ބޮލީވުޑްގެ މަޝްހޫރު އެކްޓަރު ސަލްމާން ހާން ކޯޓަށް ހާޒިރުވުމަށް އިންޑިއާގެ ކޯޓަކުން އަމުރުކޮށްފިއެވެ.
މީޑިއާ ރިޕޯޓުތައް ބުނާ ގޮތުގައި އޭނާ ކޯޓަށް ހާޒިރުވާން އަންގާފައިވަނީ ސުޕާރީ ބްރޭންޑެއް އިޝްތިހާރުކުރި މައްސަލައެއްގައެވެ. މި މައްސަލަ ކޯޓަށް ހުށަހެޅީ އާންމު ފަރާތަކުން ކަމަށްވާއިރު، މިއީ ގިނަ ބައެއްގެ ސަމާލުކަން ލިބިފައިވާ ކަމެކެވެ.
މި މައްސަލަ ފެންމަތިވެފައިވަނީ ސިއްހަތަށް ގެއްލުންހުރި ތަކެތި މަޝްހޫރު މީހުން ބޭނުންކޮށްގެން ޕްރޮމޯޓުކުރާ ކަމަށް ބުނެއެވެ. ޝަކުވާ ހުށަހެޅި ފަރާތުން ބުނާ ގޮތުގައި ޒުވާނުންނަށް ނުރަނގަޅު އަސަރުކުރާ ފަދަ ތަކެތި، މަޝްހޫރު ފަންނާނުން އިޝްތިހާރު ކުރުމަކީ ކަންބޮޑުވާ ކަމެކެވެ. ކޯޓުން ވަނީ މިކަމާ ގުޅޭގޮތުން ޖަވާބުދާރީވުމަށް ސަލްމާން ހާންއަށް އަންގާފައެވެ.
އިންޑިއާގެ ސަރުކާރުން ވެސް ވަނީ މިފަދަ އިޝްތިހާރުތައް ކޮންޓްރޯލް ކުރުމަށް މަސައްކަތްތަކެއް ފަށާފައެވެ.
މީގެ ކުރިން ބޮލީވުޑްގެ ބައެއް އެހެން ތަރިންނަށް ވެސް ވަނީ އާންމުންގެ ފާޑުކިޔުންތައް އަމާޒުވުމުން، ޕާން މަސާލާ ބްރޭންޑްތަކާއެކު ހަދާފައިވާ އެއްބަސްވުންތައް އުވާލަން ޖެހިފައެވެ. މި މައްސަލައިގައި ސަލްމާން ހާން އަމަލުކުރާނެ ގޮތެއް އަދި ހާމަކޮށްފައެއް ނުވެއެވެ.