ޒަމާނުންސުރެ ދިވެހި މުޖުތަމަޢުގައި އޮންނަ އާދަކާދަތަކެއް ހުރެއެވެ. ކައްކަންވާނީ އަންހެނުންނެވެ. އެއްޗެހި ދޮވެ އިސްތިރިކުރަންވާނީ އަންހެނުންނެވެ. މަގުމައްޗާއި ގޭތެރެ ކުނިކަހާ ސާފުކުރުމާއި ތަރުތީބުކުރުމަކީ އަންހެންވެރީންގެ ޒިންމާއެކެވެ. ކުދިން ފެންވަރުވާ އެކުދިންގެ ހުރިހާކަމެއް ބެލެހެއްޓުމުގެ ޒިންމާއަކީ އަނބިމީހާގެ ޒިންމާއެކެވެ. މިހެން ގޮސް ލައްކަ ކަންކަން އެއީ އަންހެނުން ކުރާކަމެކޭ ބުނެ އަހަރުމެން އެކަން އަންހެންވެރިންނަށް އެކަނި ކުރުމަށް ދޫކޮށްލައިގެން ތިބެމެވެ.
މިދެންނެވި ފަދަކަމެއް ފިރިމީހާ ނުވަތަ ފިރިހެންވެރިން ކުރާނަމަ، އެމީހަކާ ދިމާއަށް 'ކަލޭ ތިހުރީ އަނބިދަށުވެފައޭ' ނުވަތަ 'އެއްކަލަ ސޮރު ހުންނަނީ އަނބިދަށުވެފައޭ' ބުނެއެވެ. ދެރަކޮށްލުމުގެ ގޮތުންނެވެ. ނުވަތަ ދިމާކޮށްލުމުގެ ގޮތުންނެވެ.
އެހެން ނަޒަރަކުން ވިސްނާލަމާ ހިނގާށެވެ. ރާއްޖޭގައި ކުރީގައި އާންމުކޮށް އާމްދަނީ ހޯދުމަށް މަސައްކަތްކުރަނީ ފިރިހެންވެރިންނެވެ. މިދެންނެވީ ގޭގައި ތިބެގެން އަންހެންވެރިން ކުރާ މަސައްކަތް ނުކުރާ ވާހަކައެއް ނޫނެވެ. މަސްވެރިކަމާއި، ދަނޑުވެރިކަމާއި، އޮޑިދޯނިފަހަރު ބަނުމާއި، ގެދޮރު އިމާރާތްކުރުމާއި މިހެންގޮސް ބުރަ މަސައްކަތްތަކުގައި ފިރިހެންވެރިން މުޅި ދުވަހު އުޅޭއިރު ގޭތެރޭގައި ކުރަންޖެހޭ ކަންކަން ކުރަނީ އަންހެންވެރިންނެވެ. އެހެންކަމުން ކުރިންސުރެ ގޭތެރޭގެ މަސައްކަތްތައް ކުރުމަކީ އަންހެންވެރިން ކުރަންޖެހޭ ކަންތައްތަކެއްކަމަށް މިވަނީ ކަނޑައެޅިފައެވެ. އެގޮތަށް އާދަވެފައެވެ.
