ޒަމާނަށް އައި ބަދަލާއެކު އަހަރުމެން ގިނަ މީހުންނަކީ ގިނަ ވަގުތު ގޮނޑީގައި އިށީ އިނދެ ތިބެންޖެހިފައިވާ ބައެކެވެ. އޮފީސްތަކުގައި އުޅޭ މީހުންގެ ޝަކުވާއަކީ ގިނަ ވަގުތު އެއްތާކު އިންނަންޖެހުމުން މީހާ ލޮޑުވުމާއި، ތަންތަނަށް ތަދު އެރުމާއި، ސްޓްރެސްވުމާއި، ހެލިފެލިވެ ނޫޅެވޭތީ ބަރުހެލިވާކަމުގެ ޝަކުވާއެވެ. ސިކުނޑިއަށާއި ބޮލަށް ބަރުވާކަމުގެ ނުތަނަވަސްކަމެވެ. ނަމަވެސް މިލިޔުމުގައި މި ބަލައިލަނީ ގިނަވަގުތު އިށީ އިނދެ ތިބެންޖެހުނަސް ފަސޭހައިން ކޮށްލެވިދާނެ ކަސްރަތުކޮޅަކަށެވެ.
އެންމެ ފުރަތަމަ މިގޮތަށް ލުއި ކަސްރަތު ކޮށްލުން މުހިންމުވަނީ ކީއްވެކަން އެނގެން އެބަޖެހެއެވެ. ގިނަ ވަގުތު އެއްގޮތަކަށް އިނުމުންނާއި، އަބަދު އިށީއިނދެ ތިބެންޖެހުމުން ހަށިގަނޑުގެ މަސްތައް ކުރުގެޅި، ހުޅުތައް ބާރުވެ ނުވަތަ ފިތި، ލޭދައުރުވުން މަދުވެއެވެ. މިކަމުގެ ސަބަބުން ގިނަ ދުވަސްވާވަރަކަށް ކަނދުރާއާއި ކޮނޑުގައި ރިއްސުމާއި، ބުރަކަށީގައި ރިއްސުމާއި، އަތާއި ފައިގެ ހުޅުތަކަށް ވާންވެ ތަދުވުމާއި، ކުރަން އުޅޭ ކަންތައްތަކަށް މާބޮޑަށް ސަމާލުކަން ނުދެވުމުގެ ސަބަބުން މީހާގެ އުފެއްދުންތެރިކަން ދަށްވާގޮތްވެއެވެ. އެހެންކަމުން ދޭތެރެ ދޭތެރެއިން ލުއި ކަސްރަތެއް ކޮށްލުން ކޮންމެހެންވެސް މުހިންމުވެގެންދެއެވެ.
ކޮށްލެވިދާނެ ބައެއް ކަސްރަތުތައް:
1. ގޮނޑީގައި ހަށިގަނޑު ތެދުކޮށްފައި ދެފައި ބިންމަތީގައި ހަމައަށް ޖައްސާށެވެ. ދެން ބޯ ކުޑަކުޑަކޮށް ކަނާތްފަޅިއަށް ގެންގޮސް ހުއްޓޭށެވެ. އެއީ ކަނާތު ކަންފަތް ކަނާތު ކޮނޑާ ސީދާވާގޮތަށެވެ. ދެން 10-15 ސިކުންތުވަންދެން މަޑުކޮށްލާށެވެ. އެވަގުތުކޮޅު ނޭވާ ލާނީ މަޑުމަޑުން ހަމަޖެހިގެންނެވެ. ހަމަ އެގޮތަށް ވާތް ފަޅިއަށްވެސް ތަކުރާރުކޮށްލާށެވެ.
2. ރީއްޗަށް ގޮނޑީގައި ހަށިގަނޑު ތެދުވާހެން އިންނާށެވެ. އަދި ދެކޮނޑު ކަންފަތާ ދިމާއަށްވާހެން ހިއްލާލުމަށްފަހު ދެކޮނޑު އެއްވަރަށް މަޑުމަޑުން ކުރިޔަށާއި ފަހަތަށް ހަރަކާތްކުރާށެވެ. އެގޮތަށް ހަރަކާތްކުރާއިރު ކޮނޑުކަށިގަނޑު ހަރަކާތް ކުރާނީ ވަށްބުރަކަށް ވާގޮތަށެވެ. އެގޮތަށް 8-10 ފަހަރު ހެދުމަށްފަހު މިސްރާބު ބަދަލުކޮށް ތަކުރާރުކޮށްލާށެވެ.
3. މޭޒުމަތީގައި އެއް އަތް ރީއްޗަށް ބާއްވާށެވެ. އަތްތިލައިގެ ހުދުހަން މައްޗަށް ވާގޮތަށެވެ. ދެން އަނެއް އަތުން ފަހަރަކު އިނގިއްޔަކަށް ގަޔާ ކައިރިއަށް ދަމާލާށެވެ. އެގޮތަށް އަނެއް އަތްވެސް ތަކުރާރު ކޮށްލާށެވެ.
4. އެއް އަތް ބޯމައްޗަށް ހިއްލާލާށެވެ. އަތުގެ އުޅަނބޮށި ބޮލުގެ ފަހަތުގައި ޖެހޭގޮތަށް ގެންދާއިރު އަތްތިލަ ބުރަކަށީގައި ޖައްސާށެވެ. ދެން އަނެއް އަތުން ބޯމައްޗަށް ނެގި އަތުގެ އުޅަނބޮށީގައި ހިފާފައި ދަމާލުމަށްފަހު 15 ސިކުންތު ވަންދެން ހިފަހައްޓާލާށެވެ. މިގޮތަށް އަނެއް އަތަށްވެސް ހަދާލަން ވާނެއެވެ.
5. ގޮނޑީގެ ކައިރިފަށުގައި ކިރިޔާ އިނދެވޭވަރަށް ޖެހިލާފައި ތަޅުމާދިމާއަށް ވާގޮތަށް އުނަގަނޑުން ތިރިވެލާށެވެ. އަދި ތަޅުންގަނޑާ ދިމާލަށް ދެއަތް ތިރިކޮށްލާފައި ވާގި ދޫކޮށްލާފައި 20 ސިކުންތު ވަންދެން މަޑުކޮށްލާށެވެ.
މިއީ ގޮނޑީގައި އިނދެވެސް ކޮށްލެވިދާނެ ލުއި ކަސްރަތުކޮޅެކެވެ. މާގިނަ ވަގުތެއް ނޫނެވެ. ނަމަވެސް، ކޮންމެ ގަޑިއިރަކުން މިކަހަލަ ލުއި ކަސްރަތެއް ކޮށްލުމުން ތިމާގެ އުޅުމަށާއި ވަޒީފާގެ މާހައުލުގައި ކުރާ ކަންކަމަށް ވަރަށް ބޮޑު ހެޔޮ ބަދަލެއް އަންނާނެއެވެ. ސިކުނޑި ތާޒާވެލައި، ހަށިގަނޑުގެ މަސްތައް ހަމަޖެހިލުމަށާއި ލޭދައުރުވުމަށް އެހީތެރިވެދޭނެއެވެ. ތެދުވެލާށެވެ. ލުއި ކަސްރަތެއް ކޮށްލާށެވެ. ހަރަކާތް ކޮށްލާށެވެ. ތިބާގެ ހަށިގަނޑު ތިބާއަށް ޝުކުރުވެރިވާނެކަން ޔަޤީނެވެ.