ކޮފީއަކީ މުޅި ދުނިޔޭގައިވެސް އަދި ދިވެހިންގެ ތެރޭގައިވެސް އެންމެ މަގުބޫލު އެއް ބުއިމެވެ. ގިނަ ބަޔަކު ކޮފީ ބޮނީ ހަށިގަނޑަށް ތާޒާކަން ގެނައުމަށާއި، މަސައްކަތުގެ މައިދާނުގައި ހޭލުންތެރިކަން އިތުރުކުރުމުގެ ބޭނުމުގައެވެ. ނަމަވެސް، ފަހުގެ ސައިންޓިފިކް ދިރާސާތަކުން ދައްކާގޮތުގައި ކޮފީއަކީ ހަމައެކަނި ނިދި ފިލުވައިދޭ އެއްޗެއް ނޫނެވެ.
ސައިންސު ޑެއިލީގައި ބުނެފައިވާގޮތުން ލެބޯޓްރީ ތަކުގައި ހެދިފައިވާ އާ ދިރާސާތަކުން ދައްކާގޮތުގައި، ރޯސްޓްކޮށްފައިވާ ކޮފީގައި ހިމެނޭ ބައެއް މާއްދާތަކަކީ ލޭގައި ހަކުރު ހުންނަ މިންވަރު ކޮންޓްރޯލް ކުރުމަށް ވަރަށް ބޮޑު އެހީއަކަށް ވެއެވެ. މި ދިރާސާތަކުގައި ބޭނުންކުރި "ސެލް މޮޑެލް" ތަކުން ފެނުނު ގޮތުގައި، ކޮފީގައި އަލަށް ހޯދުނު މި މާއްދާތަކުގެ މަސައްކަތް، ހަކުރު ބައްޔަށް އާންމުކޮށް ބޭނުންކުރާ ބައެއް ބޭސްތަކަށްވުރެވެސް ފައިދާހުރިކަން ވަނީ ފާހަގަކުރެވިފައެވެ.
ކޮފީ ރޯސްޓް ކުރުމުގެ މަރުހަލާގައި އުފެދޭ މި ހާއްސަ މާއްދާތަކުން، ހަށިގަނޑުގައި އިންސިއުލިން މަސައްކަތްކުރާ މިންވަރު ރަނގަޅުކޮށްދީ، ލޭގައި ހަކުރު ގިނަވިޔަނުދީ ހިފަހައްޓައިދެއެވެ. މިއީ ޓައިޕް-2 ޑައިބެޓީސް ނުވަތަ ހަކުރު ބަލީގެ ނުރައްކާ އޮތް މީހުންނަށް ލިބުނު ވަރަށް ބޮޑު އުންމީދެކެވެ.
މިއީ އަދި ލެބޯޓްރީ މަރުހަލާގައި ހޯދިފައިވާ ހޯދުންތަކެއް ކަމުގައި ވީނަމަވެސް، މިއިން އެނގެނީ އަޅުގަނޑުމެން ކޮންމެ ދުވަހަކު ބޮއެ އުޅޭ ކޮފީއަކީ އޭގެ ސަބަބުން ސިއްހީ ގިނަ ފައިދާތަކެއް ލިއްބައިދޭ ބުއިމެއް ކަމެވެ. ހަކުރު ބަލިން ރައްކާތެރިވުމަށާއި، ލޭގައި ހަކުރު ހުންނަ މިންވަރު ހަމަހަމަކޮށް ބެހެއްޓުމަށް ކޮފީއަކީ ބޭނުންތެރި ބުއިމަކަށް ވެދާނެކަން މި ދިރާސާއިން ސާބިތުވެއެވެ.
އެހެންކަމުން، ކޮފީ ބުއިމަކީ ހަމައެކަނި ހޭލާ ހުރުމަށް ކުރާ ކަމެއްގެ ބަދަލުގައި، އެއީ ދުޅަހެޔޮ ސިއްހަތަކަށް އެޅޭ ބާރަކަށް ހެދިދާނެއެވެ. ނަމަވެސް ކޮފީ ބޭނުންކުރުމުގައި ހަކުރާއި ކިރު ގިނައިން އެޅުމުގެ ބަދަލުގައި، ސިއްހީ ގޮތުން ފައިދާހުރި ގޮތަކަށް ކޮފީ ބޭނުންކުރުމަށް ސަމާލުކަން ދޭންޖެހެއެވެ.