މެންޗެސްޓަރ ޔުނައިޓެޑުގެ ކޯޗުކަމުން ރުބެން އަމޮރިމް ވަކިކުރުމަށްފަހު ވަގުތީ ގޮތުން ކޯޗުކަން ހަވާލުކޮށްފައިވަނީ މެންޗެސްޓަރ ޔުނައިޓެޑާއި އިނގިރޭސި ގައުމީ ޓީމުގެ ކުރީގެ ކުޅުންތެރިޔާ މައިކަލް ކެރިކްއެވެ. މިއާއެކު ފުޓްބޯޅަ ދިރާސާކުރާ ވަރަށް ގިނަ މީހުން މިވާހަކަ އެބަ ދައްކައެވެ. ޚާއްޞަކޮށް ޔުނައިޓެޑު މިވަގުތު އޮތް ހާލަތުން ރަނގަޅު ހާލަތަކަށް ގެންދެވިދާނެތޯ އެފަރާތްތަކުން އަންނަނީ ސުވާލު އުފައްދަމުންނެވެ.
ޔުނައިޓެޑުގެ ކޯޗުކަމުން އަމޮރިމް ވަކިކުރުމަށްފަހު ކެރިކަށް އެ މަގާމު ވަގުތީގޮތުން ހަވާލުކުރީ އަންގާރަދުވަހުއެވެ. ކެރިކް އެންމެފަހުން މަސައްކަތް ކޮށްފައިވަނީ ޗެމްޕިއަންޝިޕްގައި ވާދަކުރަމުން އަންނަ މިޑްލްސްބަރާގައި ކޯޗެއްގެ ގޮތުގައެވެ. އެޓީމުގައި ފާހަގަކުރެވިފައިވަނީ ފެށުން ރަނގަޅު އެހެނަސް ނިމުން ދެރަ މުއްދަތެއްގެ ގޮތުގައެވެ. އެ މުއްދަތުގައި އެޓީމުގެ ހުރިހާ ބަހާތަކުންނާއި ކުޅުންތެރިންނާއި ސަޕޯޓަރުންގެ ލޯބި ކެރިކް ހޯދިއެވެ. ހޭދަކުރި ދުވަސްތަކުގައި ވަރަށް ބޮޑަށް އެޓޭކިންގ ފުޓްބޯޅައަށް ބެލި ކެރިކް، ފަހުން ފަހުން ނެރުނު ނަތީޖާތަކާއެކު ސަޕޯޓަރުންގެ މެދުގައި ނުތަނަވަސްކަން އުފެދި އެންމެފަހުން ކެރިކްގެ ފިލޯސަފީއާމެދު ސުވާލު އުފައްދަންފެށިއެވެ.
މީގެ ކުރިންވެސް ކެރިކްވަނީ ވަގުތީ ގޮތުން ޔުނައިޓެޑުގެ ކޯޗުކަން ކޮށްފައެވެ. އެއީ އޮލެ ގުނަ ސޯލްޝެއާ ކޯޗުކަމުން ވަކިކޮށް ރަލްފް ރަގްނިކް ކޯޗުކަމަށް ގެނައުމާ ދެމެދު ޔުނައިޓެޑުން ކުޅުނު ތިން މެޗުގައެވެ. މި ތިން މެޗުގެ ތެރެއިން ދެމެޗު ކާމިޔާބުކޮށް އަނެއްމެޗު ނިމުނީ އެއްވަރުވެގެންނެވެ. މީގެތެރެއިންވެސް 3-2 އިން އާރސެނަލްގެ މައްޗަށް ކުރި ހޯދި މެޗު ފާހަގަކޮށްލަން ޖެހެއެވެ.
ކެރިކްގެ އެނބުރި އައުމާއެކު މެންޗެސްޓަރ ޔުނައިޓެޑުގެ ލެޖެންޑް ވޭން ރޫނީ އޭނާގެ ޕޮޑްކާސްޓުގައި ބުނެފައިވަނީ ކެރިކްއަކީ މޮޅު ކޯޗެއްކަމަށާއި، ކެރިކްއާއެކު ކާމިޔާބު ހޯދިދާނެކަމަށް ގަބޫލުކުރެވޭކަމަށެވެ. އަދި ކެރިކްގެ ފިލޯސަފީ އާއި ޓެކްޓިކްސް މެންޗެސްޓަރ އަށް ފިޓްވާނެކަމަށް ދެކޭކަމަށެވެ.
