ކުޅުދުއްފުށި ސިޓީގައި ވިޔަފާރިކުރާ ތަންތަނުގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތުގެ ތެރެއިން، ފިހާރަ ބަންދުކުރާއިރު އެތެރޭގައި ފައިސާ ނުބެހެއްޓުމަށް ފުލުހުން އިލްތިމާސްކޮށްފި އެވެ. މިއީ ވައްކަމުގެ މައްސަލަތައް މަދުކޮށް، ވިޔަފާރިވެރިން ހޭލުންތެރިކުރުވުމަށް ފުލުހުން ހިންގި ހާއްސަ ހަރަކާތެކެވެ.
މި މަހުގެ ނުވަ ވަނަ ދުވަހު ކުޅުދުއްފުށީ ޕޮލިސް ސްޓޭޝަނުން އިސްނަގައިގެން ކުރިއަށް ގެންދިޔަ މި ޕްރޮގްރާމުގައި، އެ ރަށުގެ އެކި ފިހާރަތަކަށް ފުލުހުން ވަނީ ޒިޔާރަތްކޮށްފަ އެވެ. އަދި އެ ތަންތަނުގެ ވެރިންނާއި މުވައްޒަފުންނާ ބައްދަލުކޮށް، ވިޔަފާރީގެ މާހައުލު ރައްކާތެރިކުރުމަށް އެޅިދާނެ ފިޔަވަޅުތަކާ ގުޅޭގޮތުން މުހިންމު މައުލޫމާތުތަކެއް ވަނީ ހިއްސާކޮށްފަ އެވެ.
ވިޔަފާރިތަކުން ވައްކަން ކުރުން ހުއްޓުވުމަށްޓަކައި، ފައިސާ ގެންގުޅުމުގައި މިހާރަށް ވުރެ ބޮޑަށް ސަމާލުވުމަށް ފުލުހުން ވަނީ ނަސޭހަތްތެރިވެފަ އެވެ. ހާއްސަކޮށް ދުވަހުގެ ވިޔަފާރި ނިންމާލުމަށް ފަހު ފިހާރަ ބަންދުކުރާއިރު، ވަގުންނަށް ފެންނާނެހެން ނުވަތަ ފަސޭހައިން ނެގޭނެހެން ފިހާރަ ތެރޭގައި ފައިސާ ނުބެހެއްޓުމަށް ފުލުހުން ވަނީ ވިޔަފާރިވެރިންގެ ކިބައިން އެދިފަ އެވެ.
މި ހަރަކާތުގައި ފުލުހުން ވަނީ ފިހާރަތަކުގައި ހަރުކޮށްފައި ހުންނަ ސީސީޓީވީ ކެމެރާތައް ހުރީ ރަނގަޅަށް މަސައްކަތްކުރާ ހާލަތުގައިތޯ ބެލުމަށް ވެސް އިރުޝާދު ދީފަ އެވެ. މީގެ އިތުރުން ރޭގަނޑު ވިޔަފާރި ބަންދުކުރުމަށް ފަހު ދާއިރު، ފިހާރަ ތެރެ އެއްކޮށް އަނދިރިކޮށްލުމުގެ ބަދަލުގައި އަލިކަމެއް ބެހެއްޓުމުގެ މުހިންމުކަން ފުލުހުން ފާހަގަކުރި އެވެ.
ކުޅުދުއްފުށި ސިޓީގައި ކުށްމަދުކޮށް، ރައްޔިތުންނަށާއި ވިޔަފާރިވެރިންނަށް އަމާން މާހައުލެއް ގާއިމުކޮށްދިނުމަށް ފުލުހުން އަންނަނީ މިފަދަ ގިނަ ހަރަކާތްތަކެއް ހިންގަމުންނެވެ. މި ޕްރޮގްރާމުގެ މައިގަނޑު މަގުސަދަކީ ވިޔަފާރިވެރިން ހޭލުންތެރިކުރުވައި، މުދަލާއި ފައިސާ ރައްކާތެރިކުރުމަށް ބާރުއެޅުމެވެ.