ލޯކަލް ކައުންސިލް އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ ހޮވުމަށް ބާއްވާ އިންތިހާބު އަންނަ އޭޕްރިލް މަހު އޮންނާނެއެވެ. މިހާރުވެސް އެ އިންތިހާބުތަކަށް ކުރިމަތިލާ ކެންޑިޑޭޓުން، އެ ކެންޑިޑޭޓުންގެ ނަންތައްވަނީ އާންމުކުރަން ފަށާފައެވެ. ސިޔާސީ ޕާޓީތަކުގެ އެތެރޭގެ އިންތިހާބުތައް ބައެއް ޕާޓީތަކުން ނިމި، އެ ޕާޓީއަކުން ނުކުންނަ ކެންޑިޑޭޓުންވަނީ އިޢުލާނުވެސް ކޮށްފައެވެ. ދެން ހުރި ޕާޓީތަކުން އެ މަސައްކަތް ކުރަމުން އަންނައިރު، އަމިއްލަގޮތުން ކުރިމަތިލާ ފަރާތްތަކުން ފޯމާއެކު ހުށަހަޅަންޖެހޭ 50 މީހުންގެ ސޮއި ހޯދުމުގެ މަސައްކަތް ބާރަށް ކުރިޔަށް ގެންދެއެވެ.
ދިވެހިރާއްޖޭގެ ތާރީޚުގައި މީގެ ކުރިންވެސް އެކި ކަންކަމުގައި ވޯޓުލުން ކުރިޔަށް ގެންދެވިފައެވެ. ކެމްޕެއިންތައްވެސް ފޯރީގައި ގެންގޮސްފައި އެބަ ހުއްޓެވެ. ނަމަވެސް، ރާއްޖެއަށް ޑިމޮކްރަސީ ތަޢާރަފްވުމަށްފަހު ބާއްވަންފެށި އިންތިހާބުތަކަކީ ކުރިއާ އަޅާ ބަލާއިރު ވާދަވެރި، ފޯރިގަދަ، އަދި އޭގެ ކުރިން ތަޖުރިބާ ކުރެވިފައިނުވާ އެތައްކަމެއް ތައާރަފްވެގެންދިޔަ އިންތިހާބުތަކެކެވެ. ދެބައޮޑުވުމާއި، ރިޝްވަތުބެހުމާއި، އާއިލީ ގުޅުންތައް ކެނޑުމާއި، ތަޅާފޮޅުމާއި، އަހުލާޤީ މިންގަނޑުން ބޭރުވުމާއި ދޭދޭ ގުޅުންތައް ހީނަރުވުންތައް އާންމުވެގެން އައިސްފައިވަނީ މިދެންނެވި ގޮތަށް ޑިމޮކްރަސީއަށްފަހު އައި އިންތިހާބުތަކުންނެވެ.
ކުރިޔަށް މިއޮތީ އަނެއްކާވެސް ސިޔާސީ ދުވަސްކޮޅެކެވެ. އޭޕްރިލްގެ ކުރިޔަށް މިއޮތް ދުވަސްތައްވާނީ ސިޔާސީ ހަލަބޮލި ދުވަސްތަކަކަށެވެ. މިހާރުވެސް ކޮޅުމަތި ފެންނަންފަށައިފިއެވެ. ރަސްމީކޮށް އެއްވެސް ކެމްޕެއިންއެއް ނުފެށިނަމަވެސް، މީސްމީޑިއާގައި އެކަކު އަނެކަކަށް ބަސްއުކުމާއި، ދައްކަން ނުޖެހޭ އެތައް ވާހަކައެއް މިހާރުވެސް ފެންމަތިވަމުންދެއެވެ.
އިންތިހާބުތަކާ ކުރިމަތިލާއިރު ވިސްނަންޖެހޭ ކަންތައްތަކެއް އެބަހުއްޓެވެ. އިންތިހާބަށް ކުރިމަތިލާ ފަރާތްތަކާއި ކެމްޕެއިން ޓީމްތަކުންނާއި، އާންމުން ސަމާލުކަން ދޭންޖެހޭ ކަންތައްތަކަށް ނަޒަރު ހިންގާލަމާ ހިނގާށެވެ. ޕާޓީތަކުން، ނުވަތަ އިންތިހާބަށް ކުރިމަތިލާ ފަރާތްތަކުން ކުރިމަތިލާ ކެންޑިޑޭޓުން ކަނޑައަޅާއިރުވެސް އާންމު މަސްލަހަތަށް ބެލުމާއި، ޑިމޮކްރަސީގެ ހަމަތަކަށް ރިޢާއަތްކުރުމަކީ މުހިންމުކަމެކެވެ.
އެހެން ނޫންނަމަ، ރާއްޖެކަހަލަ ކުދިކުދި މުޖުތަމަޢުތައް ހިމެނޭ ރަށްތަކުގައި ވަރަށް ގިނަ އިޖުތިމާއީ މައްސަލަތައް ދިމާވާނެއެވެ. ކެމްޕެއިން ޓީމުތަކުން ކެމްޕެއިން ކުރިޔަށް ގެންދާއިރުވެސް، ދޭދޭ ގުޅުންތައް ހީނަރުނުވާނޭ ގޮތަށް، އިޖުތިމާއީ މިންގަނޑުތަކަށް ފެތޭ ގޮތަށް، މުޖުތަމައުގެ މަސްލަހަތު ނުގެއްލޭ ގޮތަށް ކެމްޕެއިންތައް ކުރިޔަށް ގެންދިޔުން މުހިންމެވެ. ދެން އޮތީ ރައްޔިތު މީހާއެވެ. އިންތިހާބުތައް އައިސް، ދާނެކަން ދަނެ، އިންތިހާބެއް ނިމުނަސް، އާއިލީ އަދި އެކުވެރި ގުޅުންތަކަށް ބުރޫ ނާރާނޭ ގޮތަށް ޢަމަލުތައް ބެހެއްޓުން މުހިންމެވެ. އެހެން ނޫންނަމަ، ދުވަސްވީ ރަހުމަތްތެރިކަން ގެއްލި، ލޭގެ ގުޅުން ކެނޑި ނުވަތަ ހީނަރުވެގެންދާނެއެވެ. އޭގެ ބަދަލުގައި ތިމާ ތާއިދުކުރާ ޕާޓީއަކަށް ވޯޓު ދިނަސް، އަދި ކެމްޕެއިން ކުރިޔަސް، އިންތިހާބު ނިމުނީމާ އެއް ސުފުރާމަތިން ކާން އެރޭވަރު ވާންވާނެއެވެ.