ފަރަންސޭސި ވިލާތުގެ ހޮސްޕިޓަލެއްގައި މަސައްކަތްކުރި ހޭނައްތާ ޑޮކްޓަރަކު، ގިނަ އަދަދެއްގެ ބަލި މީހުންނަށް ޒަހަރުދީ އޭގެ ތެރެއިން 12 މީހަކު މަރާލި މައްސަލައެއްގައި އުމުރު ދުވަހަށް ޖަލަށް ލުމަށް ހުކުމްކޮށްފިއެވެ. ފްރެޑްރިކް ޕެޝިއޭ ނަމަކަށް ކިޔާ އުމުރުން 53 އަހަރުގެ މި ޑޮކްޓަރުގެ މައްޗަށް މި ހުކުމް އިއްވީ 30 މީހަކަށް ޒަހަރު ދިންކަން ސާބިތުވުމުންނެވެ. މިއީ ފަހުގެ ތާރީހެއްގައި ފަރަންސޭސި ވިލާތުގައި ހިނގި މިފަދަ އެންމެ ބޮޑު ޖިނާއީ އެއް މައްސަލަ ކަމަށް މީޑިއާ ރިޕޯޓުތައް ބުނެއެވެ.
ޝަރީއަތުގައި ހާމަވެފައިވާ ގޮތުގައި މި ޑޮކްޓަރު ވަނީ އޮޕަރޭޝަންތަކުގައި ބޭނުންކުރާ އައިވީ ބޭގްތަކަށް ހިތް ހުއްޓޭ ޒާތުގެ ބާރުގަދަ ބޭސްތައް އަޅައި، އެ ތަކެތި ތަޣައްޔަރުކޮށްފައެވެ. ޕްރޮސެކިއުޓަރުން ބުނި ގޮތުގައި އޭނާ މިކަން ކުރީ، ބަލި މީހުންގެ ހާލު ދެރަވާ ވަގުތު އެ މީހުން ސަލާމަތްކޮށް، "ބަތަލެއް" ގެ ގޮތުގައި ލޭބަލްވުމަށާއި އޭނާއާ ޖެހިފައިތިބި އެހެން ޑޮކްޓަރުންގެ އަގު ވައްޓާލުމުގެ ބޭނުމުގައެވެ. އޭނާ ޒަހަރު ދިން މީހުންގެ ތެރޭގައި ހަތަރު އަހަރުގެ ކުޑަކުއްޖަކު ވެސް ހިމެނެއެވެ.
"ޑޮކްޓާ ޑެތު" ގެ ނަމުން މީޑިއާތަކުގައި މަޝްހޫރުވެފައިވާ ޕެޝިއޭ ވަނީ މުޅި ޝަރީއަތުގައި ވެސް އޭނާގެ ކުށެއް ނެތް ކަމަށް ބުނެ ދައުވާތަކަށް އިންކާރުކޮށްފައެވެ. ނަމަވެސް ހެކިތަކަށް ބެލުމަށްފަހު ކޯޓުން ވަނީ އޭނާ ކުށްވެރިވާ ކަމަށް ކަނޑައަޅައި، އުމުރު ދުވަހުގެ ޖަލު ހުކުމެއް އިއްވާފައެވެ. ފަރަންސޭސި ގާނޫނު އޮންނަ ގޮތުން މި ހުކުމާއެކު މަދުވެގެން 22 އަހަރު އޭނާ ޖަލުގައި ހޭދަކުރަން ޖެހޭނެއެވެ.