ބައެއް ސަޕޯޓަރުން މީސްމީޑިއާގައި ފާޅުކޮށްފައިވާ ޚިޔާލުތަކަށް ބަލާއިރު، ގިނައިން ފެންނަނީ ކެރިކްގެ ސްޓައިލް ކަމުދާ ވާހަކަތަކެވެ. އެގޮތުން އެޓޭކިންގއަށް ބޮޑަށް ކެރިކް މަސައްކަތް ކުރާވާހަކައާއި އެކަން ކުރިން ކާމިޔާބު ކޮށްފައިވާކަން ފާހަގަކޮށްފައި ހުރެއެވެ. ނަމަވެސް، އެއާ ވިދިގެން ދެން ދެކެވެނީ އެޓޭކިންގ ގައި ގޯލު ޖަހަން އެންމެ ގިނަ ފުރުސަތު މިހާތަނަށްވެސް ލީގުގައި އެންމެ ގިނައިން އުފެއްދި ޓީމަށް ޔުނައިޓެޑު ވާއިރު، ތިންދަނޑި ތެރެއަށް ބޯޅަ ވައްދާލުމުގައި ޔުނައިޓެޑް ނާކާމިޔާބުވެފައިވާ ވާހަކައާއި ޑިފެންސް ކުރުމުގައި ޔުނައިޓެޑަށް ދިމާވެފައިވާ މައްސަލަތަކުގެ ވާހަކައެވެ.
ކެރިކް ފާހަގަކުރެވިފައިވަނީ ޔުނައިޓެޑަށް ކުޅުނު ދުވަސްވަރުވެސް އަދި އޭގެފަހުންވެސް ވަރަށް މަޑުމައިތިރި މިޒާޖެއްގެ މީހެއްގެ ގޮތުގައެވެ. ޔުނައިޓެޑުގެ 'ލެޖެންޑުން' ގެ ތެރޭގައިވެސް ކެރިކް ގުނާލެވެއެވެ. އެގޮތުން އެޓީމުގައި ހޭދަކުރި 12 އަހަރު ތެރޭގައި 464 މެޗު ކުޅެ، ފަސް ފަހަރު ޕްރިމިއަރ ލީގު ތަށި ކާމިޔާބުކޮށް، އެފް.އޭ ކަޕާއި، ތިންފަހަރު ލީގުކަޕާއި، ޗެމްޕިއަންސް ލީގާއި، ޔޫރޮޕާ ލީގާއި، ކުލަބު ވޯލްޑްކަޕް ކާމިޔާބުކޮށްފައިވެއެވެ.
އެހެންނަމަވެސް، ޔުނައިޓެޑްގެ ކޯޗުކަމާ ކެރިކް މި ފަހަރު ހަވާލުވާއިރު ލީގު ފިޔަވައި އެހެން މުބާރާތެއްގައި ކާމިޔާބީއެއްގެ ގޮތުގައި ރަނގަޅު މަގާމެއް ހާސިލްކުރުން ފިޔަވައި އިތުރު އެހެން އަމާޒަކަށް ވާސިލްވެވެން ޔުނައިޓެޑަށް ނެތުމަކީ އެ ކްލަބަށް އޮތް ރަނގަޅަކަށް ވެސް ވެދާނެ އެވެ.
ކެރިކްގެ މައިގަނޑު މަސައްކަތަކަށް ވާނީ މި ފަހަރުގެ ލީގުގެ ރަނގަޅު މަގާމެއްގައި އޮވެ ނިންމާލައި، އަންނަ ސީޒަނުގައި ޔޫރަޕްގެ މުބާރާތަކަށް ކޮލިފައިވުމެވެ. ނިމިދިޔަ ސީޒަނުގެ ދެރަ ނަތީޖާތަކަށްފަހު މި ފަހަރުގެ ސީޒަނުގައި ޔޫރަޕްގެ އެއްވެސް މުބާރާތަކަށް ކޮލިފައިވެފައިނުވާއިރު، ޑޮމެސްޓިކް ހުރިހާ މުބާރާތަކުން ވަނީ ކަޓާފައެވެ. މީގެއިތުރުން، ލީގުގައި ވެސް ޔުނައިޓެޑްގެ ފޯމު ރަނގަޅެއް ނޫނެވެ. އެންމެ ފަހުން ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. ތިން މެޗުން އެއްވަރުވެފައިވާއިރު، އެއް މެޗުން ވަނީ ބަލިވެފައެވެ. އެހެންކަމުން، ކެރިކަށް ކުރިއަށް އޮތީ އުނދަގޫ ދަތުރެކޭ ބުނެވިދާނެ އެވެ.
ޔުނައިޓެޑާއެކު ކެރިކްގެ މި ފަހަރުގެ ދަތުރު ފަށާނީ މި މަހުގެ 17 ވަނަ ދުވަހު ވާދަވެރި މެންޗެސްޓަރ ސިޓީއާ ދެކޮޅަށް ކުޅޭ ޑާބީ މެޗުންނެވެ. މިވަގުތު ޔުނައިޓެޑު އޮތީ ޓޭބަލުގެ ހަތްވަނައިގައެވެ. ސިޓީ އޮތީ ޔުނައިޓެޑަށްވުރެ 11 ޕޮއިންޓް އިތުރަށް ހޯދާ ޓޭބަލުގެ ދެވަނައިގައެވެ.