މި ހިނގާ އަހަރުގެ މިހާތަނަށް 21 ކުއްޖަކު ކީރިތި ގުރުއާން ހިތުދަސްކޮށް، އެކަމުގެ އިމްތިހާނު ފުރިހަމަކޮށްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު މިކަން ހާމަކުރެއްވީ އަންނަ ރޯދަ މަހު ބާއްވާ ހާފިޒުން ދަސްވެނިވުމުގެ ހަފްލާއާ ގުޅޭގޮތުން މައުލޫމާތު ދެއްވަމުންނެވެ.
މިނިސްޓަރު ޝަހީމް ވިދާޅުވި ގޮތުގައި އިމްތިހާނު ނިންމި ކުދިންގެ އިތުރުން، މިހާރު ވެސް ހަތް ކުއްޖަކު އަންނަނީ އިމްތިހާނު ހަދަމުންނެވެ. އަދި އިތުރު އެއް ކުއްޖަކު އިމްތިހާނަށް ތައްޔާރުވަމުން އަންނަކަން ވެސް މިނިސްޓަރު ފާހަގަކުރެއްވިއެވެ. މި އަދަދުތަކާ އެކު، މި އަހަރު ދަސްވެނިވާ ހާފިޒުންގެ ޖުމްލަ އަދަދު 30 އަށް އަރާނެއެވެ. މިއީ 24 ހާފިޒުން ދަސްވެނިވި މިދިޔަ އަހަރާ އަޅާބަލާއިރު އިތުރުވުމެކެވެ.
ހާފިޒުންގެ ދަސްވެނިވުމުގެ ޖަލްސާ ބޭއްވުމަށް ހަމަޖެހިފައި ވަނީ އަންނަ ރޯދަ މަހުގެ 27 ވިލޭރޭއެވެ. މި ރަސްމިއްޔާތަކީ ކޮންމެ އަހަރަކު ވެސް ބާއްވާ ގޮތަށް މިދިޔަ އަހަރުން ފެށިގެން ކުރިއަށްގެންދާ ހަފްލާއެކެވެ. މީގެ އިތުރުން، އަންނަ އަހަރު 42 ހާފިޒުން ރައީސުލްޖުމްހޫރިއްޔާގެ މެޑަލް ހާސިލްކުރާނެ ކަމަށް ލަފާކުރެވޭ ކަމަށް ވެސް މިނިސްޓަރު ވަނީ ވިދާޅުވެފައެވެ.