ފެންނަނީ އަދިވެސް ވަރަށް ޒުވާންކޮށް، ހަށިގަނޑު ރީތިކޮށް ބަހައްޓާ ތަރިއެއްގެ ގޮތުގައެވެ.
ސަލްމާން ހާންގެ އުފަންދުވަހާ ގުޅިގެން އޭނާގެ ފޭނުންނާއި ބޮލީވުޑްގެ އެހެން ތަރިން އަންނަނީ ސޯޝަލް މީޑިއާ މެދުވެރިކޮށް ތަހުނިޔާ ކިޔަމުންނެވެ. އާންމުކޮށް ކޮންމެ އަހަރަކު ވެސް އޭނާ ދިރިއުޅޭ ގޭދޮށަށް ގިނަ އަދަދެއްގެ މީހުން އެއްވެ އުފަންދުވަސް ފާހަގަކުރެއެވެ. ފިލްމީ ދާއިރާގައި 35 އަހަރަށް ވުރެ ގިނަ ދުވަސް ވެފައިވާއިރު، އޭނާގެ ފިލްމުތަކަށް ލިބޭ ތަރުހީބާއި މަގުބޫލުކަމަށް ކުޑަވެސް ބަދަލެއް އައިސްފައެއް ނުވެއެވެ.
ގިނަ ބަޔަކު ސަލްމާން ހާން ދެކެނީ ހިތްހެޔޮ އަދި މީހުންނަށް އެހީތެރިވާ މީހެއްގެ ގޮތުގައެވެ. އުމުރުން ދުވަސް ވީނަމަވެސް، އޭނާ ކުޅޭ އެކްޝަން ފިލްމުތަކަށް ބޮކްސް އޮފީހުގައި ބޮޑު ކާމިޔާބީއެއް ލިބެއެވެ. މިހާރުވެސް އޭނާ އަންނަނީ ބޮޑެތި ފިލްމުތަކެއްގައި މަސައްކަތް ކުރަމުންނެވެ. ސަލްމާން ހާން އަކީ އަދިވެސް ކައިވެންޏެއް ނުކޮށް ހުރި ތަރިއެއްކަން ފާހަގަކޮށްލެވެއެވެ.