ޒަމާނަށް އައި ބަދަލާއި، މީހުންގެ ދިރިއުޅުމުގެ ވައްޓަފާޅިއަށް އައި ބަދަލާއެކު، އަންހެންވެރިންވެސް ވަޒީފާތަކަށް ނުކުންނަން ފަށައިފިއެވެ. ފިރިހެންވެރިންވެސް ޒަމާނީ މަސައްކަތްތަކުގައި އުޅޭ ބީދައިން އަންހެންވެރިންވެސް އެ މަސައްކަތްތަކުގައި ފައިހަމަކުރަން ފަށައިފިއެވެ. ދެމަފިރިން އެކުގައި ވަޒީފާ އަދާކޮށްގެން މެނުވީ 'އަނގަޔާ އަތާ' ދިމާނުވާނޭތީ ދެމަފިރިންވެސް ވަޒީފާތަކަށް ދާން މަޖުބޫރުކުރުވީއެވެ. މިހެން ކަންތައް ބަދަލުވެގެން ދިޔުމުގެ ނަތީޖާއަކީ، ގޭތެރޭގައި ކުރަންޖެހޭ ކުރިން ދެންނެވި 'އަންހެންވެރިންނަށް ޚާއްޞަވެފައިވާ މަސައްކަތްތައް' ފިރިހެންވެރިންވެސް ކުރަން ޖެހެނީއެވެ. އެއީ މައްސަލައެއް ނޫނެވެ. ގުޅުމެއް ބަދަހިވެ، އާއިލާއެއް ބިނާ ކުރެވޭނީ ދެމަފިރިންގެ އެއްބާރުލުން ލިބިގެންނެވެ. އެކުގައި މަސައްކަތްތައް ކޮށްގެންނެވެ. އެހެންކަމުން އަލަށް ބޮޑެތިވަމުންދާ ޖީލުގެ ފިރިހެނުންނަށް މިކަންކަން ކޮށްލުމަކީ މާބޮޑު ކަމަކަށްނުވެއެވެ.
މައްސަލަ ޖެހެނީ މިހިސާބުންނެވެ. މިހާރުގެ ފިރިހެނުން އެ މަސައްކަތްތައް ކުރާތަން އެމީހުންގެ މައިންބަފައިންނަށް ފެންނަ ހިސާބުންނެވެ. އެމީހުންގެ ވިސްނުމާ މިހާރުގެ ކުދިންގެ ވިސްނުމާ އޮންނަ ތަފާތުގެ ބޮޑުކަމުންނެވެ. ދެކޭ ގޮތް އިންތިހާއަށް ތަފާތުވީމައެވެ. އިސްރަށްވެހީންނަށް ގޭތެރޭގެ ކަންކަން ފިރިހެންވެރިން ކުރާތަން ފެނުނީމާ އެކަންވަނީ 'އަންހެންދުޅާ' ކަމަކަށެވެ. ނަމަވެސް، މިއީ ބަދަލު ކުރާންޖެހޭ ވިސްނުމެކެވެ. މިހެން ބުންޏަސް ބައެއް ހަރުމީހުން މިކަމުގައި ފަހުގެ ފިރިހެނުންނާ ވަރަށް އެއްބަހެވެ. އަދި ކުރީގައިވެސް މިފަދަ މީހުން އުޅުނެވެ. ނިސްބަތުން މަދީއެވެ.
ގޭތެރޭގައި އަނބިމީހާއަށް އެހީތެރިވެ އުޅުމަކީ ދެމަފިރިންގެ ގުޅުމަށް ނުހަނު ހެޔޮ އަސަރުކުރާ ކަމެކެވެ. ގުޅުން ވަރުގަދަކޮށްދޭ ކަމެކެވެ. ދެމީހުންގެ މެދުގައި ވާހަކަދެކެވި، މަޝްވަރާގެ ކަންކަން އަށަގަންނަކަމެއްވެސްމެއެވެ. މީގެ އިތުރުން އެކަމުގެ ހެޔޮ އަސަރު ދަރިންނަށްވެސް ކުރާ ކަމެކެވެ. އެކުދިންނަށް އެކުދިންގެ މަންމައާއި ބައްޕަގެ މެދުގައި އޮންނަ ގުޅުން ފެނި، ނަފްސާނީ ގޮތުން ދުޅަހެޔޮ އަސަރުތަކެއް ކުރާކަމެކެވެ. އަދި އެކަމަކީ ދީނީ ގޮތުން ބެލިޔަސް، ދަރުމައާއި ޘަވާބު ލިބޭކަމެއްކަން ނަބިއްޔާގެ ހަޔާތްޕުޅުން ފެންނަން އޮތްކަމެކެވެ. އެހެންކަމުން، މީހަކު ބުނާ ދެރަ ބަހަކުން، މިކަހަލަ ރީތި އާދަތައް ދޫނުކޮށްލާށެވެ. ބަދަލުގައި އަންނަން އޮތް ޖީލަށް އެއާދަ އަށަގަންނުވަން މަސައްކަތްކުރާ ބަޔަކަށް އަހަރުމެންގެ މިޖީލުވާން ހިނގާށެވެ.