ރާއްޖޭގައި ޑެންގީ ހުން ފެތުރޭ މިންވަރު ކަންބޮޑުވާ ދަރަޖައަކަށް އިތުރުވެ، ނިމިދިޔަ ޑިސެމްބަރު މަހު އެކަނިވެސް 400 އަށްވުރެ ގިނަ މީހުންނަށް މި ބަލި ޖެހިފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފިއެވެ.
މިއީ އޭގެ ކުރީ މަހާ އަޅާބަލާއިރު އަދި ފާއިތުވި އަހަރުގެ މި މުއްދަތާ އަޅާބަލާއިރު ވެސް ބޮޑު އިތުރުވުމެކެވެ.
އެޗްޕީއޭ އިން އާންމުކޮށްފައިވާ މައުލޫމާތަށް ބަލާއިރު، މިދިޔަ ޑިސެމްބަރު މަހު 413 މީހުންނަށް ޑެންގީ ޖެހިގެން ރިޕޯޓުކޮށްފައިވެއެވެ. އޭގެ ކުރީ ނޮވެމްބަރު މަހު ރިޕޯޓުކޮށްފައި ވަނީ 382 ކޭސް އެވެ. އަދި އޭގެ ކުރީ އަހަރުގެ ޑިސެމްބަރު މަހު ފެނިފައި ވަނީ އެންމެ 70 ކޭސްކަން ފާހަގަކޮށްލެވެއެވެ. އެހެންކަމުން މިއީ ކުއްލި އިތުރުވުމެއްގެ ގޮތުގައި އެ އިދާރާއިން ފާހަގަކުރެއެވެ.
މި ދުވަސްވަރު ޑެންގީ އިތުރުވަމުންދާތީ، ބަލިން ރައްކާތެރިވުމަށް ހާއްސަ ފިޔަވަޅުތަކެއް އެޅުމަށް އެޗްޕީއޭ އިން ވަނީ އިލްތިމާސްކޮށްފައެވެ. އެގޮތުން މަދިރި އުފެދޭ ތަންތަން ނައްތާލުމަށާއި، ފެން ހަރުލާ ގޮތަށް ހުންނަ ތަކެތި ސާފުކުރުމަށް ވަނީ އެދިފައެވެ. ގެއާއި ގޯތިތެރޭގައި ހުންނަ ގަސްމުށި ފަދަ ތަކެތި ހަފުތާއަކު އެއްފަހަރު ސާފުކުރުމަށާއި، ފެން ނޭޅޭނެހެން ތަކެތީގައި މަތި ޖެހުމަށް ސަމާލުކަން ދޭންޖެހެއެވެ.
މަދިރި ހަފުމުން ރައްކާތެރިވުމުގެ ގޮތުން ހަށިގަނޑު ނިވާވާ ގޮތަށް ހެދުން އެޅުމަށާއި، މަދިރި ލޯޝަން ނުވަތަ ސްޕްރޭ ބޭނުންކުރުމަށް ސިއްހީ މާހިރުން ލަފާދެއެވެ. ވަކިން ހާއްސަކޮށް މަދިރި ގިނަވާ ވަގުތުތައް ކަމުގައިވާ ހެނދުނާއި ހަވީރުގެ ވަގުތުތަކުގައި ގޭގެ ދޮރުތަކާއި ކުޑަދޮރުތައް ލައްޕާފައި ބެހެއްޓުމަށް ސަމާލުކަން ދޭންޖެހެއެވެ. ޑެންގީ ފަތުރާ އީޑީސް މަދިރި އާންމުކޮށް ހަފަނީ ދުވާލުގެ ވަގުތުތަކުގައި ކަމަށްވިޔަސް، ހުރިހާ ވަގުތެއްގައިވެސް ރައްކާތެރިވުމަށް އެޗްޕީއޭ އިން އިރުޝާދު ދެއެވެ.
ބަލި ޖެހިއްޖެނަމަ ގޭގައި ދެވޭނެ ފަރުވާއާ ގުޅޭގޮތުން އެޗްޕީއޭ އިން ބުނީ، ގިނައިން އަރާމުކުރުމާއެކު ދިޔާ ތަކެތި ބޭނުންކުރުން އިތުރުކުރަން ޖެހޭ ކަމަށެވެ. ހުން ގަދަވެ ގައިގައި ރިއްސާނަމަ ޕެރެސެޓަމޯލް ނުވަތަ ޕެނެޑޯލް ފިޔަވައި އެހެން ބޭހެއް ބޭނުން ނުކުރުމަށް އެ އިދާރާއިން އަންގައެވެ.