ރެއާލް މެޑްރިޑުން ދާދިފަހުން ވަކިކުރި ކޯޗު ޒާބީ އޮލޮންސޯއަށް ލިބޭނީ މި ހިނގާ ސީޒަނަށްވާ މުސާރަ އެކަނިކަމަށާއި މުޅި ކޮންޓްރެކްޓްގެ ޖުމްލަ އަދަދު ނުލިބޭނެކަމަށް ފުޓްބޯޅަ ޚަބަރުތައް ތާޒާކަމާއެކު ގެނެސްދޭ ނޫސްވެރިޔާ ފެބްރީޒިއޯ ރޮމާނޯ ހާމަކޮށްފިއެވެ.
ފެބްރީޒިއޯގެ ސޯޝަލް މީޑިއާގައި ހިއްސާކޮށްފައިވާ ގޮތުގައި ޒާބީ އޮލޮންސޯއާއި ރެއާލްއާ ދެމެދު ވެވުނު އެއްބަސްވުމުގައި ވާގޮތުން ފުރަތަމަ ސީޒަނުގައި ކޯޗުކަމުން ވަކިކޮށްފިނަމަ، ލިބޭނީ ހަމައެކަނި އެ ސީޒަނަށްވާ ފައިސާކަމަށާއި ކޮންޓްރެކްޓްގެ ބާކީ އޮންނަ މުއްދަތަށްވާ ފައިސާ ނުލިބޭނެކަމަށެވެ. މިއީ އެ އެއްބަސްވުމުގައި ހިމެނޭ ޚާއްޞަ މާއްދާއެއްގައި އެގޮތަށް ހިމެނިފައިވުމުން ވާނެގޮތްކަމުގައިވެސް ފެބްރީޒިއޯވަނީ ހިއްސާ ކޮށްފައެވެ.
ރެއާލް މެޑްރިޑްގެ ކޯޗުކަމުން އޮލޮންސޯ ވަކިކޮށްފައިވަނީ ހޯމަދުވަހުއެވެ. ރެއާލްއިން މި ނިންމުން ނިންމާފައިވަނީ ސްޕެނިސް ސުޕަރކަޕްގެ ފައިނަލުގައި ވާދަވެރި ބާސެލޯނާ ކައިރިން ހިތްދަތި ގޮތަކަށް ބަލިވި މެޗަށްފަހުއެވެ. އަދި ހަމަ އެދުވަހު ރެއާލްގެ ކޯޗަކަށް ރެއާލް މެޑްރިޑް އަދި ލިވަޕޫލުގެ ކުރީގެ ޑިފެންޑަރ އަލްވާރޯ އަރްބެލޯއާ ވަނީ ހަމަޖައްސާފައެވެ.