އަލްޒައިމާ ބައްޔަކީ އުމުރުން ދުވަސްވުމުން ކުރިމަތިވާ ހަނދާން ނެތޭ ބަލިތަކުގެ ތެރެއިން އެންމެ ނުރައްކާތެރި އަދި އެންމެ އާންމު އެއް ބައްޔެވެ. މި ބަލީގެ އަލާމާތްތައް ފާޅުވާން ފަށާއިރު، ގިނަ ފަހަރަށް ސިކުނޑިއަށް ހުންނަނީ ބޮޑެތި ގެއްލުންތަކެއް ލިބިފައެވެ. ނަމަވެސް، ދާދި ފަހުން ސައިންސްވެރިން ކުރި ދިރާސާއަކުން ވަނީ، ބަލި ދެނެގަނެވުމުގެ މާ ކުރިން ސިކުނޑިން ފޮނުވާ "ވަންހަނާ" ސިގްނަލެއްގެ އެހީގައި މި ބަލި ދެނެގަނެވިދާނެ ކަމުގެ އުންމީދީ ހެއްކެއް ހޯދާފައެވެ.
ސައިންސު ޑެއިލީގައި ބުނެފައިވާގޮތުން ދިރާސާވެރިން ހޯދި މި ހޯދުމަކީ ސިކުނޑީގެ މަސައްކަތްތައް ހުންނަ ގޮތް ނުވަތަ "ބްރެއިން އެކްޓިވިޓީ ޕެޓާން" އަށް އަންނަ ބަދަލުތަކެއްގެ މައްޗަށް ބިނާވެފައިވާ ހޯދުމެކެވެ. މި ހޯދުމުގެ ސަބަބުން، އާދައިގެ ގޮތަކަށް ހަނދާން ބަލިވުމުގެ މައްސަލަ ނުވަތަ "މައިލްޑް ކޮގްނިޓިވް އިމްޕެއާމަންޓް" ހުންނަ މީހުންގެ ތެރެއިން ކުރިމަގުގައި އަލްޒައިމާ ބައްޔަށް ބަދަލުވާނީ ކޮން ބައެއްކަން ދެނެގަތުމުގެ ފުރުސަތު ވަނީ ބޮޑުވެފައެވެ. މިއީ ބަލިޖެހުމުގެ އެތައް އަހަރެއް ކުރިން ބަލީގެ ނުރައްކާ އޮތް މިންވަރު ދެނެގަތުމަށް ލިބުނު ވަރަށް މުހިންމު ކުރިއެރުމެކެވެ.
މި ދިރާސާގައި ބޭނުންކޮށްފައިވަނީ ސިކުނޑީގެ ނިއުރޯންތަކުން ފޮނުވާ އިލެކްޓްރިކަލް ސިގްނަލްތައް ދިރާސާކުރާ ޓެކްނޮލޮޖީއެކެވެ. ސައިންސްވެރިން ފާހަގަކުރި ގޮތުގައި، އަލްޒައިމާ ބަލީގެ ފުރަތަމަ މަރުހަލާގައި ހުންނަ މީހުންގެ ސިކުނޑީގެ ވަކި ސަރަހައްދުތަކަކުން ފޮނުވާ ސިގްނަލްތަކަށް އާދަޔާ ހިލާފު ބަދަލުތަކެއް އާދެއެވެ. މި ބަދަލުތަކަކީ އާދައިގެ ޓެސްޓުތަކުން ފާހަގަނުކުރެވޭ، ނަމަވެސް ސިކުނޑީގެ މަސައްކަތްތައް ހީނަރުވަމުންދާކަން އަންގައިދޭ ވަރަށް މުހިންމު ނިޝާންތަކެކެވެ.
މި ހޯދުމުގެ ސަބަބުން އަލްޒައިމާ ބައްޔަށް ފަރުވާ ހޯދުމަށް ކުރާ މަސައްކަތަށް އާ އުންމީދެއް ވަނީ ލިބިފައެވެ. ބަލި ޖެހުމުގެ ކުރިން ނުވަތަ ބަލީގެ ކުރީކޮޅުގައި މި ސިގްނަލްތައް ދެނެގަނެވިއްޖެނަމަ، ބަލި ކޮންޓްރޯލްކުރުމަށް ދޭ ފަރުވާތައް މާ ފައިދާހުރި ގޮތެއްގައި ދެވޭނެއެވެ. އަދި ބަލި މީހާގެ ދިރިއުޅުމުގެ ފެންވަރު ރަނގަޅުކޮށް، ސިކުނޑިއަށް ލިބޭ ގެއްލުންތައް ކުޑަކުރުމަށްޓަކައި އަވަސް ފިޔަވަޅުތަކެއް އެޅުމަށް މި ހޯދުމުގެ ސަބަބުން މަގުފަހިވެގެންދާނެއެވެ.