އިންސާނާގެ ހަށިގަނޑު ދުޅަހެޔޮކަންމަތީ ދެމެހެއްޓުމަށްޓަކައި ނިދުމަކީ ކޮންމެހެން ބޭނުންވާ މުހިންމު ކަމެއް ކަމުގައި ވިޔަސް، މިޒަމާނުގެ ދިރިއުޅުމުގެ ވައްޓަފާޅި ހުންނަ ގޮތުން ގިނަ ބަޔަކު މިކަމަށް އިހުމާލުވެއެވެ.
ސިއްހީ މާހިރުން އަންދާޒާ ކުރައްވާ ގޮތުގައި ދުނިޔޭގެ އާބާދީގެ ތިންބައިކުޅަ އެއްބައި މީހުންނަކީ އެކަށީގެންވާ ވަރަށް ނިދި ނުލިބޭ މީހުންނެވެ. ހަމަ ނިދި ނުލިބުމަކީ ހަމައެކަނި ވަރުބަލިވުން ކަމަށް ހީކުރެވުނަސް، މިއީ ފުރާނައަށް ނުރައްކާވާ ފަދަ ސިއްހީ ބޮޑެތި މައްސަލަތަކަށް މަގުފަހިވާ ކަމެކެވެ.
އެމެރިކާގެ ސެންޓަ ފޯ ޑިޒީޒް ކޮންޓްރޯލް (ސީޑީސީ) އިން ހާމަކޮށްފައިވާ ދިރާސާތަކުން ދައްކާ ގޮތުގައި، ރޭގަނޑު 7 ގަޑިއިރަށްވުރެ މަދުން ނިދާ މީހުންނަށް ހިތުގެ ބަލިތައް ޖެހުމުގެ ފުރުސަތު ބޮޑެވެ. މި ދިރާސާތަކުން ދައްކާ ގޮތުގައި ނިދި މަދުވުމަކީ ލޭގެ ޕްރެޝަރު މައްޗަށް ދިއުމާއި ހަކުރު ބަލި އަދި އާދަޔާ ހިލާފަށް ފަލަވުމަށް މެދުވެރިވާ މައިގަނޑު އެއް ސަބަބެވެ. ހާއްސަކޮށް ރޭގަނޑު 5 ގަޑިއިރަށްވުރެ މަދުން ނިދާ މީހުންނަށް، އާދައިގެ ވަރަށް ނިދާ މީހުންނާ އަޅާބަލާއިރު ހިތުގެ މައްސަލަތައް ދިމާވުމުގެ ފުރުސަތު 20 ޕަސަންޓު އިތުރުވެގެންދާ ކަމަށް ދިރާސާގެ އަލީގައި ހާމަވެފައިވެއެވެ.
ދުނިޔޭގެ މަޝްހޫރު ނިއުރޯސައިންޓިސްޓް އަދި ނިދުމާ ބެހޭ އެކްސްޕާޓެއް ކަމަށްވާ މެތިއު ވޯކާ ވިދާޅުވެފައިވާ ގޮތުގައި، "ނިންޖަކީ ހަށިގަނޑަށް ގުދުރަތީ ގޮތުން ލިބިފައިވާ އެންމެ މޮޅު ބޭހެވެ." އޭނާ ފާހަގަކުރެއްވި ގޮތުގައި ހަމަ ނިދި ނުލިބުމުން ސިކުނޑީގެ މަސައްކަތަށް ވަރަށް ބޮޑަށް އަސަރުކުރެއެވެ. "ރެއަކު އެންމެ 4 ނުވަތަ 5 ގަޑިއިރު ނިދާނަމަ، ޖެހިގެން އަންނަ ދުވަހު ހަށިގަނޑުގައި ކެންސަރު ސެލްތަކާ ދެކޮޅަށް މަސައްކަތްކުރާ 'ނެޗުރަލް ކިލާ ސެލްސް' ގެ މަސައްކަތް 70 ޕަސަންޓަށް ދަށްކޮށްލާ،" މެތިއު ވޯކާ ވިދާޅުވިއެވެ.
މިކަންކަމަށް ރިއާޔަތްކޮށް ޑޮކްޓަރުން ވަނީ ނިދުމުގެ އާދަތައް ރަނގަޅު ކުރުމަށް މުހިންމު ލަފާތަކެއް ދެއްވާފައެވެ. ސިއްހީ މާހިރުން ލަފާދެއްވާ ގޮތުގައި އެންމެ މުހިންމު ކަމަކީ ނިދުމުގެ މަދުވެގެން އެއް ގަޑިއިރު ކުރިން ފޯނާއި، ޓީވީ އަދި ކޮމްޕިއުޓަރު ފަދަ ސްކްރީންތަކާ ދުރަށް ދިއުމެވެ. މި ތަކެތިން ނުކުންނަ އަލީގެ ސަބަބުން، ނިދަން އެހީތެރިވެދޭ ހޯމޯންއެއް ކަމަށްވާ 'މެލަޓޮނިން' އުފެއްދުމަށް ހުރަސްއަޅައެވެ. އަދި ނިދާ ކޮޓަރިއަކީ އަނދިރި، ފިނި ތަނަކަށް ހެދުމަށް ވެސް ޑޮކްޓަރުން އިރުޝާދު ދެއްވައެވެ.
މީގެ އިތުރުން، ދުވާލުގެ ވަގުތުތަކުގައި ކޮފީ ނުވަތަ ކެފެއިން ހިމެނޭ ތަކެތި ބޭނުންކުރުން މަދުކުރުމަށް ވެސް ޑޮކްޓަރުން ބާރުއަޅުއްވައެވެ. ހާއްސަކޮށް މެންދުރުފަހު 2:00 ގެ ފަހުން ކޮފީ ބުއިމަކީ ރޭގަނޑުގެ ނިދި ހަރާބުވުމަށް މެދުވެރިވާ ކަމެކެވެ.
ސިއްހަތު ރަނގަޅު މީހެއްގެ ގޮތުގައި ހުރުމަށްޓަކައި، ކެއިންބުއިމާއި ކަސްރަތަށް ދޭ ސަމާލުކަން ނިދުމަށް ވެސް ދޭންޖެހޭ ކަމަށް ހެލްތް އެކްސްޕާޓުން އިއްތިފާގުވެއެވެ.